No a dura mucho cu mi a cuminsa practica gimnasia y bodybuilding. Cu tempo mi a habri mi mes gym na San Leandro, California, Merca. Eynan mi a traha cu diferente bodybuilder, incluyendo un cu a gana e titulo di Mr. America. Aunke mi a dedica mi mes na forma un curpa mas hancra of musculoso, toch esaki no a yena e bashi cu mi tabata sinti.

Un amigo na mi gym cu tabata sa cu mi tabatin deseo di compronde Bijbel a sugeri mi pa mi topa un hende cu e tabata conoce. Su manece, un testigo di Jehova a bishita mi na cas. Pa cuater ora largo el a contesta mi preguntanan directamente for di Bijbel. Mi a pidie pa e bin bek e mesun anochi ey y nos a combersa tocante Bijbel te meyanochi. Mi a gusta loke mi a siña. Pesey mi a puntr’e si mi por a compañ’e e siguiente dia pa mi wak con e ta predica. Mi a keda asombra di e manera cu e tabata habri Bijbel y mustra e doñonan di cas e contesta riba nan preguntanan. Mi a dicidi cu ta e trabou ey mi kier a haci.

Pues, mi a bende mi negoshi y mi tabata pasa mi dianan predicando cu e pionero * ey. Mi a batisa na mei di aña 1948 na un congreso na Cow Palace Arena na San Francisco, California. Despues, den e mesun aña ey mi a bira pionero.

Mientrastanto, mi a pidi e Testigo pa e bishita mi mama. Mi mama a reacciona na un manera faborabel y poco tempo despues e tambe a bira un testigo di Jehova. A pesar di e oposicion di su famia, mi mama a keda fiel na Dios pa hopi aña te na su morto. Niun otro miembro di nos famia no a bira testigo di Jehova.

Na aña 1950 mi a muda bay Grand Junction, Colorado, caminda mi a conoce un mucha muher cu yama Billie. El a nace na aña 1928 y a lanta den e tempo di e Gran Depresion (crisis economico di decada 1930 y 1940). Su mama, Minnie, tabata lesa Bijbel cu ne tur anochi den scuridad banda di un lampi di kerosin. Cu su cuater aña di edad, Billie tabata por a lesa caba y e tabata sa hopi relato biblico for di cabes. Na final di decada 1940, Billie su mama a studia Bijbel cu testigonan di Jehova y a siña cu fierno no ta un luga di tormento, sino un luga figurativo caminda mayoria hende ta drumi den morto. (Eclesiastes 9:5, 10) Tanto Minnie como su casa a bira Testigo.

Na 1949, despues cu Billie a caba universidad na Boston, el a bay cas bek y a cuminsa studia Bijbel.  En bes di bira un docente, el a dicidi di dedica su bida na Dios. Na 1950, el a batisa na e congreso internacional di testigonan di Jehova na Yankee Stadium na New York. No mucho tempo despues, nos a conoce otro, nos a casa y hunto nos a cuminsa nos sirbishi di tempo completo.

Nos a cuminsa na Eugene, Oregon, y eynan nos a haya hopi bon amigo. Na 1953, nos a bay biba na Grants Pass, Oregon, pa yuda un congregacion chikito. Poco tempo despues, den e mesun aña ey, nos a haya invitacion pa bay e di 23 klas di Galaad, un scol pa entrena misionero, cu tabata keda na South Lansing den e Estado di New York, un 400 kilometer noordwest di New York City.

Na december 1954, cinco luna despues cu nos a gradua di Galaad, ami cu Billie a subi un avion di dos motor rumbo pa Brazil. Ora nos tabatin un ora ta bula un di e motornan a faya, pero nos a baha sano y salvo na Bermuda. Despues nos mester a haci un otro aterisahe di emergencia na Cuba. Finalmente, despues di un biahe agotador di 36 ora, porfin nos a yega na e sucursal di testigonan di Jehova na Rio de Janeiro, Brazil.

Despues cu nos a keda un tempo cortico eynan, ami cu Billie y dos otro misionero a bay Bauru, São Paulo, pa cuminsa cu un cas di misionero nobo. E stad tabatin mas cu 50.000 habitante y nos tabata e prome testigonan di Jehova eynan.

Nos a cuminsa predica di cas pa cas, pero mesora e pastoor catolico local a cuminsa opone nos actividad. E tabata sigui nos y tabata bisa e doñonan di cas pa no scucha nos. Pero, den apenas un par di siman, un famia grandi cu nos tabata studia Bijbel cu ne a acepta e berdadnan biblico y despues di un tempo a batisa. Poco despues, otronan tambe a cuminsa studia Bijbel cu nos.

E famia cu a batisa tabatin un miembro di famia cu tabata presidente di un club renombra. Mi a haci areglo pa uza e facilidadnan di e club pa tene un asamblea. Ora e pastoor local a insisti pa kibra e contract, e presidente a reuni cu e miembronan di e club y a bisa nan: “Si boso kibra e contract, mi ta renuncia!” Nan a acepta pa e asamblea tuma luga.

E siguiente aña, na 1956, nos a haya invitacion pa asisti na un congreso di districto na Santos, São Paulo. Casi 40 Testigo di nos congregacion a biaha bay cu trein. Ora nos a yega Bauru bek, mi a haya un carta den postbus cu a asigna mi como un superintendente biahero pa bishita congregacionnan di testigonan di Jehova. Asina mi carera na Brazil di casi 25 aña den e trabou aki a cuminsa, durante cua nos a recore mayoria parti di e pais.

Den e tempo ey no tabata facil pa biaha. Nos a biaha door di henter e pais cu bus, den trein, riba garoshi y bais y hasta na pia. Un di e prome stadnan cu nos a bishita tabata Jaú, São Paulo. Eynan e pastoor a busca nos problema.

El a reclama nos: “Boso no mag di predica na mi carnenan!”

Nos a contest’e: “Nan no ta di bo, ta di Dios nan ta.”

Nos a haci areglo pa pasa un pelicula tocante nos trabou di predica rond mundo, titula: The New World Society in Action. Pero e pastoor a forma un grupo di hende pa ataca nos. Nos a informa polis mesora. Ora cu e pastoor y su grupo di parokiano a yega na e teater, na e entrada nan a topa cu un barera di polis cu arma dirigi riba nan. E publico grandi a disfruta masha hopi mes di e pelicula.

 Casi tur caminda cu nos a bay sirbi e tempo ey nos a topa cu e mesun tipo di persecucion y odio religioso. Por ehempel, na Brusque, cerca di Blumenau, Santa Catarina, nos a topa dos pionero cu a haya nan cu hopi oposicion. Pero nan perseverancia a duna bon resultado. Awe, despues di mas cu 50 aña, tin mas cu 60 congregacion den e region ey. Tambe, no mucho leu for di eynan, den e stad di Itajaí, tin un bunita Salon di Asamblea.

Un di e cosnan cu mas nos a gusta den nos asignacion tabata e tempo cu nos a pasa cu nos rumannan pa prepara pa e congresonan grandi. Durante añanan 1975 pa 1977, mi tabatin e privilegio di sirbi como superintendente di congreso den e stadion grandi di e stad Morumbi. Na un ocasion, nos a manda un peticion na mas o menos 100 congregacion den e area ey pa manda dies hende di cada congregacion pa limpia e stadion e anochi prome cu e congreso.

Segun cu e hungadonan di futbol tabata sali for di e stadion e anochi ey, algun di nan tabata haci bofon di e rumannan, bisando: “Wak tur e muhernan ey cu nan basora y mop, keriendo cu nan por limpia henter e stadion aki.” Pero pa meyanochi, henter e stadion tabata limpi limpi! E manager di e stadion a comenta: “Lo a tuma mi team di limpieza henter un siman pa haci loke e Testigonan a haci den apenas un par di ora!”

Na 1980 mi tata a fayece y poco tempo despues nos a bay bek Merca pa cuida mi mama na Fremont, California. Nos a haya trabou di limpia edificio parti anochi pa nos por sigui traha como pionero y yuda hende cu ta papia Portugues den e area ey. Poco tempo despues nos a muda bay San Joaquin Valley, caminda nos a busca hende di habla Portugues den e area grandi entre Sacramento y Bakersfield. Awor tin mas o menos dies congregacion di habla Portugues na California.

Despues cu mi mama a fayece na 1995, nos a muda bay Florida pa cuida e tata di Billie te ora cu el a fayece. Billie su mama a fayece na aña 1975. Na aña 2000 nos a muda bay zuidwest di Colorado, un area di desierto den sero. Eynan nos a dedica nos tempo na predica full-time na e Indjannan Mericano di Navajo y Ute cu ta biba den e areanan reserva pa nan. Lamentablemente, Billie a fayece na februari 2014.

Mi ta hopi contento cu mas di 65 aña pasa mi a conoce un testigo di Jehova cu a contesta tur mi preguntanan directamente for di Bijbel. Mi ta mas contento ainda cu mi mes a haci sigur cu loke el a bisa mi tabata cuadra cu loke Bijbel ta siña. Esaki a duna mi un bida yen di satisfaccion sirbiendo Dios.