1. Kico apostel Juan a anima cristiannan pa haci, y dicon?

NOS mester pensa profundamente riba e palabranan cu nos ta haya na 1 Juan 3:1: “Mira ki gran amor e Tata a mustra na nos.” Cu e palabranan ey, apostel Juan a anima e cristiannan pa medita riba e varios maneranan cu Dios a mustra su amor na nan. Si nos tambe haci esey, nos amor pa Jehova lo crece y nos lo hala mas cerca dje.

2. Dicon ta dificil pa algun hende compronde cu Jehova ta stima nan?

² Lamentablemente, tin hende ta haya cu ta dificil pa compronde cu Dios por stima nan. Nan ta wak Dios como un persona cu ta solamente traha regla y castiga esnan cu no ta obedec’e. Of kisas siñansanan falso a pone nan sinti cu Dios ta cruel y cu ta imposibel pa stim’e. Di otro banda, tin esnan cu ta kere cu ni maske kico nos haci, sea bon of malo, toch Dios ta stima nos. Pero den bo estudio di Bijbel bo a siña cu amor ta e cualidad principal di Dios. E amor ey a motiv’e pa duna su Yiu como un rescate pa nos. (Juan 3:16; 1 Juan 4:8) Kisas door di e manera cu nos a lanta ta dificil pa nos compronde con hopi Dios ta stima nos.

3. Kico por yuda nos compronde e amor cu Dios tin pa nos?

³ Con anto Dios ta mustra cu e ta stima nos? Pa nos  por contesta e pregunta ey nos mester compronde prome ki relacion tin entre Dios y hende. Bijbel ta bisa cu Jehova ta esun cu a crea nos. (Lesa Salmo 100:3-5.) Pesey, Bijbel ta yama Adam “yiu di Dios.” (Luc. 3:38) Ademas, Hesus a siña nos pa bisa den oracion: “Nos Tata cu ta den cielo.” (Mat. 6:9) Jehova ta nos Tata pasobra el a duna nos bida. E relacion entre nos y Jehova ta manera e relacion cu tin entre un tata y su yiu. Simplemente bisa, Jehova ta stima nos manera un bon tata ta stima su yiunan.

4. (a) Ki diferencia tin entre Jehova y un tata humano? (b) Kico nos lo considera den e articulo aki y esun siguiente?

⁴ Naturalmente, tatanan humano ta imperfecto. Maske cuanto nan purba, nan no por expresa amor manera Jehova. Algun hende a hasta pasa den experencianan doloroso na cas tempo nan tabata mucha, lagando nan emocionalmente y psicologicamente traumatisa. Esey ta algo hopi lamentabel. Jehova nunca lo haci esey cu su yiunan. (Sal. 27:10) Sin duda, su amor y interes pa nos ta hala nos mas cerca dje. (Sant. 4:8) Den e articulo aki nos lo considera cuater manera cu Jehova ta mustra cu e ta stima nos. Y den e siguiente articulo, nos lo analisa cuater manera con anos por mustra cu nos ta stima Dios.

5. Kico apostel Pablo a bisa e hendenan di Atenas tocante Dios?

⁵ Tempo cu apostel Pablo tabata na Atenas, Grecia, el a ripara cu e stad tabata yen di imagen di dios falso. E hendenan eynan tabata kere cu e diosnan falso ey a duna nan bida y tabata percura pa nan. Despues cu el a ripara esey, Pablo a bisa nan: “E Dios cu a traha mundo y tur loke tin den dje ... ta duna tur hende bida, rosea y tur cos ... Pa medio di dje nos tin bida y ta move y ta existi.” (Echo. 17:24, 25, 28) Door cu Jehova ta stima nos, e ta duna nos “tur cos” cu nos tin mester pa biba. Laga nos mira algun ehempel.

6. Con e manera cu Dios a traha Tera ta mustra cu e ta stima nos? (Wak e prome plachi.)

⁶ Por ehempel, pensa riba nos planeta. Bijbel ta bisa cu Jehova, e Creador, a duna Tera “na e yiunan di hende.” (Sal. 115:15, 16) Cientificonan a gasta un monton di placa pa busca otro planetanan cu ta parecido na nos planeta Tera. Aunke nan a descubri cientos di planeta, nan a keda decepciona pasobra ningun di e planetanan ey no tin e mesun condicionnan ideal cu lo por sostene bida. Cu otro palabra, nos planeta ta unico. Pensa riba esaki: Di tur e planetanan cu ta existi den nos galaxia Via Lactea (Melkweg), Tera ta e unico planeta cu Jehova a traha pa por tin bida riba dje. No esey so, el a trah’e tambe como un dushi y bunita hogar pa su creacion humano. (Isa. 45:18) Esaki ta mustra con hopi Dios ta stima nos.—Lesa Job 38:4, 7; Salmo 8:3-5.

7. Con e amor di Dios ta bisto den e manera cu el a traha nos?

⁷ Un otro manera cu Jehova ta mustra cu e ta stima nos ta door di traha nos den su imagen. (Gen. 1:27) Pesey, nos por sinti su amor y expresa nos amor na dje, y esey ta haci nos feliz mescos cu un mucha ta sintie feliz ora e haya amor y atencion  di su mayornan. Ademas, Hesus a bisa: “Feliz ta esnan cu ta consciente di nan necesidad spiritual.” (Mat. 5:3) Jehova ta un Tata amoroso “kende ta duna nos tur e cosnan cu nos ta disfruta di dje”, tanto e cosnan material como spiritual.—1 Tim. 6:17; Sal. 145:16.

8. Dicon nos por depende riba e guia cu e “Dios di bèrdat” ta duna nos?

⁸ Tatanan ta stima nan yiunan y kier proteha nan pa nan no ser engaña. Pero, hopi mayor no por duna nan yiunan bon guia debi cu nan mes no ta sigui e principionan di Bijbel. Como resultado, hopi famia ta infeliz y ta sufri. (Prov. 14:12) Di otro banda, Jehova si ta duna su yiunan e mihor guia pasobra e ta e “Dios di bèrdat.” (Sal. 31:5, BPK) E ta stima nan y pesey e ta guia nan den tur aspecto di bida, specialmente ora ta trata di asuntonan di adoracion. (Lesa Salmo 43:3.) Laga nos analisa algun berdad cu ta mustra cu Dios ta stima nos.

9, 10. Pa mustra cu Jehova ta stima nos, (a) kico el a revela tocante su mes? (b) kico el a revela tocante nos?

⁹ Na prome luga, Jehova ta revela e berdad tocante su mes. Por ehempel, el a laga nos sa su nomber, cu ta aparece mas biaha den Bijbel cu cualkier otro nomber. Di e manera ey, Jehova ta laga nos conoc’e mihor pa asina nos por hala mas cerca dje. (Sant. 4:8) Ademas, Jehova a revela su cualidadnan pa nos haya sa ki tipo di Dios e ta. E inmenso universo ta revela e poder y sabiduria di Jehova. Y Bijbel ta siña nos tocante Dios su husticia, y mas cu tur cos su gran amor. (Rom. 1:20) Jehova no ta solamente un tata poderoso y sabi, pero tambe amoroso y husto. Pa e motibo ey, ta mas facil pa nos tin un relacion intimo cu ne.

¹⁰ Un otro cos cu Jehova a revela tin di haber cu nos papel den su proposito. E kier pa nos traha y biba hunto den union cu henter su famia universal. Ademas, Bijbel ta siña cu nos no por ta independiente di Dios y cu e no a traha nos cu e derecho pa dicidi pa nos mes kico ta bon y kico ta malo. Si nos ignora e berdadnan fundamental aki, semper lo tin consecuencia. (Jer. 10:23) Ta solamente si nos reconoce Dios su autoridad, nos por disfruta di paz y harmonia den nos bida. No ta amoroso di nos Tata cu el a revela e berdad aki na nos?

11. Ki promesa di Jehova ta mustra cu e ta stima nos?

¹¹ Un tata cu ta stima su yiunan ta preocupa tocante nan futuro, pasobra e kier pa nan tin un proposito den bida y pa nan ta feliz. Lamentablemente, mayoria di hende no sa kico pa haci cu nan bida, of nan ta core tras di metanan cu no ta duna berdadero felicidad. (Sal. 90:10) Di otro banda, nos bida si tin berdadero proposito debi na e futuro maraviyoso cu nos Tata, Jehova, a priminti nos.

12. Con Jehova a mustra tanto Cain como Baruk cu e tabata stima nan?

¹² Ora Jehova a mira cu Cain tabata a punto di tuma un mal decision, el a bis’e: “Pakico bo ta rabia? Y pakico bo cara ta cera asina? Si bo haci bon, lo bo no wordo acepta? ... Ma abo mester [domina e pica].” (Gen. 4:6, 7) E conseho  ey a bin net na tempo. Pero lamentablemente, Cain no a scucha e conseho ey, y como resultado e mester a sufri e consecuencianan. (Gen. 4:11-13) Na un otro ocasion, ora Baruk tabata sinti su mes cansa y desanima, Jehova a dun’e bon conseho pa yud’e mira dicon e tabata den e situacion ey. Baruk no tabata manera Cain pasobra e si a acepta e guia di Jehova, y esey a salba su bida.—Jer. 45:2-5.

13. Dicon Jehova ta permiti su sirbidornan fiel pasa door di pruebanan?

¹³ Apostel Pablo a bisa: “Esun cu Jehova ta stima e ta disciplina; de echo, e ta [castiga] tur hende cu e ta ricibi como yiu.” (Heb. 12:6, wak nota) Disciplina no ta encera solamente castigo. Bijbel ta menciona situacionnan den cua Jehova a permiti su sirbidornan fiel pasa door di pruebanan dificil como un forma di disciplina of entrenamento. Pensa riba Jozef, Moises y David. Ora nos lesa nan relato den Bijbel, nos por mira cu Jehova tabata cu nan den e momentonan di mas dificil. Loke nan a siña durante e pruebanan ey a yuda nan ora nan a haya responsabilidadnan mas grandi. E relatonan aki ta yuda nos mira cuanto amor Jehova tin pa nos.—Lesa Proverbionan 3:11, 12.

14. Dicon nos por bisa cu e disciplina cu Jehova ta duna nos ta un muestra di su amor?

¹⁴ E disciplina di Jehova ta yuda nos mira un otro manera cu e ta stima nos. Si un persona cu a comete un fout ricibi disciplina di Jehova y arepenti, Jehova lo pordon’e “abundantemente.” (Isa.  55:7) Kico esey kiermen? David a describi e manera cu Jehova ta pordona cu e siguiente palabranan: “[E] ta pordona tur bo inikidadnan; ... ta cura tur bo malezanan; ... ta redimi bo bida for di destruccion; ... ta corona bo cu misericordia y compasion. Mes leu cu pariba ta for di pabou, mes leu el a aleha nos transgresionnan for di nos.” (Sal. 103:3, 4, 12) Laga nos ta determina pa semper actua di biaha ora Jehova duna nos conseho y disciplina. Corda cu e ta haci esaki pasobra e ta stima nos.—Sal. 30:5.

15. Ki ehempel ta mustra cu nos ta hopi importante pa Jehova?

¹⁵ Un di e cosnan mas importante pa un tata ta pa proteha su famia. Nos Tata Jehova ta haci mescos. E salmista a bisa di Jehova: “E ta preserva alma di su santonan; e ta libra nan for di man di e malbado.” (Sal. 97:10) Pensa riba e siguiente ehempel. Nos wowo ta hopi importante pa nos, pesey nos ta haci tur cos pa proteh’e. Asina Jehova ta sinti pa su pueblo. E ta haci tur cos pa proteha nan pasobra nan ta hopi importante p’e.—Lesa Zacarias 2:8.

16, 17. Con Jehova a proteha su pueblo tanto den pasado como awe?

¹⁶ Jehova semper a uza e angelnan pa proteha su pueblo. (Sal. 91:11) Na un ocasion, un angel a mata 185.000 soldaat Asirio den un solo anochi pa salba e pueblo di Jehova. (2 Rey. 19:35) Siglonan despues, e angelnan a libra tanto Pedro, Pablo como otro cristiannan for di prizon. (Echo. 5:18-20; 12:6-11) Awe tambe Jehova ta proteha su pueblo. Por ehempel, un representante di e oficina principal cu a bishita un sucursal na Africa a bisa cu tabatin hopi conflicto politico y religioso den e pais. E situacion tabata teribel, tabatin bringamento, matamento, violacion sexual y hopi hende a perde tur nan pertenencianan. Aunke hopi di nos rumannan tambe a perde tur loke nan tabatin, niun di nan no a perde nan bida. Ora cu e representante a puntra nan con nan ta sinti, nan a contesta cu un smile grandi: “Tur cos ta bon, danki na Jehova.” Nan a echt sinti cu Dios ta stima nan.

¹⁷ Ta berdad cu Jehova a permiti algun sirbidor fiel manera Esteban muri. Pero Dios ta proteha su pueblo door di spierta nan di e trampanan di Satanas. (Efe. 6:10-12) Jehova ta uza su Palabra y e publicacionnan di su organisacion pa proteha nos. Por ehempel, nos a siña di e peligernan di entretenimento inmoral y violento, amor pa placa y mal uzo di Internet. Ta bisto anto cu Jehova, como un Tata amoroso, ta cuida y proteha su pueblo.

18. Con abo ta sinti tocante e amor cu Dios tin pa bo?

¹⁸ Despues di a considera djis algun manera cu Jehova ta mustra cu e ta stima nos, kisas nos ta sinti mescos cu Moises kende a bisa: “O satisface nos den mainta cu bo misericordia, cu nos por canta di goso y ta contento tur nos dianan.” (Sal. 90:14) Ta un bendicion cu nos por compronde y sinti cu Jehova ta stima nos. Esta un gran privilegio esey ta! Nos ta sinti mescos cu apostel Juan ora el a bisa: “Mira ki gran amor e Tata a mustra na nos.”—1 Juan 3:1.