PREGUNTA 7
Kon Mi Por Dil ku e Preshon pa Hasi Sèks?
KIKO ABO LO HASI?
Imaginá bo e siguiente esena: Heather ku Mike tin dos luna so ku nan ta date otro, pero Heather ta sinti ku e konosé Mike pa hopi tempu kaba. Nan ta manda mensahe pa otro konstantemente, nan ta papia ku otro tin biaha pa oranan largu na telefòn i asta nan ta kaba otro su frase! Pero awor Mike ke bai mas aleu.
Durante e lastu lunanan akí, Mike ku Heather a djis tene man di otro i sunchi otro levemente. Heather no ke bai mas aleu ku esei. Ma e no ke pèrdè Mike tampoko. Niun hende no ta lag’é sintié asina bunita i spesial manera Mike. E ta bisa den su mes: ‘Ademas, ami ku Mike ta stima otro . . .’
Si bo ta sufisiente madurá pa date i bo ta den e mesun situashon ku Heather, kiko abo lo hasi?
PARA KETU I PENSA!
Relashon seksual ta un regalo di Dios pa hende kasá so. Si bo tene relashon seksual promé ku matrimonio, bo ta hasi mal uso di e regalo ei. Esei ta meskos ku usa un paña masha bunita ku bo a haña di regalo pa limpia kas kuné
Si bo ignorá un lei di naturalesa, por ehèmpel e lei di gravedat, lo bo sufri e konsekuensianan. Meskos tambe lo sosodé si bo ignorá un lei moral, manera: “Apstené di fornikashon.”—1 Tesalonisensenan 4:3.
Kiko ta e konsekuensianan di desobedesé e mandamentu ei? Beibel ta bisa: “Esun ku ta praktiká fornikashon ta peka kontra su mes kurpa.” (1 Korintionan 6:18) Kon asina?
Estudionan a saka na kla ku hopi hóben ku a hasi sèks promé ku matrimonio mayoria di biaha a haña nan ku un òf mas di e siguiente konsekuensianan:
-
REMORDIMENTU. Mayoria di e hóbennan ku a hasi sèks promé ku matrimonio ta bisa ku ta duel nan ku nan a hasi esei.
-
DESKONFIANSA. Despues di tene relashon seksual, nan por kuminsá pensa: ‘Ku ken mas lo el a hasi sèks?
-
DESEPSHON. Hopi mucha muhé, di kurason lo preferá un mucha hòmber ku lo protehá nan i no probechá di nan. Anto hopi mucha hòmber ta sinti nan mes ménos atraí na un mucha muhé ku ta kai pa nan muchu lihé.
-
E punto ta: Si bo tene relashon seksual promé ku matrimonio, bo ta rebahá bo mes pasobra bo ta pèrdè algu presioso. (Romanonan 1:24) Bo kurpa ta demasiado balioso pa bo entreg’é na ken ku ta!
Demostrá ku bo ta determiná pa “apstené di fornikashon.” (1 Tesalonisensenan 4:3) Anto, si bo kasa un dia, bo por tene relashon seksual i haña e plaser ku esei ta trese kuné. Lo bo no tin nodi di preokupá, lamentá òf sinti bo insigur, loke hopi hende ta eksperensiá despues ku nan a hasi sèks promé ku matrimonio.—Proverbionan 7:22, 23; 1 Korintionan 7:3.
KIKO BO TA PENSA?
-
Un hende ku di bèrdat ta stima bo lo ke hasi bo un daño físiko i emoshonal?
-
Un hende ku di bèrdat ta interesá den bo lo hinka bo den tentashon pa perhudiká bo relashon ku Dios?—Hebreonan 13:4.
Otro Artíkulo Interesante
LOKE HÓBEN SA PUNTRA
Mi Ta Kla pa Namorashon?
Sinku punto ku lo yuda bo sa si bo ta kla pa namorashon i matrimonio.
BLACHI DI TAREA
Kon pa Splika Bo Punto di Bista Tokante Sèks
Ta yega un momento ku nos tur tin ku splika loke nos ta kere aden. Usa e blachi di tarea akí pa yuda bo splika i defendé bo punto di bista.
