Probablemente bo ta keda masha kontentu ora bo haña bon notisia. I no tin duda: Tin bon notisia pa bo i bo sernan kerí.

E bon notisia akí ta den Beibel, un buki ku e Kreador di universo, Yehova Dios, a laga skirbi hopi tempu pasá. E publikashon akí lo enfoká riba kuater buki di Beibel ku ta kontené bon notisia pa nos tur. E bukinan akí ta karga nòmber di e hòmbernan ku Dios a usa pa skirbi nan: Mateo, Marko, Lukas i Huan.

Hopi hende ta referí na e kuater bukinan akí komo e kuater Evangelionan. Tur kuater ta papia di e evangelio, òf bon notisia, tokante Hesus. Nan ta splika ku Hesus ta esun pa medio di ken Dios lo salba humanidat i ku, komo Rei di Dios su Reino selestial, lo e trese bendishon eterno pa tur hende ku pone fe den dje.—Marko 10:17, 30; 13:13.

Kisas bo ta puntra bo mes dikon Dios a inspirá hende pa skirbi kuater relato tokante Hesus su bida i su siñansanan.

Wèl, e echo ku tin kuater diferente relato di loke Hesus a bisa i hasi ta masha benefisioso. Imaginá bo e siguiente situashon: Kuater hòmber ta para skucha un maestro famoso. Esun dilanti di e maestro tin un ofisina di belasting. Esun na su man drechi ta dòkter. E hòmber na banda robes ta un piskadó i e ta masha será ku e maestro. I e di kuater hòmber, pará un poko mas patras, ta mas yòn ku tur i e ta djis opservá. Tur e kuater hòmbernan akí ta hende onesto i kada un tin un interes òf enfoke diferente. Si kada ún skirbi un relato di e maestro su siñansa- i obranan, muy probablemente nos lo haña kuater relato ku detaye- òf susesonan distinto for di otro. Si nos analisá tur e kuater relatonan akí, nos lo por haña un kuadro kompleto di loke e maestro a bisa i hasi. Pues, nos por benefisiá di e echo ku tin kuater diferente relato tokante e bida di e Gran Maestro, Hesus.

E kobradó di belasting den e ilustrashon ke alkansá hende di antesedente hudiu, p’esei e ta kompilá algun siñansa òf suseso pa por yuda prinsipalmente e hendenan ei. E dòkter ta enfoká riba  e kurashonnan ku e maestro ta efektuá. Pues, tin sierto susesonan ku e kobradó di belasting ta menshoná ku e dòkter no ta papia di dje. I tin algun kos ku e dòkter ta relatá den un otro sekuensia. E amigu será di e maestro ta enfatisá e sintimentu- i kualidatnan di e maestro. E relato di e hòmber mas yòn ta mas breve. No opstante, kada un di e relatonan akí ta eksakto. Esaki ta mustra bon kla dikon e echo ku nos tin kuater relato tokante Hesus su bida ta duna nos un mihó bista di su aktividatnan, su siñansanan i su personalidat.

Hende sa papia di por ehèmpel ‘e Evangelio di Mateo’ òf ‘e Evangelio di Huan.’ Esei no ta inkorekto, pasobra tur ta kontené “bon notisia tokante Hesukristu.” (Marko 1:1) No opstante, tin solamente ún evangelio: e bon notisia tokante Hesus. I esei ta loke e kuater relatonan huntu ta trese padilanti.

Hopi studiante di e Palabra di Dios a yega di kompará i kombiná e susesonan i e detayenan similar ku tin den e bukinan bíbliko Mateo, Marko, Lukas i Huan. Un eskritor sirio, ku tabata yama Tasiano, a purba di hasi esei alrededor di aña 170 despues di Kristu. El a rekonosé ku e kuater bukinan akí tabata eksakto i inspirá, i el a produsí Diatessaron, un kompilashon di e relatonan tokante Hesus su bida i sirbishi riba tera.

E buki akí, titulá Hesus—E Kaminda, e Bèrdat i e Bida, ta hasi algu similar, pero e ta mas eksakto i kompleto. Esei ta posibel pasobra awor nos tin un mihó komprondementu di hopi di Hesus su profesianan i nan kumplimentu i di su ilustrashonnan. E komprondementu akí ta yuda nos mira na un manera mas kla e kosnan ku Hesus a bisa i hasi i den ki sekuensia e kosnan akí a tuma lugá. Deskubrimentunan arkeológiko tambe a yuda klarifiká sierto detayenan i yuda nos mira for di ki ángulo e diferente eskritornan a skirbi nan relato. Klaru ku niun hende no por ta dògmátiko tokante e sekuensia di tur e susesonan. No opstante, e buki akí ta presentá e susesonan na un manera rasonabel i lógiko.

Segun ku bo ta lesa i disfrutá di e buki akí, purba di tene na mente e mensahe prinsipal ku e buki ta trese padilanti pa abo i pa bo sernan kerí. Kòrda ku Hesukristu mes a bisa apòstel Tomas: “Ami ta e kaminda, e bèrdat i e bida. Ningun hende no ta yega serka e Tata si no ta pa medio di mi.”—Huan 14:6.

E buki akí lo yuda bo mira ku Hesus realmente ta “e kaminda.” Ta pa medio di Hesus so nos por aserká Yehova Dios den orashon. Es mas, ta pa medio di Hesus nos por rekonsiliá ku Dios. (Huan 16:23; Romanonan 5:8) Pues, ta pa medio di Hesus so nos por tin un bon relashon ku Dios.

Hesus ta “e bèrdat,” pasobra semper el a papia i biba na armonia ku e bèrdat; ora e tabata riba tera, tabata komo si fuera e tabata e bèrdat en persona. El a kumpli ku hopi profesia. Sí, manera e Skritura ta bisa, nan a bira “sí pa medio di dje.” (2 Korintionan 1:20; Huan 1:14) E profesianan akí ta yuda nos mira e papel importante ku Hesus tin den kumplimentu di e propósito di Dios.—Revelashon 19:10.

Ademas, Hesukristu ta “e bida.” Den ki sentido? Wèl, ta pa medio di e reskate, esta, e sakrifisio di su bida i sanger perfekto, el a hasi posibel pa nos por haña “loke realmente ta bida,” esta, “bida eterno.” (1 Timoteo 6:12, 19; Efesionan 1:7; 1 Huan 1:7) Ademas, Hesus lo ta “bida” pa miónes di hende ku a muri i ku lo haña resurekshon ku e speransa di biba pa semper den Paradeis aki riba tera.—Huan 5:28, 29.

Nos tur mester komprondé i balorá e papel ku Hesus tin den Dios su propósito. Nos ta spera ku lo bo disfrutá segun ku bo ta siña mas tokante Hesus—kende ta “e kaminda, e bèrdat i e bida.”