SARA tabata para meymey di e camber ta wak rond. Imagina bo un señora di Medio Oriente cu su dos wowonan color scur y expresivo. Kisas su mirada a demostra cu e tabata tristo? Si tabata asina, lo no ta dificil pa nos compronde dicon. E tabatin hopi recuerdonan den e cas ey. E cu su casa stima, Abraham, a pasa hopi momentonan dushi eynan. * Hunto nan a haci e cas ey nan hogar.

Nan tabata biba na Ur, un stad prospero cu hopi artesano y comerciante. Pues siguramente nan tabata bon para. Pero pa Sara, su hogar tabata nifica mas cu djis un luga pa warda su pertenencianan. Aki ta caminda e cu su casa a comparti añanan di goso y tristeza cu otro. Ey nan a haci hopi oracion na nan Dios stima, Jehova. Pues Sara tabatin yen yen di motibo pa stima e hogar ey.

Pero, Sara tabata dispuesto pa muda y bay laga tur loke e tabata conoce. A pesar cu kisas lo e tabatin 60 y pico aña di edad, lo el a biaha bay un luga desconoci y lo a hiba un bida yen di peliger y dificultad y sin sa si lo el a regresa su cas bek. Kico a pon’e haci un cambio asina grandi den su bida? Y awe, kico nos por siña di su fe?

Probablemente Sara a lanta na Ur. Awe, e unico cos cu a keda di e stad ey ta un ruina desola. Pero den tempo di Sara, constantemente boto di e comerciantenan tabata nabega pasa door di e awa y canalnan di Riu Eufrates y tabata trece mercancianan precioso for di leu na e stad prospero aki. Multitud di hende tabata cana pasa den e cayanan smal y yen di bocht di Ur, botonan tabata lucha pa haya un luga pa mara den e waf y e bazarnan tabata yen yen di mercancia. Imagina bo con Sara a lanta den e stad druk ey y a siña conoce hopi di e hendenan pa nomber. Casi sigur nan lo a cord’e como cu e tabata un muher extraordinariamente bunita. Anto e tabatin un famia grandi eynan.

Den Bijbel, Sara ta conoci pa su gran fe, pero no fe den e dios-luna cu mayoria di hende na Ur tabata venera, caminda tabatin un toren dedica na e dios ey. En bes di esey, Sara tabata adora e Dios berdadero, Jehova. E relato inspira no ta bisa con Sara a haya e fe ey. Su tata, pa por lo menos un tempo, tabata adora Dios falso. En todo caso, el a casa cu Abraham, un homber dies aña mas grandi cu ne. * (Genesis 17:17) Despues, Abraham a bira conoci como e “tata di tur hende cu Dios ta considera husto pa motibo di nan fe.” (Romanonan 4:11) Hunto nan a haci nan matrimonio excelente y fuerte, nan tabatin respet pa otro, bon comunicacion y tur dos tabata dispuesto pa resolve problemanan dificil hunto. Riba tur cos, nan amor pa nan Dios tabata loke a caracterisa nan matrimonio.

 Sara tabata stima su casa masha hopi, y nan dos a forma un hogar den cercania di nan famianan na Ur. Pero poco tempo despues, nan a haya nan confronta cu un problema. Bijbel ta conta nos cu Sara “tabata steriel; e no tabatin yiu.” (Genesis 11:30) Den e tempo aya y den e cultura ey, Sara su condicion tabata un prueba dificil. Pero Sara a keda leal na Dios y su casa. Nan subrino huerfano, Lot, a bira manera un yiu pa nan. Asina bida a sigui te e dia cu tur cos a cambia.

Abraham a bin cerca Sara tur entusiasma. Casi e no por a kere kico a caba di sosode. E Dios cu nan tabata sirbi a aparece na dje, sin duda mediante un angel, y a papia cu ne. Imagina con Sara cu su wowonan bunita a wak su casa lief asina cu atencion y a puntr’e: “Conta mi, kico el a bisa bo?” Podise Abraham a cay sinta prome, a pensa un rato y despues lo a bis’e loke Jehova a bisa: “Sali for di bo tera, laga bo famia atras y bay na e tera cu lo mi mustra bo.” (Echonan 7:2, 3) Despues cu nan a calma poco, nan a medita riba e asignacion cu Jehova a duna nan, esta, nan mester a bay laga nan cas y bida confortabel y bay biba den tent y muda di un luga pa otro. Con Sara lo a reacciona? Sin duda Abraham lo a wak e cu atencion. Sara lo a apoy’e den un cambio asina grandi den nan bida?

E decision cu Sara mester a tuma kisas ta zona straño pa nos. Podise bo ta pensa: Wel, Dios nunca a pidi ami of mi casa pa haci algo asina. Sinembargo, no ta asina cu nos tur ta enfrenta un escogencia similar? Nos ta bibando den un mundo materialista cu kier pa nos pone nos mes comodidadnan, nos pertenencianan of nos sentido di siguridad na prome luga den nos bida. Pero Bijbel ta urgi nos pa tuma un otro decision, esta, pa pone cosnan spiritual prome, pa agrada Dios prome en bes di nos mes. (Mateo 6:33) Segun cu nos ta pensa riba loke Sara a haci, kisas nos por puntra nos mes: Ki decision ami lo tuma den bida?

Segun cu Sara tabata paketa su cosnan, e tabatin e dilema di kico lo el a bay cu ne y kico lo el a laga keda. E no por a bay cu cosnan cu tabata mucho grandi pa e caravana di burico y camel carga ni nada cu lo no tabata practico pa un hende cu ta biba den tent y cu ta muda di un luga pa otro. Sin duda, nan lo mester a bende of duna otro hende hopi di nan pertenencianan. Tambe lo el a bay laga e comodidadnan cu bida den stad a ofrece, por ehempel, e no por a yega facil na e mercado y bazarnan caminda e por a cumpra grano, carni, fruta, paña y otro articulonan di necesidad y pa nan comodidad.

Podise lo tabata mas dificil pa Sara bay laga su cas. Si Sara su cas tabata manera e casnan cu arkeologonan a descubri na Ur, lo el a bay laga varios comodidad. Algun cas tabatin mas cu 12 camber, y  tambe fontein cu fuente di awa fresco y sistema di tuberia. Hasta un cas mas simpel lo por tabatin un dak fuerte, muraya y un porta cu kisas por a cera na lock. Acaso un tent por a duna nan e mesun proteccion contra ladron of contra loke den e epoca aya tabata comun den teranan biblico, esta, leon, leopardo, beer y wolf?

Y kico di su famia? Ken Sara lo a bay laga atras? Dios su mandato pa sali for di nan tera, y laga nan famia atras kisas lo tabata specialmente un reto p’e. Como cu e tabata un dama yen di amor y cariño, kisas lo e tabatin ruman homber- y muhernan, subrina- y subrinonan, tanta- y omonan cu lo e tabata masha pega cu nan, y podise lo e no por a mira nan nunca mas. Pero cu curashi, Sara a sigui padilanti, dia tras dia, preparando pa nan muda.

A pesar di e retonan, Sara tabata prepara y cla pa muda riba e dia cu nan mester a bay. Aunke cu Tare, e patriarca di famia, tabatin mas o menos dos siglo di edad, e mester a compaña Abraham cu Sara. (Genesis 11:31) Sin duda, Sara lo mester tabata hopi bezig ta cuida su tata biehito. Lot tambe lo a bay hunto cu nan ora nan a obedece Jehova y “a sali for di tera di e Caldeonan.”—Echonan 7:4.

E caravana a biaha bay Haran, mas o menos 960 kilometer den direccion noordwest, siguiendo Riu Eufrates. E famia a keda Haran pa un tempo. Kisas Tare tabata malo y no por a sigui biaha mas. E famia a keda eynan te dia el a fayece na edad di 205 aña. Na un dado momento prome cu nan a sigui nan biahe, Jehova a bolbe papia cu Abraham y a bis’e un bes mas pa sali for di e tera ey y bay na e tera cu Jehova lo a mustr’e. Pero e biaha aki Dios a agrega un promesa emocionante: “Lo mi haci bo un nacion grandi.” (Genesis 12:2-4) Pero ora nan a sali for di Haran, Abraham tabatin 75 aña y Sara tabatin 65 aña, y nan no tabatin yiu. Con Abraham por a bira un nacion? Lo el a tuma un esposa mas? E tempo aya, poligamia tabata normal, y kisas Sara a pensa riba esey.

En todo caso, nan a sali for di Haran y a sigui cu nan biahe. Sinembargo, tuma nota ken tabata biahando hunto cu nan awor. E relato ta conta cu Abraham su famia a sali cu e rikesa cu nan a acumula y cu “e hendenan cu nan a haya na Haran.” (Genesis 12:5) Ken e hendenan aki tabata? Muy probablemente nan tabata sirbientenan. Pero, sin duda Abraham cu Sara lo a papia tocante nan fe cu esnan cu kier a scucha. Algun Hudiu di antiguedad cu a comenta riba e versiculo aki ta bisa cu e hendenan ey tabata proselito, esta, hendenan cu a join Abraham cu Sara den adora Jehova. Si tabata asina, sin duda e fe fuerte di Sara a yud’e convence hende cu a scuch’e papia tocante su Dios y su speransa. Ta masha sabi di nos parti pa medita riba esaki y imit’e, ya cu nos ta bibando den un tempo cu masha poco hende tin fe y speransa. Pesey, ora bo siña algo valioso for di Bijbel, pakico no compartie cu otro hende?

Despues cu nan a crusa Riu Eufrates, probablemente dia 14 di nisan, aña 1943 prome cu Cristo, nan a bay zuid rumbo pa e tera cu Jehova a priminti nan. (Exodo 12:40, 41) Imagina bo con Sara tabata wak rond y tabata disfruta di e bunitesa, e variedad y e weer placentero di e tera. Den cercania di Sikem, cerca e palonan grandi di More, Jehova a bolbe aparece na Abraham, y e biaha aki el a bis’e: “Bo descendientenan lo mi duna e tera aki.” E expresion “descendientenan” lo tabatin hopi nificacion pa Abraham. Casi sigur esey a pone pensa bek riba e Hofi di Eden, caminda Jehova a profetisa cu un dia un descendiente, of simia, lo destrui Satanas. Ya Jehova a bisa Abraham cu e nacion cu lo a bin for di dje lo trece bendicion pa hende rond mundo.—Genesis 3:15; 12:2, 3, 6, 7.

A pesar di esey, e famia no tabata scapa di e problemanan di e mundo aki. A bin un hamber na Canaan, y Abraham a dicidi di bay zuid cu su famia rumbo pa Egipto. Pero, el a sinti cu tabatin un peliger den e region aki. Pesey el a bisa Sara: “Mira, mi sa cu bo ta un muher bunita; y lo sosode cu ora e Egipcionan mira bo, nan lo bisa: ‘Esaki ta su esposa’; y nan lo mata mi, ma abo nan lo laga keda na bida. Pa fabor, bisa cu bo ta mi ruman pa bay mi bon pa bo motibo, y pa mi por keda na bida pa bo motibo.” (Genesis 12:10-13) Dicon Abraham a pidi Sara pa haci e cos ey?

 Abraham no tabata un gañado ni un cobarde, manera algun critico a bisa. Sara, en berdad, tabata su mitar ruman. Y ta cu bon motibo Abraham tabata cauteloso. Abraham cu Sara tabata sa cu no tabatin nada mas importante cu Dios su proposito pa produci un descendiente special y pa un nacion bin for di Abraham; pues Abraham su siguridad tabata di sumo importancia. Ademas, evidencia arkeologico ta mustra cu no tabata nada straño cu hombernan den puesto di autoridad na Egipto tabata secuestra esposa y mata e esposo. Pues Abraham a haci coy sabi, y Sara a coopera humildemente cu su decision.

No a dura mucho cu sucesonan cu a tuma luga a mustra cu Abraham no tabatin miedo pornada. Algun prins di Farao a ripara cu Sara tabata masha bunita, algo masha remarcabel pa su edad. Nan a bay bisa Farao, y el a manda nan pa trece Sara na e palacio. Ta dificil pa imagina Abraham su angustia of con afligi Sara lo tabata. Pero, ta parce cu nan a trata Sara, no como un rehen, sino como un invitado special. Kisas Farao a plania pa seducie y impresion’e cu su rikesa, pa despues e negosha cu su ruman homber pa e por a hay’e como esposa.—Genesis 12:14-16.

Imagina bo con Sara tabata wak e panorama di Egipto door di un bentana of para riba un balcon. Ta con lo el a sintie bibando atrobe rondona pa muraya, cu un dak riba su cabes y cu cuminda exkisito su dilanti? Acaso el a laga un bida luhoso tent’e, podise un bida hasta mas luhoso cu e bida cu e tabatin na Ur? Satanas lo a keda masha contento si Sara a pensa di bandona Abraham y casa cu Farao. Pero Sara no a cay den e tentacion ey. E tabata leal na su casa, su matrimonio y su Dios. Awe, den e mundo inmoral aki, mare tur hende casa por tabata leal asina. Bo por imita Sara su lealtad den bo trato cu bo famia y amigonan?

Jehova a interveni y a manda plaga riba Farao y su cas pa proteha e dama stima aki. Di un manera of otro, ora Farao a haya sa cu Sara tabata casa di Abraham, Farao a mand’e bek pa Abraham y a pidi henter e famia sali for di Egipto. (Genesis 12:17-20) Esta contento Abraham a bira cu e por a haya su esposa keri bek! Corda cu cariñosamente el a bisa Sara: “Mi sa cu bo ta un muher bunita.” Pero e tabata aprecia un otro tipo di bunitesa di Sara hopi mas tanto, un bunitesa cu tabata mas importante cu simplemente su apariencia. Sara tabata realmente bunita di paden, e tipo di bunitesa cu Jehova ta balora. (1 Pedro 3:1-5) Esey ta un tipo di bunitesa cu nos tur por cultiva. Nos lo imita e fe di Sara si nos pone cosnan spiritual prome cu cosnan material, si nos purba di comparti e conocemento di Dios cu otro hende y si lealmente nos biba segun Dios su normanan moral halto ora nos ta enfrenta tentacion.