1. Kon Marta tabata sintié, i dikon?

MARTA tabata blo mira e graf di su ruman su dilanti: un kueba seyá ku un piedra. E tabata sinti un tristesa profundo. E no por a kaba di kere ku su ruman stimá Lázaro no t’ei mas. E kuater dianan akí ku a pasa, for di momento ku Lázaro a hala su último rosea, tabata dianan largu di tristesa i di hopi bishita di kondolensia.

2, 3. (a) Kon Marta lo a sintié ora el a mira Hesus? (b) Kiko e palabranan di Marta a revelá?

² I awor, Hesus, e amigu mas stimá di su ruman Lázaro, tabata dilanti di Marta. Probablemente Marta a bira mas tristu ainda ora el a mira Hesus, pasobra e tabata e úniko persona na mundu ku por a salba su ruman. Pero tòg Marta a haña un konsuelo ora el a papia ku Hesus, ei na rant di e pueblito Betania. Despues di un ratu ku e tabata huntu ku Hesus, el a kuminsá sinti su mes bon atrobe. Hesus su mirada kariñoso i su kompashon profundo a anim’é manera semper. El a hasi Marta algun pregunta ku a yud’é konsentrá riba su fe i su speransa den e resurekshon. E kòmbersashon akí a pone Marta ekspresá un di su deklarashonnan di mas importante: “Mi ta kere ku abo ta Kristu, e Yu di Dios, Esun ku mester a bini na mundu.”—Huan 11:27.

³ Manera e palabranan ei ta mustra, Marta tabata un muhé ku un fe remarkabel. E poko ku Beibel ta bisa tokante dje ta siña nos algun lès balioso ku por fortalesé nos fe. Laga nos repasá e promé biaha ku Beibel ta menshoná Marta.

4. Ki relashon Marta ku su famia tabatin ku Hesus?

⁴ Nos tin ku bai bèk lunanan promé na Betania. Lázaro tabata na bida ainda i bon di salú, i e tabata prepará pa risibí e persona di mas importante na su kas: Hesukristu. Lázaro, Marta ku Maria tabata tres ruman grandi ku tabata biba huntu. Algun  eksperto riba tereno di Beibel ta kere ku Marta tabata e ruman mayó, ya ku e tabata sirbi komo anfitrion i tabatin biaha a ser menshoná promé. (Huan 11:5) Nos no sa si un di nan tres a yega di kasa. En todo kaso, nan tabata masha bon amigu di Hesus. Durante Hesus su sirbishi na Hudea, kaminda el a haña hopi oposishon, e tabata keda na nan kas. Sin duda, Hesus tabata masha kontentu ku serka nan e por a haña pas i sosten.

5, 6. (a) Dikon Marta tabata hopi okupá durante Hesus su bishita? (b) Maria a probechá di ki oportunidat unabes Hesus tabata serka nan?

⁵ Marta tabata esun prinsipal ku a krea un ambiente agradabel i hospitalario den kas. E tabata un muhé diligente i trahadó ku tabata konstantemente okupá. Esei tabata e kaso tambe ora Hesus tabatin ku bin bishitá nan. Mesora Marta a plania un komementu tur afó pa su distinguido huéspet, kende kisas lo a bini ku algun amigu tambe. Hospitalidat tabata masha importante den e tempu ei. Ora un huéspet yega, nan a kumind’é ku un sunchi, kita su sandalia, laba su pia i hunta su kabes ku zeta perfumá refreskante. (Lesa Lukas 7:44-47.) Nan tabata hasi tur kos pa e huéspet sinti su mes na kas.

⁶ Marta ku Maria tabatin hopi trabou di hasi relashoná ku Hesus su bishita. Maria, kende tin biaha ta ser konsiderá komo mas sensitivo i pensativo ku Marta, siguramente a yuda su ruman na kuminsamentu ku e preparashonnan. Pero unabes Hesus a yega, kos a kambia. Hesus a probechá di e okashon akí pa siña e hendenan presente e bèrdat, i el a hasié na un manera maestral! Kontrali na e lidernan religioso di su tempu, Hesus a respetá hende muhé, i gustosamente el a siña nan tokante e Reino di Dios, e tema di su predikashon. Maria, entusiasmá pa e oportunidat akí, a kai sinta na pia di Hesus i no a pèrdè ni ún palabra.

7, 8. Dikon Marta a bira asina anshá, i kon el a ekspresá esei finalmente?

⁷ Nos por imaginá kon nèrvioso Marta a kuminsá bira. Ku tur e platonan ku e tabatin pa prepará i tur e otro kosnan di atendé pa su invitadonan, el a bira mas i mas anshá i preokupá. Segun ku e tabata kore bai bini, e tabata mira su ruman muhé sintá einan sin ta yud’é ku nada. Lo no straña nos si el a kunsumí, hala rosea masha grandi i sera su kara kada biaha ku el a kana pasa banda di Maria. E so no por a hasi tur e trabou akí!

⁸ Finalmente, Marta no por a wanta mas, i el a eksplotá. El a interumpí Hesus, bisando: “Señor, bo no ta mira ku mi ruman ta laga mi so atendé tur kos? Bis’é bin yuda mi anto.” (Luk.  10:40) E palabranan ei tabata fuerte. Vários Beibel ta tradusí su pregunta asin’akí: “Señor, no ta importá bo . . . ?” Anto despues ku el a bisa esei, el a pidi Hesus korigí Maria, esta, mand’é bai sigui hasi su trabou.

9, 10. (a) Kon Hesus a kontestá Marta? (b) Dikon nos sa ku no ta menospresiá Hesus a menospresiá tur e esfuerso ku Marta a hasi pa prepará un bankete?

⁹ Hesus su kontesta probablemente a sorprendé Marta, ­meskos ku el a sorprendé hopi hende ku despues a lesa e relato ei den Beibel. Ku un tono kariñoso Hesus a kontest’é: “Marta, Marta, bo ta anshá i preokupá ku hopi kos. Ma poko kos ta nesesario, òf asta ún so. Pa loke ta Maria, el a skohe e mihó parti, i lo no kita esei for di dje.” (Luk. 10:41, 42) Kiko Hesus tabata ke men? Akaso e tabata akusá Marta di ta stima kos material mas ku Dios? Òf el a menospresiá tur e esfuerso ku Marta tabata hasi pa prepará un bon kuminda?

¹⁰ Nò. Hesus por a mira bon kla ku Marta a hasi tur e trabou ei ku amor i bon intenshon. Ademas, Hesus no a haña ku un muestra di hospitalidat ku a enserá hopi kos di kome i di bebe riba su mes tabata algu malu. Mas promé, gustosamente el a disfrutá di “un bankete grandi” ku Mateo a organisá na su kas p’e. (Luk. 5:29) E problema no tabata e komementu ku Marta tabata prepará, sino su prioridatnan. Marta a konsentrá asina tantu riba preparashon di su bankete ku el a pèrdè for di bista loke tabata mas importante. Kiko esei tabata?

11, 12. Kon Hesus a korigí Marta?

¹¹ Hesus, e Yu unigénito di Yehova Dios, tabata den kas di Marta pa siña hende e bèrdat. Nada por tabata mas importante ku esei, ni sikiera e delisioso bankete i e preparashonnan ku Marta a hasi. Hesus sin duda a haña yamer ku Marta tabata pèrdè e oportunidat úniko akí pa fortalesé su fe, pero tòg el a laga Marta mes disidí kiko e ta skohe. * Pero tabata di mas sí pa Marta pidi Hesus obligá Maria pa e tambe pèrdè e oportunidat di siña e bèrdatnan ei.

¹² P’esei Hesus a korigí Marta bondadosamente: El a ripití su nòmber suavemente i pa kalm’é a sigur’é ku no tabatin nodi  di bira “anshá i preokupá ku hopi kos.” Un kuminda simpel di un òf dos plato lo tabata sufisiente, foral si e tabata akompañá pa un bankete spiritual. Pues, di ningun manera Hesus lo no a kita for di Maria “e mihó parti” ku el a skohe, esta, di sinta skuch’é!

13. Kiko nos por siña for di loke Hesus a bisa Marta?

¹³ Loke a pasa na kas di Marta tin lèsnan balioso pa siguidónan di Kristu djawe. Por ehèmpel, nos no mester laga nada stroba nos di satisfasé nos “nesesidat spiritual.” (Mat. 5:3) Klaru ku nos ke imitá Marta su generosidat i su spiritu diligente, pero nos lo no ke bira asina “anshá i preokupá” ku e aspektonan ménos importante di hospitalidat ku nos ta pèrdè lo esensial. E motibu  prinsipal pakiko nos ta asosiá ku nos rumannan no ta pa gosa di e kuminda ku lo sirbi, sino pa kompartí donnan spiritual i pa por tin un interkambio di estímulo. (Lesa Romanonan 1:11, 12.) Un okashon asina por ta masha edifikante asta si nos sirbi e kuminda di mas simpel.

14. Dikon nos por tin sigur ku Marta a aseptá e korekshon di Hesus?

¹⁴ Akaso Marta a aseptá Hesus su konseho bondadoso i a siña for di dje? Aparentemente ku sí, pasobra den e introdukshon di e relato emoshonante tokante Lázaro, apòstel Huan ta rekordá nos: “Awor bon, Hesus tabata stima Marta i su ruman muhé i ­Lázaro.” (Huan 11:5) Esaki tabata vários luna despues di Hesus su bishita na Betania, deskribí anteriormente. Klaru ku Marta no a keda nuá ku Hesus pasobra Hesus a konseh’é. Al kontrario, el a aseptá e korekshon di buena gana. Den esaki tambe Marta a pone un ekselente ehèmpel di fe pa nos, pasobra kua di nos no tin mester di poko korekshon de bes en kuando?

15, 16. (a) Kiko Marta kasi sigur a hasi ora su ruman a bira malu? (b) Dikon Marta ku Maria su speransa a kai na awa?

¹⁵ Ora Lázaro a bira malu, Marta kasi sigur a dediká su mes na kuid’é. El a hasi tur loke e tabata por pa su ruman haña alivio i bira bon. Tòg Lázaro su salú a sigui bai atras. Su ruman muhénan a keda kasi nònstòp na su lado pa kuid’é. Kuantu biaha Marta lo no a wak e kara tur halá di su ruman i kòrda riba e hopi añanan ku nan a pasa huntu, kompartiendo alegria i pena?

¹⁶ Ora Marta ku Maria a mira ku nan no por a hasi nada mas pa Lázaro, nan a manda un mensahe pa Hesus. E tabata prediká na un distansia di dos dia di biahe for di nan. Nan mensahe tabata simpel: “Señor, bo amigu stimá ta malu.” (Huan 11:1, 3) Nan tabata sa ku Hesus a stima nan ruman, i nan tabata konvensí ku lo el a hasi tur su posibel pa yuda su amigu. Pero nan speransa ku Hesus lo a yega promé ku ta muchu lat a kai na awa: Lázaro a muri.

17. Kiko a straña Marta, i kon el a reakshoná ora el a tende ku Hesus tabata yegando nan pueblito?

¹⁷ Marta ku Maria a yora e morto di nan ruman hòmber i a hasi e preparashonnan pa su entiero. Nan a risibí hopi bishita di hende di Betania i alrededor. Pero ainda nan no a tende nada di Hesus. Segun ku dianan tabata pasa, Marta siguramente lo a keda mas i mas strañá pa esei. Por fin, kuater dia despues ku Lázaro a muri, Marta a tende ku Hesus tabata yegando nan pueblito. Ku  e vigor ku semper el a demostrá, asta den e momento difísil akí di su bida, Marta a lanta mesora i a sali bai kontra Hesus sin bisa Maria nada.—Lesa Huan 11:18-20.

18, 19. Marta a ekspresá ki speransa, i dikon su fe tabata remarkabel?

¹⁸ Ora Marta a mira su Maestro, el a ekspresá e pensamentu ku a tormentá e dos ruman muhénan tur e dianan ei: “Señor, si bo tabata akinan, mi ruman lo no a muri.” Pero apesar di tur kos, Marta no a pèrdè fe ni speransa, pasobra el a sigui bisa: “I tòg te ainda mi sa ku tur loke bo pidi Dios, Dios lo duna bo.” Mesora Hesus a bisa algu pa fortalesé su fe: “Bo ruman lo lanta for di morto.”—Huan 11:21-23.

¹⁹ Marta a kere ku Hesus tabata papia tokante e resurekshon den futuro, p’esei el a kontest’é: “Mi sa ku lo e lanta den e resurekshon riba e último dia.” (Huan 11:24) Su fe den e siñansa ei tabata remarkabel. Algun lider religioso hudiu, e saduseonan,  tabata nenga ku lo bai tin un resurekshon, apesar ku e Palabra di Dios ta siña esei bon kla. (Dan. 12:13; Mar. 12:18) Pero Marta tabata sa ku Hesus sí a siña hende tokante e speransa di resurekshon i asta a resusitá vários persona, aunke niun di nan no tabata morto pa asina tantu dia manera Lázaro. Marta naturalmente no tabata sa kiko tabata bai pasa.

20. Kiko nos ta siña for di e palabranan di Hesus i Marta na Huan 11:25-27?

²⁰ Hesus e ora ei a hasi un deklarashon inolvidabel ku ta konfirmá ku Yehova Dios a duna su Yu e outoridat pa den futuro e resusitá hende na un eskala mundial. Hesus di: “Ami ta e resurekshon i e bida.” Anto el a puntra Marta: “Bo ta kere esaki?” Marta e ora ei a kontest’é loke nos a trata na prinsipio di e kapítulo akí. E tabatin fe ku Hesus tabata e Kristu, òf Mesías, ku e tabata e Yu di Yehova Dios i ku e tabata esun ku e profetanan a anunsiá ku lo a bini na mundu.—Huan 5:28, 29; lesa Huan 11:25-27.

21, 22. (a) Kon Hesus a revelá su sintimentu pa hende ku ta yora morto di un ser kerí? (b) Deskribí e resurekshon di Lázaro.

²¹ Yehova Dios ku su Yu Hesukristu ta apresiá hende ku tin fe manera di Marta? Loke Marta a mira tuma lugá poko despues ta kontestá esei klaramente. Marta a kore bai buska su ruman muhé. Despues el a mira kon konmoví Hesus a keda ora el a papia ku Maria i tur e bishitantenan ku tabata kompañ’é. Tambe Marta a mira e lágrimanan di Hesus ora ku el a ekspresá su tristesa profundo pa e doló ku morto ta kousa. Ademas, el a tende Hesus duna òrdu pa kita e piedra ku tabata tapa boka di e graf di su ruman.—Huan 11:28-39.

²² Marta, kende semper tabata masha realístiko, a protestá ku e kurpa mester tabata hole malu pasobra ya Lázaro tabatin kuater dia morto. Hesus a bis’é: “Mi no a bisa bo ku si bo kere lo bo mira e gloria di Dios?” Marta a kere, i en bèrdat el a mira e gloria di Yehova Dios. Na e momento ei mes Yehova a duna su Yu poder pa resusitá Lázaro! Loke a sosodé e ora ei lo mester a keda grabá den Marta su memoria pa restu di su bida: e òrdu ku Hesus a duna, “Lázaro, bin pafó!”; e zonidonan leve for di e kueba segun ku Lázaro a lanta para i, lorá den paña di morto, a kana pokopoko bini pafó; e òrdu ku Hesus a duna pa “lòs e pañanan for di dje i lag’é bai”; i naturalmente, e abraso fuerte di e tres rumannan ku tabata loko di kontentu. (Lesa Huan 11:40-44.) E peso ku tabatin riba Marta su kurason a kita!

23. Kiko Yehova i Hesus ke hasi pa bo, pero kiko abo tin ku hasi?

²³ E relato akí ta mustra ku e resurekshon di e mortonan no  ta djis un ilushon; e ta un siñansa bíbliko ku ta duna konsuelo i ku a keda komprobá pa echonan real. (Yòb 14:14, 15) Yehova i su Yu gusta rekompensá e fe di nan sirbidónan, manera nan a hasi den e kaso di Marta, Maria i Lázaro. Nan tin hopi rekompensa wardá pa bo tambe si bo kultivá un fe fuerte.

24. Kiko ta e último kos ku Beibel ta bisa di Marta?

²⁴ Despues di esaki Beibel ta menshoná Marta un biaha mas so. Tabata un siman promé ku Hesus su morto. Hesus tabata sa ki sufrimentu tabata ward’é, i atrobe el a buska trankilidat den kas di su amigunan na Betania. Djei el a kana e tres kilometernan pa yega Herúsalèm. Na Betania, Hesus ku Lázaro tabata komiendo na kas di Simon e leproso, i einan nos ta haña e último bista di nos personahe: “Marta tabata [esun ku a] sirbi nan.”—Huan 12:2.

25. Dikon ruman muhénan manera Marta ta un bendishon pa kongregashonnan djawe?

²⁵ Ègt un kos pa Marta! E promé biaha ku nos ta lesa di dje den Beibel, e tabata traha, i e último biaha ku ta menshon’é ainda nos ta hañ’é ta traha, hasiendo su bèst pa perkurá pa otro hende. Awe, ruman muhénan manera Marta ta un bendishon pa e kongregashon kristian. Semper tal ruman muhénan generoso i trahadó ta demostrá nan fe den Yehova dor di traha duru p’e i yuda otro hende. Marta a keda demostrá su fe di e manera ei? Muy probablemente ku sí. I ta bon mes, pasobra e fe ei lo a yud’é perseverá apesar di opstákulo ku lo a presentá den su bida despues.

26. Kon Marta su fe a yud’é?

²⁶ Un par di dia despues, Marta a konfrontá e morto teribel di su Maestro stimá, Hesus. E mesun hipókritanan asesino ku a mata Hesus a purba di mata Lázaro tambe, ya ku pa motibu di su resurekshon hopi hende tabata pone fe den Hesus. (Lesa Huan 12:9-11.) I naturalmente morto, ku tempu, a kibra e banchi di kariño ku tabata uni Marta ku su dos rumannan. Nos no sa kon òf ki tempu esei a sosodé, pero nos por tin sigur ku e fe presioso di Marta a yud’é perseverá te na fin di su bida. Ki un bon ehèmpel di fe pa kristiannan djawe!