E DICHO aki ta bon conoci pa hendenan cu ta biba na Oost Africa. Sin duda, hendenan na otro parti di mundo tambe ta pensa asina. Bo tambe ta pensa asina ora bo fia placa cerca un amigo of un otro caminda? Maske tin biaha esey por parce un bon idea, kico ta e consecuencianan di fia placa?

Un otro dicho Africano ta mustra nos kico ta e problema principal: “Fiamento ta kibra amistad.” En berdad, debe por daña nos relacion cu nos famia- y amigonan. Hopi biaha, maske nos tin intencion di paga bek, no ta semper cos ta bay manera nos a plania. Por ehempel, si nos no paga na tempo, esun cu a fia nos por tuma nos na malo, y esaki por causa tension, entre nos y esun cu a fia nos y hasta entre nos famia y su famia. Pues, fiamento por causa friccion. Pesey ta bon pa nos considera fiamento di placa como e ultimo recurso y no como un manera facil pa soluciona nos problemanan.

Fiamento di placa por daña nos relacion cu Dios tambe. Con asina? Pa cuminsa, Bijbel ta bisa cu ta hende malbado ta nenga di paga nan debe bek. (Salmo 37:21) Tambe Bijbel ta bisa bon cla cu “e fiado ta bira esclavo di esun cu ta fi’e.” (Proverbionan 22:7) Pues, e fiado mester realisa cu e tin e obligacion di paga bek tur loke el a fia. Un otro dicho Africano cu tambe a resulta di ta berdad ta bisa: “Si bo fia pia di un hende, bo tin cu bay unda cu e kier bay.” Loke e dicho aki kier laga nos compronde ta cu un hende cu tin hopi debe, no ta liber pa haci loke e kier.

Ta masha importante anto pa nos paga bek mas pronto posibel loke nos a fia. Si no, tardi of trempan, nos lo haya nos cu problema. Kico por ta e consecuencianan si un hende laga su debe acumula? Esaki por causa angustia, anochinan sin drumi, stress, hopi overtime, pleitamento entre pareha y hasta divorcio, pa no papia mes di demandanan legal of posibel encarcelacion. Pesey, ta bon pa nos sigui e conseho sabi di Romanonan 13:8: “No debe ningun hende nada; unico debe cu boso tin ta di stima otro.”

En bista di tur esaki, nos no mester core fia placa. Ta sabi pa puntra bo mes: Di berdad mi mester fia placa? Esaki ta e unico manera pa salba mi negoshi pa mi por sigui percura pa mi famia? Of mi ta un poco golos y kier hiba un bida cu mi no por afford? Den mayoria di caso, ta mihor bo keda contento cu loke bo tin en bes di fia placa.

Naturalmente, por tin excepcion, manera ora ta trata di un emergencia y ta parce cu no tin niun otro opcion. Si bo dicidi di fia placa mes, mustra cu bo ta un persona honesto y confiabel. Con bo por haci esey?

Wel, no probecha di un hende djis pasobra ta parce cu e ta bon para financieramente. Nos no mester pensa cu un persona asina ta obliga di yuda nos djis pasobra e tin placa. Tampoco nos no mester sinti cu nos no tin cu paga nan bek, pasobra nan no tin mester di e placa. No envidia esnan cu ta parce di ta den un mihor situacion economico cu nos.—Proverbionan 14:30.

Despues cu bo a fia placa, corda paga bek y haci esey mas pronto posibel y manera boso a palabra. Si e persona cu a fia bo placa no a duna bo un tempo fiho pa paga bek, abo mes sugeri esey y cumpli cu e palabracion ey. Ta consehabel pa pone e palabracion preto riba blanco pa evita cualkier mal comprondemento. (Jeremias 32:9, 10) Si ta posibel, paga e hende bek personalmente ya asina bo por gradicie. Ora bo ta paga bek puntualmente, bo ta evita friccion y ta mantene un bon relacion cu e persona cu a fia bo. Hesus a bisa den su Sermon Riba Sero: “Simplemente, laga boso ‘si’ ta si, y boso ‘no’, no.” (Mateo 5:37) Ademas, corda semper riba e conseho practico cu Hesus a duna nos: “Tur loke boso kier pa hende haci cu boso, boso tambe mester haci cu nan.”—Mateo 7:12.

Bo ta sinti e tentacion pa fia placa? Bijbel ta duna un bon conseho: “Un cos ta sigur: devocion na Dios ta di gran probecho, basta nos ta satisfecho cu loke nos tin.” (1 Timoteo 6:6) Cu otro palabra, si bo keda contento cu loke bo tin, bo por scapa di tur e problemanan cu fiamento di placa por trece cu ne. Claro cu no ta facil pa keda satisfecho cu loke bo tin den e mundo aki cu ta presiona nos pa satisface nos deseonan di biaha. Ta na momentonan asina nos tin cu demostra “devocion na Dios.” Den ki sentido?

Tuma por ehempel, un pareha cristian casa cu ta biba na Asia. Tempo cu nan tabata mas jong, nan tabata echt admira hende cu tabatin nan propio cas. Pues, nan a dicidi di cumpra nan mes cas cu placa cu nan a spaar, placa cu nan a fia na banco y placa cu nan a fia di nan famia. Sinembargo, no a dura hopi tempo pa nan realisa cu e pagonan mensual tabata mucho hopi pa nan. Nan a cuminsa traha mas y mas y como resultado, nan no tabatin tempo pa nan yiunan. E esposo a bisa: “E stress, dolor y falta di soño tabata manera un baranca riba mi cabes. Mi tabata sinti mi sofoca.”

Cu tempo, nan a bin corda e conseho cu tin na 1 Timoteo 6:6, y nan a dicidi cu e unico solucion tabata pa bende nan cas. A dura dos aña pa nan por a elimina tur nan debe. Ki les e pareha aki a siña for di e experencia ey? Nan a bisa: “Ta un proteccion pa mira cos material manera Dios ta mira nan.”

Hopi hende conoce e dicho Suahili cu nos a menciona na principio di e articulo aki. Pero toch hopi hende ta sigui fia placa. Despues di a considera e consehonan di Bijbel menciona den e articulo aki, lo ta sabi pa bo pensa bon riba e pregunta: Mi mester fia placa?