E testigonan di Jehova na Bulgaria ta activo siñando otro hende e berdadnan tocante Dios y tocante su Palabra, Bijbel. Pa yuda e Testigonan na Bulgaria den nan trabou di predica, desde aña 2000, centenares di testigo di Jehova a bandona nan pais y bay biba na Bulgaria. Kico ta e desafionan cu nos por haya nos cu ne ora muda pa bay predica na un otro pais? Dicon ta bale la pena pa muda? Laga nos trata algun experencia di e rumannan cu a muda bay Bulgaria.

 Darren, cu tabata biba na Inglatera, a bisa: “Semper nos tabatin e meta pa bay yuda caminda tin mester di mas ruman pa predica. Despues cu ami cu Dawn a casa, nos a bay biba na London pa yuda hende cu ta papia Ruso siña di Bijbel. Hopi biaha, nos a traha plan pa bay biba na otro pais. Pero debi na varios motibo, nos no a logra. Nos a pensa cu nos lo no logra bay mas. Pero despues, un amigo di nos a yuda nos realisa cu nos circunstancia a cambia y cu nos por alcansa nos meta.” Darren cu Dawn a cuminsa busca un pais caminda tin mester di mas ruman pa siña hende e berdad y caminda tabata mas facil pa muda bay. Na 2011, nan a bay biba na Bulgaria.

 E bunita ehempel di e rumannan cu a bay biba na un otro pais pa predica a anima otro ruman cu na principio no tabatin e meta pa bay predica na un otro pais. Giada, cu tabata biba na Italia cu su esposo, Luca, a bisa: “Mi a cera conoci cu algun testigo di Jehova cu tabata predica cu masha smaak na Sur America y na Africa. Nan experencia a anima mi masha hopi mes. Esaki a yuda mi ahusta mi metanan spiritual.”

 Tomasz cu Veronika a muda for di Republica Checo bay biba na Bulgaria cu nan dos yiunan Klara y Mathias. Kico a motiva nan pa muda? Tomasz ta contesta: “Nos a analisa ehempel di algun ruman cu a bay biba na un otro pais y tambe e experencianan di nos famianan. Nos a medita riba e experencianan aki. Nan goso a anima nos hopi como famia.” E famia aki ta predicando felizmente den nan teritorio nobo na Bulgaria, den e stad Montana.

 Linda ta un otro testigo di Jehova cu a bay biba na Bulgaria. El a bisa: “Hopi aña pasa mi a bishita Ecuador, y mi a cera conoci cu algun ruman cu a muda pa bay predica eynan. Esey a pone mi pensa cu kisas un dia mi tambe por bay yuda caminda tin mester di yudansa den e trabou di predica.” Petteri cu Nadja, un pareha di Finlandia, tambe a medita riba ehempel di otro ruman. Nan a bisa: “Den nos congregacion, tabatin algun ruman cu a muda pa bay yuda den e trabou di predica. Semper nan tabata papia cu hopi entusiasmo di e añanan cu nan a predica na otro pais. Nan a bisa cu e añanan ey tabata e mihor añanan di nan bida.”

 Ta hopi importante pa esnan cu kier bay predica na un otro pais plania bon. (Lucas 14:28-30) Nele, di Belgica, a bisa: “Mi kier a bay predica na otro pais. Pues, mi a cuminsa haci oracion y busca informacion den e articulonan cu ta papia tocante bay biba na un otro pais. Mi tabata studia nan y wak kico mi tabatin cu traha riba dje.”

 Kristian cu Irmina, kendenan ta di Polonia, tin mas cu nuebe aña na Bulgaria. Nan a realisa con importante tabata pa asisti na e reunionnan di e grupo di habla Bulgaro na Polonia prome cu nan a muda bay Bulgaria. E rumannan di e grupo ey a anima nan y yuda nan siña e idioma Bulgaro. Kristian cu Irmina a bisa: “Nos por a mira con maraviyoso ta ora Jehova ta percura pa bo necesidadnan si bo haci bo mes disponibel. Ora cu boluntariamente bo bisa Jehova: ‘At’ami aki! Manda ami!’, bo ta logra haci cos cu nunca bo a pensa cu lo ta posibel.”—Isaias 6:8.

 Reto cu Cornelia, un pareha di Suisa, a dicidi di hiba un bida simpel pa asina nan por a prepara y spaar placa pa bay biba otro caminda. Un aña prome cu nan a muda, nan a bay Bulgaria pa un siman pa haya un mihor idea con bida ta na Bulgaria. Un pareha misionero na Bulgaria a duna nan varios conseho practico. Reto cu Cornelia a sigui e consehonan ey, y awor nan tin mas cu 20 aña ta biba na Bulgaria.

 Hende cu bay biba na un otro pais mester adapta nan mes na algun circunstancia nobo cu tin biaha por ta dificil. (Echonan 16:9, 10; 1 Corintionan 9:19-23) Un desafio grandi ta siña un idioma nobo. Luca, menciona anteriormente, a bisa: “Nos ta gusta duna comentario di curason na nos reunionnan cristian. Pero prome tabata dificil pa ami y mi esposa prepara un simpel comentario na idioma Bulgaro. Ta manera bo ta bira mucha atrobe. Aunke francamente bisa, e comentarionan di e muchanan di Bulgaria tabata mihor cu esnan di nos.”

 Ravil, di Alemania, a bisa: “E por cansa bo ora bo tin cu siña un idioma nobo. Pero mi tabata bisa mi mes pa no tuma tur cos na serio, pero pa mi hari ora mi haci fout. Mi no a mira e desafionan ey como un problema, pero como parti di mi sirbishi sagrado na Jehova.”

 Linda, menciona anteriormente, a bisa: “Mi no ta bon den siña un idioma nobo. No ta facil pa siña e idioma Bulgaro. Y hopi biaha mi a pensa pa stop. Bo ta sinti cu bo ta bo so ora cu bo no por comunica cu hende y ora cu bo no ta compronde kico nan ta papia. Pa keda spiritualmente fuerte, mi tabata studia tur e publicacionnan na Sueco. Finalmente, mi por a logra vence e reto di siña un idioma nobo cu yudansa di mi rumannan spiritual.”

 Un otro desafio pa esnan cu ta bay predica na un otro pais por ta heimwee, pasobra nan ta bay laga nan famia y amigonan atras. Eva, cu a bay biba na Bulgaria cu su esposo, Yannis, a bisa: “Na cuminsamento, mi tabata sinti mi mi so. Pa trata cu e desafio ey mi tabata comunica frecuentemente cu mi famia y amigonan. Y nos a cera amistad nobo aki na Bulgaria.”

 Tin mas desafio. Robert cu Liana, kendenan a muda for di Suisa bay biba na Bulgaria, a bisa cu e idioma y e cultura tabata un desafio grandi pa nan. Nan a bisa cu nan no tabata bon prepara pa e friu pisa cu tin den winter na Bulgaria. Sin embargo, kedando positivo y cu un bon sentido di humor, nan a logra sirbi na Bulgaria fielmente durante e ultimo 14 añanan.

 Lilly ta anima tur hende pa bay predica caminda tin mester di mas yudansa. El a bisa: “Mi a siña conoce Jehova na un manera cu lo mi no a siña conoc’e den mi mes pais. Mi ta constantemente ocupa yudando otro hende. Esey a yuda mi crece spiritualmente y duna mi hopi goso y satisfaccion.” Su esposo, Ravil, ta di acuerdo cu esey. El a bisa: “No tin nada mas dushi cu sirbi na un otro pais. E ta un oportunidad pa siña conoce varios cristian di diferente pais y cu tin hopi experencia den siña hende e berdadnan den Bijbel. Mi a siña hopi for di nan.”

 Danki na e rumannan aki cu a haci nan mes disponibel y cu ta cla pa haci mas pa Jehova pa asina e bon noticia di e Reino ser predica den henter e Tera habita. (Mateo 24:14) E testigonan di Jehova cu boluntariamente a bay biba na Bulgaria a mira con Jehova a cumpli cu deseo di nan curason y con el a bendiciona nan.—Salmo 20:1-4.