Dennis Christensen a yega Dinamarca sano y salvo dia 25 di mei 2022. E dia prome, el a sali di un prizon Ruso, y mesora, el a ser deporta. En total, el a keda 5 aña cera. E tabata cera den varios prizon.

Ruman Dennis a bisa: “Mi ta hopi contento cu mi a sali di prizon y cu mi por ta hunto atrobe cu mi casa Irina. Tur apoyo y animacion cu m’a haya di mi rumannan rond mundo tabata manera un regalo di Jehova. Mi ta sigui pidi Jehova pa yuda mi rumannan cu ta ser persigui debi cu nan ta sirbi Jehova.”

Dennis cu Irina ta hayando animacion y sosten financiero di nan amigonan y nan famianan. Dennis cu Irina a bisa: “Nos ta contento cu awor nos por sirbi Jehova hunto cu nos rumannan na Dinamarca, sin ningun restriccion.”

Dennis a ser aresta y detene dia 25 di mei 2017. Agente cu cara tapa a arest’e na un reunion di congregacion na Oryol. Despues, un hues a declara Ruman Dennis culpabel di a organisa actividad di un organisacion religioso cu Corte Supremo di Rusia a prohibi y declara extremista un luna prome.

E autoridadnan na Rusia ta sigui bisa cu e prohibicion di 2017 ta conta solamente pa e entidad legal di testigonan di Jehova na Rusia. Nan kiermen cu e prohibicion no ta stroba persona individual cu ta Testigo di adora Dios. Sinembargo, despues di Ruman Dennis su detencion, e autoridadnan a aresta hopi testigo di Jehova na Rusia y Crimea y pone nan den prizon.

Te cu awe, 91 di nos rumannan ta den prizon. Nos ta pidi Jehova pa sigui sostene e rumannan fiel ey y duna nan un trato special.—Salmo 4:3.