1, 2. Ki situacionnan dificil humanidad ta confronta awe, y kico cada un di nos tin cu haci?

NOS ta bibando den un tempo masha dificil. Mundo ta ser asota pa diferente calamidad: temblor, tsunami, candela, inundacion, volcan, tornado, tifon y horcan. Ademas, problemanan personal y den famia ta causa miedo y sufrimento. Ta manera Bijbel ta bisa, ‘tempo malo ta bin diripiente riba nos.’​—Ecl. 9:12.

² A pesar di e situacionnan angustioso aki, e pueblo di Dios ta sigui sirbie cu goso. Pero segun cu e era malbado aki ta yegando su fin, cada un di nos tin cu prepara nos mes pa cualkier situacion dificil cu nos por haya nos cu ne den futuro. Awor, con nos por haci esey, y kico por yuda nos enfrenta situacionnan dificil cu curashi awe?

3. Segun Romanonan 15:4, kico por ta un consuelo pa nos ora nos ta confronta problema serio?

³ E situacionnan dificil cu ta afecta mas y mas hende awe no ta nada nobo. Pesey, laga nos wak kico nos por siña for di algun sirbidor di Dios di pasado cu a enfrenta situacionnan dificil cu curashi.​—Rom. 15:4.

4. Kico David mester a soporta, y kico a yud’e?

⁴ David, por ehempel, tabatin cu soporta hopi cos: Un rey tabata odi’e, su enemigonan a atac’e, nan a captura su esposanan, famia y amigonan a traicion’e y e tabata kibra emocionalmente. (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8) Bijbel ta mustra bon cla cu David a sufri hopi pa motibo di e situacionnan aki. Sinembargo, David no a laga e cosnan ey debilita su fe den Jehova. El a bisa: “SEÑOR ta e fortaleza di mi bida; di ken lo mi tin miedo?”​—Sal. 27:1; lesa Salmo 27:5, 10.

5. Kico a yuda Abraham cu Sara trata cu situacionnan dificil?

⁵ Abraham cu Sara a biba gran parti di nan bida den tent den paisnan stranhero. Nan no tabatin un bida facil. Tabatin scarsedad di cuminda, y nan a pasa den situacionnan peligroso pa motibo di e nacionnan rond di nan. (Gen. 12:10; 14:14-16) Con bin nan por a enfrenta e situacionnan aki cu exito? Dios su Palabra ta bisa cu Abraham “tabata spera e stad cu tin berdadero fundeshi, e stad di cua Dios mes ta e diseñador y constructor.” (Heb. 11:8-10) Si, Abraham cu Sara a keda enfoca riba loke Dios a priminti nan y no a laga ningun situacion dificil kita nan goso.

6. Ki ehempel Job a pone pa nos?

⁶ Job a sufri masha hopi mes. Bo por imagina bo con el a sintie ora a parce cu tur cos tabata bay malo? ( Job 3:3, 11) Loke a haci e situacion pio ta cu e no tabata ni compronde pakico e cosnan ey tabata pasa cu ne. Pero e no a entrega; el a mantene su integridad na Jehova y no a perde fe. (Lesa Job 27:5.) Esta un excelente ehempel pa nos imita!

7. Kico Pablo a pasa aden como sirbidor di Dios, y kico a dun’e curashi pa sigui padilanti?

⁷ Un otro ehempel ta esun di apostel Pablo. El a hay’e “den peliger den stad, den peliger di luga desola, den peliger riba lama”; el a bisa cu el a ‘pasa hamber y sed, den friu y sin paña.’ Ademas, el a “pasa un dia y un anochi riba lama” grandi probablemente pa motibo di naufragio. (2 Cor. 11:23-27) A pesar di tur e cosnan ey, el a keda cu un bon actitud. Un biaha cu nan a hera mat’e, el a bisa: “Esaki tabata pa nos no pone nos confianza den nos mes, sino den e Dios cu ta lanta hende for di morto. Pues, . . . el a rescata nos for di peliger di morto.” (2 Cor. 1:8-10) Masha poco di nos a yega di haya nos cu asina tanto situacion dificil, pero hopi di nos sa sinti mescos cu Pablo. Pesey, su ehempel ta un consuelo pa nos.

8. Con algun problema por afecta nos awendia? Duna un ehempel.

⁸ Awendia, hopi hende ta sinti cu desasternan natural, desafio y presion cu nan sa haya nan cu ne ta mucho pa soporta. Hasta algun sirbidor di Jehova sa sinti nan asina. Por ehempel, Lani * di Australia, kende hunto cu su casa tabata traha den sirbishi di tempo completo, a bisa cu ora el a haya noticia cu e tabatin cancer na pecho, esaki a shock e y lag’e kibra. El a bisa: “E tratamentonan tabata haci mi malo. Mi tabata sinti cu mi no ta sirbi pa nada.” Pa colmo, e tabatin cu cuida su esposo, kende a caba di opera lomba. Kico nos por haci si nos ta den un situacion asina?

9, 10. (a) Kico nos no mester permiti Satanas haci? (b) Ki efecto e palabranan di Echonan 14:22 mester tin riba nos?

⁹ Nos mester corda cu Satanas ta uza e problemanan cu nos ta haya nos cu ne pa debilita nos fe y kita nos goso. Pero nos no mester permiti esey. Proverbionan 24:10 ta bisa: “Si bo desmaya den e dia di angustia, bo forsa ta keda limita.” Si nos medita riba ehempelnan biblico, manera esnan cu nos a caba di analisa, nos lo haya curashi pa soporta situacionnan dificil.

¹⁰ Ademas, ta bon pa nos tene na mente cu tin cierto problemanan cu nos no por elimina ni evita. (2 Tim. 3:12) Echonan 14:22 ta bisa: “Nos tin cu pasa hopi tribulacion pa drenta e Reino di Dios.” Pesey, ora nos ta enfrenta situacionnan dificil, nos no mester desanima; mas bien, nos mester mira esakinan como un oportunidad pa demostra cu nos tin pleno confianza cu Dios por yuda nos.

11. Kico nos mester haci pa nos no desanima?

¹¹ Nos mester enfoca riba cosnan positivo. E Palabra di Dios ta bisa cu “un curason alegre ta haci cara contento, ma ora cu e curason ta tristo, e spirito ta kibra.” (Prov. 15:13) Pa hopi tempo caba dokternan ta reconoce cu pensamento positivo por yuda un pashent recupera. Hopi pashent cu nan a duna loke na Hulandes yama placebo (cu no ta remedi di berdad) a cuminsa sinti nan bon pasobra nan tabata kere cu e “remedinan” aki ta yuda nan. Lo contrario tambe a keda proba (e asina yama nocebo-effect): Ora un hende cu ta malo cuminsa pensa cu ta un cierto remedi ta manda su salud atras, e lo cuminsa sintie mas malo tambe. Pesey, si constantemente nos ta lamenta tocante cosnan cu nos no por cambia, nos por desanima. Ta bon cu Jehova si no ta duna nos “placebo”; e ta duna nos berdadero yudansa. Den tempo di angustia, e ta uza su Palabra pa duna nos curashi, nos hermandad pa yuda nos y su spirito santo pa duna nos forsa pa persevera. Pesey, si nos ta enfoca riba e cosnan positivo aki, nos lo haya animo. Pues, en bes di laga pensamento negativo tormenta bo, haci tur loke bo por pa trata cu bo problema y sigui pensa riba cosnan positivo.​—Prov. 17:22.

12, 13. (a) Kico a yuda algun sirbidor di Dios persevera bou di situacion dificil? Duna un ehempel. (b) Con desaster natural ta revela kico ta mas importante den bida?

¹² Ultimamente, algun pais a ser asota severamente pa desaster natural. Ta remarcabel con hopi di nos rumannan den fe a logra supera e situacionnan dificil aki. Na comienso di aña 2010, por ehempel, un temblor pisa y un tsunami a asota Chile. Varios ruman a perde nan cas y nan pertenencianan. Algun a hasta perde trabou. Pero e rumannan aki a keda sirbi Jehova fielmente a pesar di e situacion dificil ey. Samuel, kende su cas a keda completamente destrui, a bisa: ‘Hasta bou di e circunstancianan dificil aki, ami cu mi esposa a sigui bay nos reunionnan y sirbishi. Esaki a yuda nos keda trankil y no desespera.’ Si, mescos cu hopi otro ruman, nan a sigui sirbi Jehova celosamente y no a laga e cosnan aki desanima nan.

¹³ Na september 2009, awasero pisa a inunda gran parti di Manila, Filipinas. Un homber rico cu a perde hopi di su propiedadnan a bisa: ‘E desaster aki a afecta tur hende; el a causa dificultad y sufrimento pa tanto rico como pober.’ Esaki ta laga nos corda riba e conseho sabi cu Hesus a duna: “Montona tesoro den cielo, caminda ni mot ni frusto no por come nan, ni ladron no por kibra drenta y horta.” (Mat. 6:20) Si nos bida ta draai rond di cos material, cu di un dia pa otro por disparce, facilmente nos por keda desapunta. Pesey, ta mas sabi pa enfoca riba nos relacion cu Jehova, pasobra esey si nos por keda cu ne ni maske kico pasa.​—Lesa Hebreonan 13:5, 6.

14. Ki motibo nos tin pa desplega curashi?

¹⁴ Aunke Hesus a adverti cu su discipelnan lo haya nan cu problema durante su presencia, el a bisa pa nan “no spanta.” (Luc. 21:9) Dicon no? Pasobra tanto e, nos Rey, como Jehova, e Creador di universo, ta cla pa yuda nos. Pues, nos tin tur motibo pa desplega curashi. Pablo a anima Timoteo, bisando: “Dios no a duna nos un spirito di cobardia, sino di poder, di amor y di sano huicio.”​—2 Tim. 1:7.

15. Con algun sirbidor di Dios a expresa nan confianza den Jehova, y con nos por tin e mesun curashi cu nan tabatin?

¹⁵ Hopi sirbidor di Dios a expresa nan confianza den Jehova. David a bisa: “SEÑOR ta mi fortaleza y mi escudo; mi curason ta confia den dje, y mi ta wordo yuda; pesey mi curason ta regociha.” (Sal. 28:7) Pablo a bisa: “Den tur e cosnan aki nos ta sali completamente victorioso pa medio di esun cu a stima nos.” (Rom. 8:37) Hesus, sabiendo cu pronto lo el a ser aresta y mata, a bisa su apostelnan: “Mi no ta mi so, pasobra e Tata ta cu mi.” ( Juan 16:32) Asina el a laga nan compronde bon cla cu e tin un bon relacion cu Dios. Tur e expresionnan aki ta revela cu e hombernan aki tabatin pleno confianza den Jehova. Si nos tambe siña confia den Jehova di e manera ey, nos lo haya curashi pa enfrenta cualkier situacion dificil.​—Lesa Salmo 46:1-3.

16. Dicon ta importante pa studia e Palabra di Dios?

¹⁶ Pa nos por tin curashi, nos no mester depende riba nos mes sino riba Dios, esun cu ta duna curashi. Nos ta haya e curashi aki si nos ta studia Dios su Palabra, Bijbel, regularmente. Di e manera ey, nos ta siña conoce Dios y confia den dje. Un ruman muher cu ta sufri di depresion a bisa kico ta yud’e: “Bes tras bes, mi ta lesa relatonan di Bijbel cu ta duna consuelo.” Awor, kico di e conseho pa tene adoracion como famia tur siman? Nos ta haci caso di e conseho aki di e esclavo fiel? Si ta asina, nos por tin e mesun actitud cu e salmista kende a bisa: “O cuanto mi ta stima bo ley! E ta mi meditacion henter dia.”​—Sal. 119:97.

17. (a) Menciona un otro manera cu Jehova ta yuda nos haya curashi. (b) Duna un ehempel di un storia di bida den nos publicacionnan cu a yuda abo.

¹⁷ Un otro manera cu nos por haya curashi ta mediante publicacionnan basa riba Bijbel cu ta fortalece nos confianza den Jehova. Hopi ruman ta haya e storianan di bida cu tin den nos revistanan masha edificante. Un ruman muher na Asia, kende ta sufri di trastorno bipolar, a sintie masha anima ora el a lesa e storia di bida di un ruman homber, un ex-misionero, cu tabata sufri di e mesun tipo di depresion cu ne. A pesar di su depresion, e ruman homber a sigui sirbi Jehova fielmente. E ruman muher a bisa: “E articulo a yuda mi compronde mi problema y a duna mi speransa.”

18. Dicon nos mester haci oracion regularmente?

¹⁸ Un otro manera cu Jehova ta yuda nos ta mediante oracion. Apostel Pablo a enfatisa e balor di oracion ora el a bisa: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason y boso mente pa medio di Cristo Hesus.” ( Flp. 4:6, 7) Abo ta resa regularmente y pidi Jehova yuda bo soporta cualkier situacion dificil? Alex, un ruman homber na Inglatera, kende pa hopi tempo caba ta sufri di depresion, a bisa: ‘E cosnan cu mas ta yuda mi ta papia cu Jehova den oracion y tende loke e ta bisa mediante su Palabra.’

19. Dicon ta importante pa nos asisti na nos reunionnan?

¹⁹ Nos reunionnan di congregacion ta un otro medio cu Jehova ta uza pa yuda nos. Un salmista a skirbi: “Mi alma ta anhela, si, ta antoha pa e pationan di SEÑOR.” (Sal. 84:2) Abo tambe ta sinti asina? Lani, e ruman muher cu nos a menciona anteriormente, ta splica cu ta masha importante pa nos asisti na tur nos reunionnan y asocia cu nos rumannan. El a bisa: “Si mi kier pa Jehova yuda mi, mi mester bay mi reunionnan.”

20. Con e trabou di predica ta yuda nos?

²⁰ Si nos kier tin curashi, nos mester ta activo tambe den e trabou di predica e Reino. (1 Tim. 4:16) Un ruman muher na Australia cu a hay’e cu hopi problema a bisa: “Mi no tabatin ningun tiki gana di bay predica, pero un anciano a anima mi pa sali cu ne den sirbishi. Y mi a bay. Sin duda, Jehova tabata cu mi, pasobra cada bes cu mi a sali den sirbishi, mi tabata sinti mi feliz.” (Prov. 16:20) Hopi ruman a ripara cu ora nan ta siña otro hende pone fe den Jehova, nan fe tambe ta bira mas fuerte. Ademas, ora nan ta yuda otro hende, nan ta lubida nan problemanan y ta concentra riba e cosnan di mas importante.​—Flp. 1:10, 11.

21. Kico nos por ta sigur di dje aunke nos ta pasando den situacion dificil?

²¹ Manera nos a mira, Jehova ta uza varios medio pa yuda nos enfrenta situacionnan dificil cu curashi. Si nos ta haci uzo di e medionan aki y ta medita riba e excelente ehempelnan cu tin den Bijbel di personanan cu a desplega curashi y imita nan, nos lo por enfrenta cualkier prueba cu exito. Si, maske nos por haya nos cu hopi situacion dificil segun cu e era malbado aki ta yega na su fin, nos lo por tin e mesun conviccion cu Pablo, kende a bisa: “Nos ta ser tumba, ma no destrui. . . . Nos no ta entrega.” (2 Cor. 4:9, 16) Dicon? Pasobra cu Jehova su yudansa, nos por enfrenta cualkier situacion dificil cu curashi!​—Lesa 2 Corintionan 4:17, 18.