E PALABRANAN di e mucha muher cita na man drechi ta revela un realidad tristo: Na tur parti di mundo hende muher, grandi y chikito, ta victima di violencia y discriminacion. Ata aki algun echo.

• Discrimina pasobra nan ta hende muher. Na Asia, mayoria di hende ta prefera yiu homber; nan no kier yiu muher. Segun un informe di Nacionnan Uni publica na aña 2011, nan ta calcula cu e poblacion den e parti di mundo ey tin casi 134 miyon hende muher menos debi na abortus, matamento di baby y negligencia.

• Educacion. Dos tercera parti di e poblacion mundial cu no tin scol of cu a haya menos cu cuater aña di scol ta consisti di hende muher, grandi y chikito.

• Intimidacion sexual. Mas cu 2.600 miyon hende muher ta biba den paisnan caminda no ta castiga un homber cu viola su esposa.

• Atencion medico. Den paisnan den desaroyo, un muher ta muri cada dos minuut durante embaraso of parto debi na falta di cuido medico basico.

• Derecho di propiedad. Den hopi pais hende muher no tin derecho di tin propiedad of di hereda tereno, a pesar cu ta nan ta cultiva mas cu mitar di e produccion mundial.

Dicon hende muher no tin e derechonan basico aki? Pasobra algun cultura tin creencia- y practicanan religioso cu ta fomenta of hasta hustifica maltrato y abuso di hende muher. Un corant Frances a cita un abogado di India, Chandra Rami Chopra, kende a bisa: “Tur ley religioso tin un cos en comun: Nan ta apoya discriminacion contra hende muher.”

Abo tambe ta pensa asina? Bo tambe ta kere cu Bijbel ta rebaha hende muher, mescos cu hopi otro buki religioso? Tin hende ta haya cu algun versiculo di Bijbel ta duna e impresion ey. Pero kico e Dios di Bijbel ta pensa di hende muher? Aunke esaki ta un tema delicado, un analisis franco y profundo di loke Bijbel ta bisa lo yuda nos haya e contesta.