TEMPO mi tabatin nuebe aña, mi a stop di crece. Esey tabata 34 aña pasa na Côte d’Ivoire, y te ainda mi ta midi 1 meter so. Ora mi mayornan a ripara cu mi no tabata crece mas, nan a anima mi pa traha duro pa mi no keda pensa riba mi estatura. Mi a pone un stand pa bende fruta dilanti di nos cas y mi a manten’e limpi. Pesey mi tabatin hopi cliente.

Aunke mi tabata traha duro, esey no a soluciona mi problema pasobra ainda mi ta cortico. Tin cosnan cu tabata dificil pa mi haci, manera yega na e toonbank den un tienda. Ta parce cu tur cos a ser traha pa hendenan cu ta dos biaha mas grandi cu mi. Esey tabata pone mi sinti hopi fastioso, pero cos a cambia ora mi tabatin 14 aña.

Un dia, dos señora testigo di Jehova a cumpra fruta cerca mi, y despues nan a cuminsa un estudio di Bijbel cu mi. Mi a bin realisa cu siña conoce Jehova y su proposito tabata mas importante cu mi apariencia fisico. Esey a yuda mi. Salmo 73:28 a bira mi texto faborito. E prome parti di e texto ey ta bisa lo siguiente: “Ta bon pa mi keda cerca di Dios.”

Diripiente nos a muda bay Burkina Faso, y mi bida a cambia completamente. Na Côte d’Ivoire hendenan tabata conoce mi cu mi stand di fruta, pero akinan niun hende conoce mi. Nan tabata haya mi straño y tabata keda wak mi. Y esey a pone cu mi no tabata kier a sali for di cas pa simannan largo. Sinembargo, mi a corda con bon tabata pa keda cerca di Jehova. Mi a skirbi sucursal di testigonan di Jehova, y nan a manda Nani un misionero cu tabata core scooter. E tabata net e persona corecto pa bishita mi.

Unda nos tabata biba, e camindanan di tera semper tabata slip, y ora awa yobe, e ta bira lodo. Hopi biaha Nani tabata cay for di su scooter ora e tabata bin studia cu mi, pero esey no a desanim’e. Un dia el a ofrece pa hiba mi reunion. Esey kiermen cu mi mester a sali for di cas y soporta con hende lo a keda wak mi. Ademas, como cu mi mester a sinta patras riba e scooter, esey lo a pone mas peso riba dje y hacie mas dificil pa stuur. Mi a pensa riba e di  dos parti di mi texto faborito: “Mi a haci Señor DIOS mi refugio.” Pues mi a bay reunion cu ne.

Tin biaha ami y Nani tabata tambalia y cay den lodo, pero tabata bale la pena pa yega e reunionnan. Esta un diferencia tabatin entre e smile di e rumannan den Salon di Reino y e mirada cu mi tabata haya di e hendenan pafo! Nuebe luna despues mi a batisa.

E otro parti di mi texto faborito ta bisa: “Pa mi por conta di tur Bo obranan.” Mi tabata sa cu e trabou di predica lo ta e desafio di mas grandi pa mi. Ainda mi ta corda e prome biaha cu mi a bay di cas pa cas. Mucha y hende grandi tabata keda wak mi, sigui mi y haci bofon di e manera cu mi tabata cana. Esey a hurt mi masha hopi, pero mi tabata corda mi mes cu nan tambe tin mester di e Paradijs, pesey mi a persevera.

Pa yuda mi den sirbishi, mi a haya un bais di tres wiel cu pedal di man. Mi compañe di sirbishi tabata pusha mi ora nos tabata subi sero y despues e tabata bula patras riba e bais mientras cu nos tabata baha sero. Aunke e trabou di sirbishi na principio tabata un desafio, el a duna mi asina hopi goso cu na aña 1998 mi a bira un pionero regular.

Mi a dirigi hopi estudio di Bijbel, y cuater di mi studiantenan a batisa. Y un di mi ruman muhernan tambe a haya e berdad. Ora mi scucha di e progreso cu otronan ta haciendo, esey ta duna mi net e animacion cu mi tin mester. Por ehempel, mi a yega di cuminsa un estudio di Bijbel na porta cu un studiante di universidad na Burkina Faso, y mi a pas’e pa un ruman homber. Despues e studiante a muda bay Côte d’Ivoire. Cu tempo mi a haya un carta di Côte d’Ivoire den cua mi a lesa cu e studiante a bira un publicador no batisa. Aunke mi tabatin malaria, loke mi a lesa a anima mi masha hopi mes.

Con mi ta percura pa mi mes? Un organisacion cu ta yuda hendenan cu limitacion fisico a ofrece mi pa siña cose. Un di e instructornan cu a ripara con mi tabata traha a bisa: “Nos mester siña bo con pa traha habon.” Y esey ta loke nan a haci. Mi ta traha habon pa laba paña y pa limpia cas. Hende ta gusta mi habon y ta recomend’e na otronan. Cu mi scooter di tres wiel mi mes ta entrega nan.

Lamentablemente, na aña 2004, e deformacion cu mi tin na mi weso di lomba tabata duna mi asina hopi dolor cu mi mester a stop di traha como pionero. Pero ainda mi ta haci tur loke mi por den sirbishi.

Hende ta bisa cu semper mi tin un smile. E echo cu mi ta keda cerca di Dios ta haci mi realmente feliz.—Segun relato di Sarah Maiga.