1, 2. (a) Kiko por pone nos puntra: “Pa kuantu tempu mas?” (b) Kon ehèmpel di e fiel sirbidónan di Dios di antigwedat por animá nos?

“PA KUANTU tempu mas, Señor?” Esei ta loke profeta Isaías a puntra Yehova, i Habakuk tambe a puntra algu similar. (Isa. 6:11; Hab. 1:2) Ora Rei David a skirbi Salmo 13, kuater biaha e tambe a puntra: “Kuantu tempu mas, O SEÑOR?” (Sal. 13:1, 2) Asta nos Señor Hesukristu a hasi e pregunta akí ora el a mira e falta di fe di e hendenan rònt di dje. (Mat. 17:17) Pues nos no mester keda strañá si tin biaha nos tambe ta hasi e mesun pregunta ei.

² Kiko por pone nos puntra: “Pa kuantu tempu mas?” Kisas nos a bira víktima di un inhustisia. Òf nos ta lucha ku edat avansá i malesa òf ku e preshon di bida durante e “tempunan krítiko” akí ku ta “difísil pa trata kuné.” (2 Tim. 3:1) Kisas nos ta sinti nos mes desanimá ora nos mira e mal aktitut di e hendenan rònt di nos. Sea kual sea e kousa, ta un alivio pa sa ku otro fiel sirbidónan di Yehova di antigwedat a sinti nan liber pa hasi e mesun pregunta ei, i Yehova no a skual nan pa esei.

3. Kiko por yuda nos ora nos enfrentá situashonnan difísil?

 ³ Pero kiko por yuda nos ora nos enfrentá situashonnan difísil? Disipel Santiago, mitar ruman di Hesus, a skirbi bou di inspirashon: “P’esei, rumannan, tene pasenshi te na e presensia di Señor.” (Sant. 5:7) Sí, nos tur mester di pasenshi. Pero kiko ta pasenshi, i kon nos por demostrá e kualidat kristian akí?

4, 5. (a) Kiko ta pasenshi i kon nos por demostr’é? (b) Kon disipel Santiago a ilustrá un di e aspektonan di pasenshi? (Wak e promé plachi.)

⁴ Segun Beibel, pasenshi ta un aspekto di e fruta di spiritu, i sin e yudansa di Dios, hende imperfekto no por demostrá sufisiente pasenshi. Pasenshi ta un regalo di Dios, i un manera ku nos por mustra amor pa Dios i pa hende ta ora nos tin pasenshi. Pues, falta di pasenshi ta debilitá nos amor, di otro banda pasenshi ta fortalesé nos amor. (1 Kor. 13:4; Gal. 5:22) Pasenshi ta relashoná ku otro kualidatnan kristian tambe. Por ehèmpel, pasenshi ta estrechamente ligá ku perseveransia, i perseveransia ta yuda nos mantené un aktitut positivo miéntras nos ta dil ku sirkunstansianan difísil. (Kol. 1:11; Sant. 1:3, 4) Pasenshi por yuda tambe pa no tuma vengansa ora hende trata nos malu i pa keda firme i fiel, pase loke pase. Ademas, Beibel ta urgi nos pa ta dispuesto pa aseptá ku nos mester warda. Esaki ta un lès importante ku nos por siña for di Santiago 5:7 i 8. (Les’é.)

⁵ Dikon nos mester ta dispuesto pa aseptá ku nos mester warda riba Yehova pa e tuma akshon? Santiago a kompará nos situashon ku esun di un kunukero. Aunke ku un kunukero ta traha duru pa sembra simia, e no tin kontrol riba e wer òf kon lihé e matanan ta krese, ni e no por laga tempu pasa mas lihé. E ta aseptá ku e tin ku warda ku pasenshi riba “e fruta presioso di e tera.” Den mesun sentido, tin hopi faktor fuera di nos kontrol segun ku nos ta warda pa e promesanan di Yehova kumpli. (Mar. 13:32, 33; Echo. 1:7) Meskos ku e kunukero, nos tin ku warda ku pasenshi.

6. Kiko nos por siña for di e ehèmpel di profeta Mikéas?

⁶ E situashonnan ku nos ta enfrentá awe ta di kompará ku esnan di den tempu di profeta Mikéas. El a biba durante e reinado di e rei malbado Akas, kaminda tur tipo di maldat tabata tuma lugá. De echo, e pueblo a bira ‘eksperto den hasi malu.’ (Lesa Mikéas 7:1-3.) Mikéas a realisá ku e no por a kambia e situashon. Pues, kiko e por a hasi? El a bisa: “Pa loke t’ami, lo mi warda ku speransa riba SEÑOR; lo mi spera riba e Dios di mi salbashon. Mi Dios lo tende mi.” (Mik. 7:7) Meskos ku Mikéas, nos tambe mester ‘spera riba Dios.’

7. Dikon nos mester warda di buena gana riba Yehova pa e kumpli ku su promesanan?

⁷ Si nos tin fe manera Mikéas, di buena gana nos lo warda riba Yehova. Nos situashon no ta manera esun di un prizonero ku ta warda den su sèl pa su ehekushon. E ta hañ’é fòrsá ta warda, i e no ta kontentu ku loke ta sper’é. Ki diferente nos situashon ta! Nos ta dispuesto pa warda riba Yehova pasobra nos sa ku lo e kumpli ku su promesa pa duna nos bida eterno na su debido tempu! Pues nos ta “soportá tur kos ku pasenshi i goso.” (Kol. 1:11, 12) Nos lo ofendé Dios si nos ta warda ku mala gana i keha ku e ta tarda muchu pa kumpli ku su promesanan.—Kol. 3:12.

8. Kiko nos mester tene na mente segun ku nos ta meditá riba ehèmpel di fiel sirbidónan di antigwedat?

⁸ Nos lo ta mas dispuesto pa warda si nos pensa riba fiel sirbidónan di antigwedat ku a warda ku pasenshi pa Yehova kumpli ku su promesanan. (Rom. 15:4) Segun ku nos ta meditá riba nan ehèmpel, ta bon pa nos tene na mente kuantu tempu nan a warda, dikon nan tabata dispuesto pa warda i ki bendishon nan a haña komo resultado di nan pasenshi.

9, 10. Kuantu tempu Abraham ku Sara mester a warda riba Yehova?

⁹ Laga nos analisá e ehèmpel di Abraham ku Sara. Nan ta entre esnan ku “pa medio di fe i pasenshi ta risibí loke Dios a primintí.” E Skritura ta bisa nos ku “despues ku Abraham a warda ku pasenshi, el a haña e promesa” ku Yehova lo bendishon’é i hasié un nashon grandi. (Heb. 6:12, 15) Dikon Abraham mester tabatin pasenshi? Simplemente bisá, lo a tuma tempu pa Yehova su promesa kumpli. E pakto ku Yehova a sera ku Abraham a drenta na vigor riba 14 di nisan 1943 promé ku Kristu, ora Abraham ku Sara i nan famia a krusa Riu Eufrates pa drenta e Tera Primintí. Despues, Abraham mester a warda 25 aña promé ku su yu Isak a nase na 1918 promé ku Kristu, i e mester a bolbe warda 60 aña mas promé ku su ñetunan Esou ku Yakòb a nase na 1858 promé ku Kristu.—Heb. 11:9.

¹⁰ Abraham a heredá un parti di e Tera Primintí? Beibel ta bisa nos: “[Yehova] no a dun’é [Abraham] ningun herensia den e tera akí, ni sikiera un pida tereno pa e pone su pia ariba. Ma Dios a primintié sí ku un dia lo e duna tantu é komo su desendientenan henter e tera akí komo  propiedat, aunke ora el a bis’é esei Abraham no tabatin yu ainda.” (Echo. 7:5) Ta te despues di 430 aña ku Abraham a krusa Riu Eufrates, su desendientenan a bira un nashon ku a poseé e tera ei i biba den dje.—Éks. 12:40-42; Gal. 3:17.

11. Dikon Abraham tabata dispuesto pa warda riba Yehova, i ki bendishonnan lo e haña pa su pasenshi?

¹¹ Abraham tabata dispuesto pa warda, pasobra su pasenshi tabata basá riba su fe den Yehova. (Lesa Hebreonan 11:8-12.) Abraham tabata kontentu pa warda aunke ku e no a mira e promesanan kumpli kompletamente den su tempu. Pero djis imaginá kon felis lo e ta ora e resusitá den Paradeis. Lo e keda sorprendí ora e haña sa tur loke Beibel ta bisa di dje i di su desendientenan. * Imaginá bo kon kontentu lo e ta ora ku pa promé biaha e komprondé ki papel importante el a hunga den e kumplimentu di e propósito di Yehova relashoná ku e simia primintí. Sin duda, lo e pensa ku tabata bale la pena pa warda riba e bendishonnan ei.

12, 13. Dikon Yosef mester tabatin pasenshi, i ki bon aktitut e tabatin?

¹² Yosef, e bisañetu di Abraham, tambe a demostrá ku e tabata dispuesto pa tene pasenshi. E tabata víktima di algun inhustisia teribel. Promé, su ruman hòmbernan a bend’é komo katibu tempu ku e tabatin mas o ménos 17 aña di edat. Despues, e egipsionan a akus’é falsamente di a purba di violá e kasá di su doño, nan a bui e i a enkarsel’é. (Gén. 39:11-20; Sal. 105:17, 18) Aunke ku Yosef tabata un hòmber hustu, ta parse ku ta kastigu so e tabata haña en bes di bendishon. Pero despues di 13 aña, tur kos a kambia mashá lihé. E egipsionan a sak’é for di prizòn i hasié e di dos hòmber di mas poderoso na Egipto.—Gén. 41:14, 37-43; Echo. 7:9, 10.

¹³ Yosef a bira amargá pa motibu di tur e inhustisianan ku el a pasa aden? El a pèrdè konfiansa den su Dios, Yehova? Nò. Kiko a yuda Yosef warda ku pasenshi? Tabata su fe den Yehova. El a mira Yehova su man den e asuntu. Nos ta mira esaki den loke el a bisa su ruman hòmbernan: “No tene miedu; t’ami ta na lugá di Dios anto? I pa loke ta boso, boso a plania maldat kontra mi, ma Dios a plani’é pa bon, pa laga tur kos sosodé manera a resultá awe, pa preservá bida di hopi hende.” (Gén. 50:19, 20) Al final, Yosef a realisá ku tabata bale la pena pa warda.

14, 15. (a) Kiko ta remarkabel di e pasenshi di David? (b) Kiko a yuda David warda ku pasenshi?

¹⁴ Rei David tambe tabata un víktima di hopi inhustisia. Aunke ku Yehova a skoh’é na un edat yòn pa bira futuro rei di Israel, e mester a warda mas o ménos 15 aña promé ku e por a bira rei di su mes tribu. (2 Sam. 2:3, 4) Durante e periodo akí, Rei Saul tabata infiel na Yehova, i e tabata buska David pa mata. * Komo resultado, David mester a hiba un bida komo fugitivo. Tin biaha e mester a bai otro pais, i na otro okashon el a skonde den kueba den desierto. Asta ora Saul a muri den bataya, ainda David mester a warda shete aña mas promé ku el a bira rei di henter e nashon di Israel.—2 Sam. 5:4, 5.

 ¹⁵ Dikon David tabata dispuesto pa warda ku pasenshi? E ta duna nos e kontesta den e mesun salmo kaminda kuater biaha el a puntra Yehova: “Kuantu tempu mas?” E ta sigui bisa: “Mi a konfia den bo miserikòrdia; mi kurason lo regosihá den bo salbashon. Lo mi kanta na SEÑOR, pasobra e tabata masha bon mes pa mi.” (Sal. 13:5, 6) David a konfia den e miserikòrdia, òf amor leal, di Yehova. David a kòrda kon bon Yehova a yud’é den pasado i a warda ku goso pa Yehova kaba ku su problemanan. Sí, David tabata sa ku ta bale la pena pa warda riba Yehova.

16, 17. Kon Yehova Dios i Hesukristu a demostrá ku nan tabata dispuesto pa warda?

¹⁶ Ora Yehova ta pidi nos pa tene pasenshi, e no ta ferwagt pa nos hasi algu ku e mes no ta dispuesto pa hasi. El a pone e mihó ehèmpel den ser dispuesto pa warda. (Lesa 2 Pedro 3:9.) Pa míles di aña kaba, Yehova ta wardando ku pasenshi pa asina resolvé unabes i pa semper e kuestion ku a lanta den e Hòfi di Edén. Yehova ta warda ku pasenshi pa su nòmber ser santifiká kompletamente. Nos no por ni imaginá kuantu bendishon esaki lo trese pa hende ku ta “spera” ansiosamente riba dje.—Isa.30:18.

¹⁷ Hesus tambe tabata dispuesto pa warda. Tempu e tabata riba tera, el a mantené su integridat te na morto i a presentá e balor di su reskate na aña 33 di nos tempu. Pero e mester a warda te 1914 pa e por a kuminsá su reinado. (Echo. 2:33-35; Heb. 10:12, 13) I ta te na final di Hesus su Reinado di Mil Aña tur su enemigunan lo ser destruí. (1 Kor. 15:25) Esei ta un tempu largu pa warda, pero nos por tin sigur ku lo ta bale la pena.

18, 19. Kiko lo yuda nos warda ku pasenshi riba Yehova?

¹⁸ Sin duda, nos tur mester ta dispuesto pa warda ku pasenshi. Pero kiko lo yuda nos hasi esaki? Nos mester pidi Dios pa duna nos spiritu santu. Tene na mente ku pasenshi ta un aspekto di e fruta di spiritu. (Efe. 3:16; 6:18; 1 Tes. 5:17-19) Roga Yehova pa e yuda bo perseverá ku pasenshi.

¹⁹ Kòrda tambe kiko a yuda Abraham, Yosef i David warda ku pasenshi riba kumplimentu di Yehova su promesanan: nan fe den Yehova i nan konfiansa den e manera ku el a trata ku nan. Nan no a pensa solamente riba nan mes i loke a kumbiní nan. Ora nos analisá e bendishonnan ku nan a haña, nos tambe lo ta animá pa sigui warda riba Yehova.

20. Nos mester ta determiná pa hasi kiko?

²⁰ Pues, aunke ku nos ta enfrentá prueba, nos ta determiná pa mustra ku nos ta spera riba Yehova. Sí, tin bes nos ta puntra: “Pa kuantu tempu mas, Señor?” (Isa. 6:11) Pero ku yudansa di e spiritu santu di Dios, kada un di nos ta determiná pa ripití e palabranan di Yeremías: “SEÑOR ta mi porshon, p’esei ta den dje mi ta spera.”—Lam. 3:21, 24.