E 12 apòstelnan a kaba nan gira di predikashon den henter Galilea, i nan tabata kontentu. Nan a konta Hesus “tur loke nan a hasi i loke nan a siña e hendenan.” Ta di komprondé ku nan tabata kansá. Pero nan no tabatin tempu ni pa kome pasobra tabatin un gran kantidat di hende ta bai i bini serka nan. P’esei Hesus a bisa nan: “Ban ku mi, boso so, na un lugá solitario i sosegá un poko.”—Marko 6:30, 31.

Nan a subi un boto, kisas serka di Kapernaum, i kue rumbo pa un lugá solitario ku tabata situá ost di Riu Yordan i pafó di Bètsaida. Sinembargo, hopi hende a mira nan bai i otronan tambe a haña sa ku nan tabata bayendo. Nan tur a kore kantu di kosta i tabata na e lugá promé ku e boto a yega.

Ora Hesus a baha for di e boto i a mira e multitut di hende, el a haña duele di nan, pasobra nan tabata manera karné sin wardadó. P’esei, el a kuminsá “siña nan hopi kos” tokante e Reino. (Marko 6:34) I el a kura “esnan ku tabatin mester di kurashon.” (Lukas 9:11) Ora a kuminsá bira lat, su disipelnan a bis’é: “E lugá akí ta solitario i ta lat kaba; manda e multitut bai, ya nan por bai den e pueblitonan i kumpra algu pa nan kome.”—Mateo 14:15.

Hesus a bisa nan: “Nan no tin nodi di bai; boso duna nan algu di kome.” (Mateo 14:16) Hesus tabata sa kaba kiko e tabata bai hasi. Tòg, pa pone Felipe na prueba, el a puntr’é: “Unda nos por kumpra pan pa e hendenan akí kome?” Felipe tabata e persona korekto pa kontestá e pregunta ei ya ku e tabata biba na Bètsaida, ku tabata keda den bisindario. Pero nan lo no por a kumpra e kantidat di pan ku tabata nesesario. Tabatin alrededor di 5.000 hòmber presente. I si a konta e hende muhénan i e muchanan aserka, e kantidat ei lo por tabata dòbel! Felipe a kontestá: “Ni 200 denario [un denario ta salario di un dia di trabou] na pan no ta yega pa kada un di nan haña un pida chikitu.”—Huan 6:5-7.

Kisas pa mustra ku ta imposibel pa alimentá asina tantu hende, Andres a bisa: “Tin un mucha hòmber chikitu akinan ku tin sinku pan i dos piská chikitu. Ma kon esakinan por yega pa tantu hende asina?”—Huan 6:9.

Tabata lènte, djis promé ku e Pasku Hudiu di aña 32 di promé siglo; e serunan tabata kubrí ku yerba bèrdè. Hesus a manda su disipelnan bisa e hendenan pa sinta riba yerba den grupo di 50 i di 100. El a tuma e sinku pannan i e dos piskánan i a gradisí Dios. Despues, el a kibra e pannan. I el a duna esakinan na su disipelnan huntu ku e piskánan pa nan parti pa e hendenan. Asombrosamente, tur hende a kome te ora nan a keda satisfecho!

Despues, Hesus a bisa su disipelnan: “Rekohé e pidanan ku a sobra, pa nada no bai dispidí.” (Huan 6:12) Anto nan a yena 12 makutu di loke a sobra!