Mi a nace na Riga, capital di Letonia. Mi mama a lanta ami cu mi ruman muher. Aunke mi mama ta catolico, nos tabata bay misa riba dianan di fiesta religioso so. Semper mi a kere den un poder mas aya, pero como hoben, tabatin hopi otro cos cu tabata distrai mi.

Segun cu mi tabata crece, mi mama a ripara cu mi tabata gusta plama cos for di otro y arma nan bek. Ya cu tabatin hopi cos den cas cu mi por a habri for di otro, mi mama no tabata kier pa mi keda cas mi so. Anto el a duna mi un cos di hunga cu varios pida di metal cu mi tabata gusta arma y desarma. Na mes momento mi a haya un otro pasion, esta, coremento di scooter. Mi mama a inscribi mi pa un careda di scooter cu yama Zelta Mopēds (Scooter di Oro). Na cuminsamento, mi tabata core careda di scooter, y despues di brommer.

Como cu mi tabata capta cos lihe, no a dura mucho cu mi tabatin hopi exito den e deporte di velocidad y peligroso aki. Mi a gana e campeonato di brommer di Letonia tres biaha, y dos biaha mi a gana e Campeonato di Brommer di Estadonan Baltico.

Ora mi tabata na top di mi carera, mi amiga Evija (cu despues a bira mi casa) a drenta den contacto cu testigonan di Jehova. El a haya algun di nan literatura cu tabatin un coupon pa pidi un estudio di Bijbel. El a yena e coupon y mand’e cu post. Un poco despues, dos Testigo a bishit’e, y el a cuminsa studia Bijbel cu nan. Ami no tabatin problema cu esey, pero na e tempo ey mi no tabatin mucho interes den cosnan spiritual.

Mas despues, e Testigonan a invita mi pa mi sinta y scucha durante Evija su estudio di Bijbel. Mi a acepta e invitacion, y mi a gusta loke mi a scucha. Loke a conmove mi mas tanto tabata e promesa di Bijbel tocante un paradijs  riba tera. Por ehempel, nan a mustra mi e texto na Salmo 37:10 y 11, cu ta bisa: “Aki poco tempo e malbado lo no t’ey mas; maske cuanto bo busca su luga, e lo no t’ey. Ma e humildenan lo hereda e tera, y lo deleita nan mes den paz abundante.” E promesa ey di berdad a atrae mi.

Mi interes spiritual a sigui crece. Mi a bin realisa cuanto mentira religioso ta existi. Di otro banda, e logica tras di siñansanan di Bijbel y e mensahe cla cu nan ta contene a impresiona mi.

Segun cu mi a sigui studia Bijbel, mi a siña cuanto Jehova ta balora bida. (Salmo 36:9) Esey a haci un impacto riba mi coremento di careda di brommer; mi no kier a sigui risca mi bida mas. Na luga di esey, mi kier a uza mi bida pa duna gloria na Jehova. Ta pesey e fama, gloria y excitacion di careda di brommer no tabata importante pa mi mas.

Na 1996, mi a asisti na un congreso internacional di testigonan di Jehova na Tallinn, Estonia, no mucho leu for di e stadion di brommer caminda tur ora mi tabata bai pa pusta. Na e congreso, mi a mira hende di diferente pais ta reuni hunto den paz y harmonia. Por ehempel, ora cu un Testigo a perde su tas, mi a pensa cu sigur lo e no hay’e nunca mas. Pero un poco despues un otro Testigo a haya e tas y a debolb’e cu tur cos aden. Mi a keda boca habri! Awor mi a keda convenci cu e Testigonan di berdad ta biba segun e normanan halto di Bijbel. Ami cu Evija a sigui haci progreso den nos estudio, y na 1997 nos a batisa como testigonan di Jehova.

Algun di mi amigonan a muri como resultado di nan coremento descabeya cu brommer. For di mi estudio di Bijbel, mi a bin compronde cu mi tin un responsabilidad pa cu e Dunador di bida, esta, Jehova. Kisas ta e comprondemento ey a scapa mi bida.

Pa cuater aña, ami cu Evija tabatin e privilegio di sirbi den e trabou di tempo completo na e sucursal di testigonan di Jehova na Riga. Awor nos tin goso den lanta nos yiu muher Alice y siñ’e stima Jehova. Tambe mi tin e privilegio di pasa un dia completo tur siman na e oficina di traduccion pa drecha auto y otro cosnan cu a daña. Mi ta hopi contento cu mi por haci bon uzo di e habilidadnan cu mi a siña tempo mi tabata mucha! Si, ainda mi ta plama cos for di otro y arma nan atrobe.

Danki na loke mi a siña for di Bijbel, mi ta balora masha hopi mes e privilegio di duna testimonio tocante e unico Dios berdadero hunto cu mi famia. Si, e promesa di un paradijs riba tera a cambia mi bida!