Nan tabata uza molina di man pa mula grano pa nan haya hariña pa traha pan. Na mayoria di cas, e hende muhernan of crianan tabata uza molina di man como parti di nan trabou di tur dia. Pues tabata normal cu bo ta tende e zonido di mulamento di grano.—Exodo 11:5; Jeremias 25:10.

Pinturanan y estatuanan di antiguo Egipto ta mustra nos con nan tabata mula grano. E tipo di molina cu tabatin forma di siya, of zadel, a consisti di dos piedra, esun abou tabata un poco hol y un tiki mas halto parti patras y e otro riba dje tabata mas chikito. Pa e trahador mula e grano, e tabata bay riba su rudia tras di e obheto y tabata tene e piedra mas chikito cu ambos man. Despues e tabata pusha e piedra aki bay bin cu tur su forsa, y asina mula e grano entre e dos piedranan. Segun un fuente, normalmente un piedra di molina tabata pisa entre dos pa cuater kilogram. Si bo lo a uza e piedra ey como un arma, bo lo por a mata un hende.—Huesnan 9:50-54.

Como cu mulamento di grano tabata sumamente importante pa un famia sobrevivi, e ley di Dios a bisa cu bo no tin mag di tuma un molina di man como garantia. Deuteronomio 24:6 ta bisa: “Ningun hende no mag tuma un molina di man of e piedra di molina di mas ariba como garantia, pasobra ta un bida e ta tuma como garantia.”

E expresion “sinta banda di e Tata” ta un traduccion di e expresion literal “banda di su pecho” den e idioma original y ta referi na e relacion special, intimo y tierno cu Hesus tin cu Dios. E expresion ey ta bin di un custumber cu e Hudiunan tabatin ora di come.

Den tempo di Hesus, e Hudiunan tabata come na un mesa cu varios sofa rond di dje. Nan tabata sinta di banda cu nan pianan riba e sofa y cu nan elleboog robes gestet riba un cusinchi. Nan cabes tabata direccion pa e mesa. E posicion aki a permiti nan pa uza nan man drechi. Segun un enciclopedia, door cu nan tabata sinta riba nan banda robes y banda di otro, “e cabes di un homber tabata keda cerca di e pecho di e homber sinta su tras. Pesey bo por bisa cu e ta ‘sinta banda di e pecho’ di e homber patras di dje.”

Den e tempo ey, tabata un honor of privilegio special pa sinta den e posicion ey banda di un anfitrion di un bankete of un cabes di famia. Pesey, na e ultimo Pasco Hudiu cu Hesus a celebra, “e discipel cu Hesus tabata stima”, esta apostel Juan, tabata esun sinta banda di dje. Pa e motibo ey, Juan por “a leun riba Hesus” su pecho pa hacie un pregunta.—Juan 13:23-25; 21:20.