A KUMINSÁ bira mas kayente den e ouditorio ku tabatin 8.000 hende presente riba e djabièrnè mainta di sèptèmber 1922. Durante e seshon importante akí, e presidente a anunsiá ku ken ku tabata ke por a sali pero ningun hende no tabatin mag di drenta bèk.

E programa a kuminsá ku kantamentu durante e asina yamá “Servisio di Alabansa,” i despues Joseph F. Rutherford a subi e plataforma. Mayoria di hende den e ouditorio tabata den suspenso. Algun di nan tabata kana bai bin pa motibu di e kalor. E oradó a urgi nan pa tuma nan asiento i skucha. Ora e diskurso a kuminsá, akaso algun hende a ripará ku tabatin un tela grandi nèchi lorá i kologá riba e plataforma?

Ruman Rutherford a presentá e diskurso “E reino di shelu a yega serka.” Pa mas o ménos un ora i mei, ku su stèm potente e tabata papia tokante kon e profetanan di antigwedat sin miedu a anunsiá e binidero Reino. Na final di su diskurso, Ruman Rutherford a puntra: “Boso ta kere ku e glorioso Rei a kuminsá su reinado?” Tur hende den ouditorio a bisa masha duru: “Sí!”

Ruman Rutherford a bisa: “Anto bolbe n’e vèlt, o boso yunan di e Dios haltísimo! Mira, e Rei ta reina! Boso ta su agentenan di publisidat! P’esei, anunsiá, anunsiá, anunsiá.”

Na e momento ei, e tela grandi ku tabata kologá riba e plataforma a kai habri pokopoko i revelá e palabranan: “Anunsiá e Rei i e Reino.”

Ray Bopp ta kòrda: “E hendenan den e ouditorio tabata entusiasmá.” Anna Gardner a deskribí kon “e spannan di e dak tabata trel pa motibu di e aplouso.” Fred Twarosh a bisa: “Tur hende den ouditorio a lanta para pareu.” Evangelos Scouffas a konta: “Tabata komo si fuera un forsa poderoso a lanta nos for di nos asiento, i nos a lanta para i nos wowonan a yena ku awa.”

Hopi ruman na e kongreso ya tabata plama e bon notisia di Reino. Pero awor nan a sinti nan mas motivá ainda pa sigui prediká e bon notisia. Ethel Bennecoff a konta ku e Studiantenan di Beibel a bai prediká ‘ku mas zelo i amor ku nunka promé.’ Odessa Tuck, kende tabatin 18 aña, a sali e kongreso determiná pa respondé na e yamada “Ken lo bai?” El a bisa: “Mi no tabata sa unda ni kon ni kiko pa prediká. E úniko kos ku mi tabata sa ta ku mi ke tabata meskos ku Isaías, kende a bisa: ‘At’ami aki! Manda ami!’” (Isa. 6:8) Ralph Leffler a bisa: “E dia memorabel ei di bèrdat tabata e komienso di e kampaña pa proklamá e Reino ku awe ta tuma lugá rònt mundu.”

 Sin duda, e kongreso na 1922 na Cedar Point, Ohio, Merka, tabata un logro importante den historia teokrátiko. George Gangas a bisa: “E kongreso ei a lanta den mi un deseo pa nunka mi pèrdè un kongreso.” Te asina leu ku e por kòrda, e no a pèrdè niun. Julia Wilcox a skirbi: “Simplemente mi no por splika kiko mi ta sinti kada bes ku e publikashonnan menshoná loke a pasa na Cedar Point na 1922. Semper mi ke bisa: ‘Danki Yehova pa laga mi ta einan.’”

Siguramente, hopi di nos awe tin grato rekuerdo di un kongreso similar ku a yena nos kurason ku goso, ku a duna nos zelo i a duna nos amor pa nos gran Dios i su Rei. Ora nos reflehá riba momentonan asina, nos tambe ta ser motivá pa bisa: “Danki Yehova, pa laga mi ta einan.”