Bijbel ta bisa cu Dios kier pa hende “abstene di fornicacion.” (1 Tesalonicensenan 4:3) Den Bijbel, e palabra “fornicacion” ta inclui adulterio, homosexualidad y relacion sexual entre un homber y un muher cu no ta casa cu otro.

•  Dicon ta importante pa Dios si un pareha ta casa of no?

•  Kico di biba hunto prome cu casa pa wak si ta bay bon cu otro?

•  Con un pareha por fortalece nan matrimonio?

•   Matrimonio ta un areglo di Dios. Dios a institui matrimonio ora el uni e prome pareha. (Genesis 2:22-24) Su proposito no tabata pa un homber y un muher biba hunto sin carga e responsabilidadnan di matrimonio.

•   Dios sa kico ta mihor pa nos. Dios kier pa matrimonio ta un union permanente, entre un homber y un muher, cu ta beneficia y proteha tur miembro di famia. Wak e siguiente ilustracion: Pa arma un mueble na e manera corecto, nos mester sigui e instruccionnan di e fabricante. Den mesun manera, si nos kier tin un bida di famia feliz, nos mester sigui Dios su instruccionnan. Si nos obedece Dios su normanan, semper lo bay nos bon.—Isaias 48:17, 18.

•   Relacion sexual pafo di matrimonio por tin consecuencia serio. Por ehempel, esaki por resulta den embaraso no desea, maleza transmiti sexualmente y problema emocional.

•   Dios a crea nos cu e capacidad di haya yiu mediante relacion sexual. Bida ta sagrado pa Dios, y e capacidad di haya yiu ta un regalo precioso. Pesey Dios kier pa nos trata e regalo ey cu respet y uz’e solamente cu nos casa. Asina ey nos ta balora matrimonio.—Hebreonan 13:4.

 Pa un pareha por tin un matrimonio feliz, nan no mester biba hunto sin compromiso pa un tempo pa wak si nan ta bay bon cu otro of no. Al contrario, un matrimonio tin exito ora un pareha ta determina pa keda cu otro y ta traha hunto pa trata cu problema. a Matrimonio ta fortalece e determinacion di un pareha pa keda hunto.—Mateo 19:6.

 Niun matrimonio no ta perfecto. Sinembargo, un pareha por tin un matrimonio feliz si nan aplica conseho di Bijbel. Laga nos wak algun ehempel:

•   Pone e necesidadnan di bo casa prome cu di bo.—1 Corintionan 7:3-5; Filipensenan 2:3, 4.

•   Sigui stima y respeta otro.—Efesionan 5:25, 33.

•   Siña controla e manera cu bo ta papia.—Proverbionan 12:18.

•   Tene pasenshi y sea cla pa pordona.—Colosensenan 3:13, 14.