Ken Ta Bay Cielo?
E contesta cu Bijbel ta duna
Dios a scoge un cantidad limita di cristiannan fiel cu, despues di nan morto, lo resucita pa biba den cielo. (1 Pedro 1:3, 4) Unabes cu nan ta scogi, nan mester sigui mantene nan fe fuerte y sigui obedece Dios pa e no descualifica nan di ricibi nan herencia spiritual.—Efesionan 5:5; Filipensenan 3:12-14.
Kico nan lo haci eynan?
Nan lo sirbi como rey y sacerdote hunto cu Hesus pa 1.000 aña. (Revelacion 5:9, 10; 20:6) Nan lo forma e “cielonan nobo”, of gobierno celestial, cu lo goberna riba e “tera nobo”, of sociedad humano. E reynan ey den cielo lo yuda humanidad yega na perfeccion manera Dios tabata kier for di principio.—Isaias 65:17; 2 Pedro 3:13.
Cuanto hende lo bay cielo?
Den Bijbel nos por lesa cu ta 144.000 hende lo resucita pa biba den cielo. (Revelacion 7:4) Den e vision na Revelacion 14:1-3, apostel Juan a mira “e Lamchi para riba Sero di Sion, y hunto cu ne 144.000.” Den e vision aki, “e Lamchi” ta representa Hesus resucita. (Juan 1:29; 1 Pedro 1:19) “Sero di Sion” ta representa e posicion eleva di Hesus y e 144.000 cu ta goberna cu ne den cielo.—Salmo 2:6; Hebreonan 12:22.
“Esnan cu Dios a yama y scoge” pa goberna hunto cu Cristo den e Reino ta ser yama tambe un “tou chikito.” (Revelacion 17:14; Lucas 12:32) Esaki ta mustra cu nan lo ta relativamente menos na comparacion cu e cantidad total di Hesus su carnenan.—Juan 10:16.
Ideanan robes tocante esnan cu ta bay cielo
Idea robes: Tur bon hende ta bay cielo.
Echo: Segun e promesa di Dios, mayoria di bon hende lo biba pa semper riba Tera.—Salmo 37:11, 29, 34.
Hesus a bisa: “Ningun hende no a subi na cielo.” (Juan 3:13) Pues, cu e palabranan aki el a mustra cu e bon hendenan cu a muri prome cu ne, manera Abraham, Moises, Job y David, no a bay cielo. (Echonan 2:29, 34) Na luga di esey, nan tin e speransa pa resucita aki riba Tera.—Job 14:13-15.
E resureccion pa bida den cielo ta ser yama “e prome resureccion.” (Revelacion 20:6) Esaki ta mustra cu lo bay tin un otro resureccion. Esey lo ta un resureccion riba Tera.
Bijbel ta siña nos cu bou di e gobernacion di e Reino di Dios “lo no tin morto mas.” (Revelacion 21:3, 4) E promesa aki mester ta aplica na Tera pasobra nunca no tabatin morto den cielo.
Idea robes: Cada persona mes ta dicidi si e kier haya bida den cielo of riba Tera.
E Berdad: Dios ta determina cua fiel cristian lo ricibi “e premio di Dios su yamada celestial”, esta, e speransa pa bida den cielo. (Filipensenan 3:14) E echo cu un persona kier bay cielo, no kiermen cu Dios ta scog’e pa bay cielo.—Mateo 20:20-23.
Idea robes: E speransa di biba pa semper riba Tera ta solamente pa esnan cu no ta digno di biba den cielo.
E Berdad: Dios ta yama esnan cu ta ricibi bida pa semper riba Tera “mi pueblo”, “mi scoginan” y “esnan cu SEÑOR a bendiciona.” (Isaias 65:21-23, Beibel Santu) Nan lo tin e privilegio di cumpli cu e proposito original di Dios pa humanidad, esta, bida eterno den un paradijs riba Tera den un estado perfecto.—Genesis 1:28; Salmo 115:16; Isaias 45:18.
Idea robes: E number 144.000 cu e buki di Revelacion ta menciona no ta literal pero simbolico.
E Berdad: Aunke e buki di Revelacion sa uza numbernan simbolico, algun di e numbernan cu e ta uza si ta literal. Por ehempel, e ta menciona “e 12 nombernan di e 12 apostelnan di e Lamchi.” (Revelacion 21:14) Laga nos wak algun evidencia cu ta mustra cu e number 144.000 ta literal.
Revelacion 7:4 ta bisa cu “esnan cu a ricibi e seyo [es decir, aproba pa biba den cielo ta] 144.000.” Den e contexto tin un di dos grupo cu na contraste ta “un multitud grandi cu ningun hende no por a conta”, cu tambe ta ricibi salbacion di Dios. (Revelacion 7:9, 10) Si e number 144.000 ta algo simbolico, e ora e contraste entre e dos gruponan ey lo bay perdi. a
Ademas, Bijbel ta describi cu e 144.000 tabata “cumpra for di entre humanidad como e prome frutanan.” (Revelacion 14:4) E expresion “prome frutanan” ta referi na un grupo chikito selecta. E ta aplica na esnan cu lo goberna den cielo cu Cristo riba un cantidad incontabel di hende riba Tera.—Revelacion 5:10.
a Profesor Robert L. Thomas a skirbi lo siguiente tocante e number 144.000 menciona na Revelacion 7:4: “E ta un cantidad defini na contraste cu e cantidad indefini na 7:9. Si mir’e como algo simbolico, anto no por mira ningun otro number den e buki aki como algo literal.”—Revelation 1-7: An Exegetical Commentary, pagina 474.
You May Also Like
PREGUNTA CU BIJBEL TA CONTESTA
Kico Ta Cielo?
Segun Bijbel, e palabra aki tin tres nificacion basico.
