Yehova ta ferwagt di hende kasá ku nan ta keda fiel na e promesa ku nan a hasi otro dia nan a kasa. Ora el a uni e promé pareha den matrimonio, el a bisa: “Un hòmber . . . lo uni ku su esposa. I nan lo bira ún karni.” Mas despues, Hesus a ripití e palabranan ei i a agregá: “No laga ningun hende separá loke Dios a uni bou di un yugo.” (Génesis 2:24; Mateo 19:3-6) Pues, Yehova i Hesus ta konsiderá  matrimonio un union pa bida largu ku ta terminá solamente ora un di e kasánan muri. (1 Korintionan 7:39) Ya ku matrimonio ta sagrado, nos no mester mira divorsio komo un asuntu di poko importansia. De echo, Yehova ta odia divorsio ku no tin un base bíbliko.—Malakías 2:15, 16.

Segun Beibel, kiko ta un motibu bálido pa divorsiá? Wèl, Yehova ta odia adulterio i fornikashon. (Génesis 39:9; 2 Samuel 11:26, 27; Salmo 51:4) E ta haña fornikashon asina baho ku e ta permití esei komo un motibu pa divorsio. (Na Kapítulo 9, paragraf 7, tin un splikashon di kiko ta fornikashon.) Yehova ta duna e kasá ku a keda fiel e derecho di disidí si e ke keda kasá òf si e ke divorsiá. (Mateo 19:9) Pues, si e disidí di buska divorsio, e no ta hasiendo algu ku Yehova ta odia. Pero un kos sí, ningun miembro di e kongregashon kristian no mester anim’é pa divorsiá. De echo, tin sierto sirkunstansia ku por pone ku e kasá inosente ta disidí di keda serka esun kulpabel, foral si esaki a arepentí di kurason. En todo kaso, ta esun ku tin un base bíbliko pa buska divorsio tin ku disidí kiko e ke hasi, i aseptá e konsekuensianan di su desishon.—Galationan 6:5.

Di otro banda, algun kristian den sierto situashon ekstremo a disidí di separá òf asta divorsiá for di nan kasá, sin ku esaki a kometé fornikashon. Den kasonan asina, Beibel ta stipulá ku esun ku disidí di bai mester “keda sin kasa, òf si no, lag’é hasi bon” ku su kasá. (1 Korintionan 7:11) Un kristian den e situashon ei no ta liber pa buska un otro hende pa kasa kuné. (Mateo 5:32) Laga nos wak algun situashon ekstremo ku algun hende a konsiderá un base pa separashon.

Ora ku un hòmber deliberadamente ta keda sin mantené su famia. Tin esposo no ta perkurá pa e nesesidatnan básiko di nan famia, pero no pasobra nan no por, sino pasobra nan no ke. Komo resultado, e famia ta pasa miseria. Beibel ta bisa: “Si un hende no ta perkurá pa . . . e hendenan di su kas, el a nenga e fe i ta pió ku un persona sin fe.” (1 Timoteo  5:8) Si un hòmber asina nenga di kambia su komportashon, e esposa lo tin ku disidí si un separashon legal lo yud’é protehá su bienestar i e bienestar di su yunan. Klaru ku e ansianonan di kongregashon mester investigá e akusashon akí a fondo, ya ku ora un hende nenga di kuida su famia, esei por ta un motibu pa ekspuls’é.

Maltrato físiko grave. Tin hende ta bira asina agresivo ku nan ta pone salú, i asta bida, di nan kasá na peliger. Si e kasá abusadó ta un kristian, e ansianonan mester investigá e akusashonnan pa wak si nan ta bèrdat, ya ku “atake di rabia” i un kondukta violento ta base pa ekspulshon.—Galationan 5:19-21.

Ora e bienestar spiritual di un kasá ta den peliger grave. Tin kasá ta hasi tur nan posibel pa stroba e otro di sirbi Yehova, òf asta nan ta purba di oblig’é di kibra e leinan di Dios. Den tal kaso, e kasá ku ta den peliger lo por disidí ku e úniko manera pa e “obedesé Dios na promé lugá” ta si e haña un separashon legal.—Echonan 5:29.

Den e situashonnan ekstremo ei ku nos a kaba di konsiderá, ningun hende no mester animá e kasá inosente pa separá ni pa keda ku su kasá. Aunke ansiano i otro ruman maduro por duna apoyo i konseho bíbliko, nan no sa tur detaye di loke ta pasa entre un esposo i esposa. Ta Yehova so sa. Si un esposo òf esposa kristian ta eksagerá e gravedat di su problemanan matrimonial djis pa e por bai laga su kasá, lo e no ta onra Dios ni e institushon matrimonial. Ademas, Yehova sa ta ken ta usando astusia pa logra un separashon, maske kon bon e persona purba di skonde esei. De echo, “tur kos ta sunú i habrí dilanti di wowo di esun na ken nos tin ku duna kuenta i rason.” (Hebreonan 4:13) Pero si ta eksistí un situashon sumamente peligroso i un ruman kristian, komo último rekurso, ta disidí di separá, ningun hende no mester kritik’é. Na final di kuenta, ta “nos tur lo para dilanti di e stul di huisio di Dios.”—Romanonan 14:10-12.