1. Maske Yehova ta e Dios Supremo, kiko el a invitá otro personanan pa hasi?

YEHOVA ta e Dios Supremo, Kreador di tur kos, e Ser mas sabí i poderoso di henter universo. Yòb a komprondé esaki. Despues ku Yehova a hasié algun pregunta tokante kreashon, Yòb a kontestá: “Mi sa ku bo por hasi tur kos, i ku ningun di bo propósitonan no por wòrdu strobá.” (Yòb 42:2) Pues, Yehova por hasi kiko ku e disidí di hasi, sin tin mester di niun yudansa. Tòg, for di kuminsamentu el a invitá otro personanan pa traha huntu kuné pa kumpli ku su propósito.

2. Ki trabou importante Yehova a duna Hesus pa hasi?

² E promé kreashon di Dios tabata su Yu, Hesus. Yehova a permití su Yu yud’é krea tur otro kos, tantu kos material komo spiritual. (Huan 1:1-3, 18) Apòstel Pablo a skirbi lo siguiente tokante Hesus: “Pa medio di dje tur otro kos a ser kreá, tantu den shelu komo riba tera, kosnan visibel i kosnan invisibel, sea ku nan ta trono, dominio, gobièrnu òf outoridat. Tur otro kos a ser kreá pa medio di dje i p’e.” (Kol. 1:15-17) Pues,  Yehova no solamente a laga su Yu kolaborá kuné den e tremendo trabou di kreashon, pero tambe el a konta tur hende tokante e papel importante di su Yu. Ki un gran onor!

3. Ki tarea Yehova a duna Adam, i dikon?

³ Yehova a invitá hende tambe pa traha huntu kuné. Por ehèmpel, el a duna Adam e tarea di duna bestia nòmber. (Gén. 2:19, 20) Sin duda, pa Adam tabata un plaser p’e studia e komportashon i karakterístikanan di e bestianan, i despues disidí ki nòmber ta pas pa kada un di nan. Yehova mes por a duna e bestianan nòmber; t’e a krea nan. Pero debí na e amor ku e tabatin pa Adam, el a lag’é hasi esaki. Tambe el a duna Adam e tarea di ekstendé e Paradeis riba henter e tera. (Gén. 1:27, 28) Lamentablemente, Adam a disidí di stòp di kolaborá ku Yehova, i e resultado tabata un desaster, tantu pa Adam komo pa su desendientenan.—Gén. 3:17-19, 23.

4. Kon vários hende a traha huntu ku Dios pa kumpli ku su boluntat?

⁴ Tabatin mas hende ku Yehova a invitá pa traha huntu kuné: Noe a traha un arka p’e ku su famia por a sobrebibí e Diluvio. Moises a libra e nashon di Israel for di Egipto. Hosue a hiba e nashon ei den e Tera Primintí. Sálomon a traha e tèmpel na Herúsalèm. Maria a bira e mama di Hesus. Yehova a usa tur e hendenan fiel akí—i hopi mas—pa kolaborá kuné i kumpli ku su boluntat.

5. (a) Den ki trabou nos tur por partisipá? (b) Yehova tin mester di nos yudansa? (Wak e promé plachi.)

⁵ Awe, Yehova ta invitá nos pa hasi tur nos esfuerso pa apoyá e Reino Mesiániko, i tin vários manera pa hasi esei. Kisas nos no por partisipá den tur e formanan di sirbishi sagrado, pero nos tur por prediká e bon notisia di Reino. Klaru ku Yehova no tin mester di nos pa hasi e trabou ei. Lo e por a papia ku hende direktamente for di shelu. Hesus a bisa ku Yehova por a laga asta e piedranan papia tokante e Rei Mesiániko. (Luk. 19:37-40) Tòg e ta permití nos pa ta su “kompañero di trabou.” (1 Kor. 3:9) Apòstel Pablo a skirbi: “Kolaborando huntu ku Dios, nos ta supliká boso pa no aseptá Dios su bondat inmeresí i keda sin kumpli ku su propósito.” (2 Kor. 6:1) Nos no meresé e onor di traha huntu ku Dios, ma nos ta masha felis ku el a duna nos e invitashon ei. Laga nos wak dikon.

6. Kon e promé Yu di Dios a sintié trahando huntu ku su Tata?

⁶ Yehova su sirbidónan semper a sinti nan masha felis di por traha huntu kuné. Un di nan ta Hesus, e promé Yu di Dios. Segun Beibel, el a bisa promé ku el a bini na tera: “SEÑOR a krea mi na prinsipio di su kaminda . . . Mi tabata na su lado, manera un trahadó eksperto, i dia tras dia mi tabata su delisia, regosihando semper su dilanti.” (Pro. 8:22, 30) Hesus tabata masha kontentu di por a traha huntu ku su Tata, i e tabata felis ku e resultadonan di su trabou i di sa ku Yehova stim’é. Kiko di nos?

7. Dikon nos ta sinti nos felis ora nos ta prediká?

⁷ Hesus a bisa ku nos lo ta felis tantu ora nos ta duna komo ora nos ta risibí algu. (Echo. 20:35) Por ehèmpel, nos a keda masha kontentu ora nos a haña e bèrdat, i awor nos ta sinti un goso ora nos ta kompartié ku otro hende. Dikon? Pasobra nos ta mira kon felis e hendenan ku ta deseá di konosé Dios ta bira ora  nan kuminsá komprondé i apresiá nos Dios i e bèrdatnan balioso ku tin den su Palabra. Ta emoshonante pa mira nan hasi kambio, no solamente den nan manera di pensa sino tambe den nan manera di biba. Nos ta mira bon kla kon importante e trabou di prediká ta, ya ku e ta duna hende e oportunidat di rekonsiliá ku Dios i haña bida eterno. (2 Kor. 5:20) Akaso tin un trabou ku por duna nos mas satisfakshon i felisidat ku esun di yuda hende haña e bèrdat ku ta hiba na bida eterno?

8. Kiko algun ruman a bisa tokante e goso di por traha ku Yehova?

⁸ Aunke nos ta keda kontentu ora hende reakshoná bon riba e mensahe ku nos ta prediká, nos ta sinti nos mas felis ainda di sa ku nos ta hasiendo e boluntat di Yehova i ku e ta apresiá nos esfuerso pa sirbié. (Lesa 1 Korintionan 15:58.) Marco, di Italia, a bisa: “Mi no por splika kon felis mi ta sinti mi di por duna lo mihó di mi na Yehova i no na un hende ku ta lubidá masha lihé kiko m’a hasi p’e.” Franco, ku tambe ta sirbi na Italia, a bisa: “Tur dia Yehova ta usa su Palabra, e publikashonnan i reunionnan kristian pa kòrda nos ku e stima nos. Aunke kisas nos ta pensa ku loke nos ta hasi ta tiki, nos esfuersonan ta masha importante p’e. Ta p’esei mi ta sinti mi masha felis di por traha huntu ku Dios; e ta duna mi bida un propósito.”

9. (a) Kon e relashon entre Yehova i Hesus ta? (b) Kon nan a yega na un relashon asina?

⁹ Ora nos ta traha huntu ku un hende ku nos ta stima, nos amistat kuné ta bira mas será. Nos ta siña konosé su personalidat i su kualidatnan. Nos ta haña sa kiko ta su metanan i kon e ta purba di alkansá nan. Esei ta loke a pasa entre Yehova ku Hesus. Nan a traha huntu pa míles di miónes di aña, i nan a forma un relashon di kariño asina fuerte ku nada no por kibr’é. Nan amistat ta asina será ku na un okashon Hesus a bisa: “Ami ku e Tata ta ún.” (Huan 10:30) Nan a disfrutá di un union maravioso i a traha huntu den pleno armonia.

10. Dikon nos ta bisa ku e trabou di prediká ta hasi nos amistat ku Yehova i ku nos rumannan mas será?

¹⁰ Hesus a pidi Yehova pa protehá su disipelnan. Dikon? Den orashon el a bisa: “Pa nan por ta ún meskos ku nos ta ún.” (Huan 17:11) Ora nos ta biba segun e normanan di Dios i ta partisipá den e trabou di prediká, nos ta siña konosé su kualidatnan maravioso mas mihó. Nos ta siña dikon ta sabí pa konfia Yehova i sigui su guia. Mas nos hala serka Dios, mas é ta hala serka nos. (Lesa Santiago 4:8.) Nos ta sera mas ku nos rumannan tambe ora nos ta obedesé Dios i prediká. Nos tur tin e mesun problemanan, e mesun motibunan pa alegrá i e mesun metanan.  Pues, nos ta traha huntu, alegrá huntu i perseverá huntu. Octavia, kende ta biba na Inglatera, a bisa: “E echo ku mi por traha huntu ku Yehova ta laga mi sera mas ku mi rumannan. No ta kosnan superfisial ta uni nos. Mi amigunan tin e mesun metanan ku mi i ta usa nan bida pa sirbi Yehova.” Siguramente, nos tambe ta sinti asina. Nos ta haña mas apresio pa nos rumannan ora nos mira kon nan ta hasi esfuerso pa agradá Yehova.

11. Dikon nos amistat ku Yehova i ku nos rumannan lo bira mas será ainda den e mundu nobo?

¹¹ For di awor nos tin un amistat será ku Yehova i ku nos rumannan, pero den e mundu nobo nos lo ta muchu mas será ku otro. Pensa riba tur e trabou ku nos lo tin ku hasi den futuro! Mester duna bonbiní na hende ku resusitá i siña nan obedesé e leinan di Yehova. Mester transformá e tera den un paradeis. Tur esei lo ta hopi trabou. Pero ki dushi lo ta pa traha huntu ku nos rumannan i gradualmente bira perfekto bou di e gobernashon di e Reino Mesiániko! Tur hende lo ta mas uní ku otro i ku Yehova, kende siguramente lo “satisfasé e deseo di tur ser bibu.”—Sal. 145:16.

12. Kon e trabou di prediká ta protehá nos?

¹² Komo kristian, nos mester protehá nos relashon ku Yehova. Nos ta imperfekto i ta biba den un mundu kontrolá pa Satanas e Diabel, pues ta fásil pa e manera di pensa i di komportá di mundu influensiá nos. Nos por kompará e spiritu di mundu ku e koriente fuerte di laman. Pa e koriente no lastra nos bai kuné, nos tin ku landa ku tur nos forsa kontra dje. Di e mesun manera nos tin ku lucha pa e spiritu di e mundu di Satanas no lastra nos bai kuné i destruí nos relashon ku Dios. Pues, kon e trabou di prediká ta protehá nos? Wèl, ora nos ta papia tokante Yehova i Su Palabra, nos ta konsentrá riba e kosnan importante ku ta benefisiá nos, no riba kos ku lo debilitá nos fe. (Flp. 4:8) Ora nos ta prediká, nos ta repasá e promesa- i normanan di Dios, i esaki ta fortalesé nos fe. Tambe esei ta yuda nos mantené e kualidatnan ku nos tin mester pa protehá nos mes kontra Satanas i su mundu.—Lesa Efesionan 6:14-17.

13. Kon e trabou di prediká a yuda un ruman di Australia?

¹³ Ora nos ta tene nos mes okupá ku e trabou di prediká i ku otro aktividatnan spiritual, nos no tin tempu pa preokupá muchu ku nos mes problemanan, i esei tambe ta un protekshon. Joel, kende ta biba na Australia, a bisa ku e trabou di prediká ta yud’é pa e no pèrdè for di bista kuantu problema hende tin awe, miéntras ku e sí a skapa di hopi doló di kabes pasobra e ta sigui e konsehonan di Beibel den su bida. El a bisa: “E trabou di prediká ta yuda mi keda humilde; e ta duna mi e oportunidat di konfia den Yehova i den mi rumannan.”

14. Dikon e echo ku nos ta perseverá den e trabou di prediká ta un prueba ku Yehova ta apoyá nos?

¹⁴ Tambe e trabou di prediká ta konvensé nos ku Yehova ta apoyá nos ku su spiritu santu. Un ehèmpel: Imaginá bo ku bo a haña un trabou di parti pan den bo bario. Nan ta bisa bo ku nan lo no paga bo pa hasi esaki ni kubri bo gastunan. Pió ainda, bo ta ripará ku mayoria di hende no ke e pan ku bo ta parti i ku algun tin asta rabia riba bo pasobra bo ta kana partié. Lo bo sigui hasi un trabou asina? Kasi sigur e manera ku e  hendenan ta reakshoná lo desanimá bo, i lo bo stòp. Algu similar ta pasa ku e trabou di prediká. Pero e diferensia ta ku hopi di nos a sigui prediká aña aden aña afó, kubriendo tur gastu for di nos mes saku i soportando e bofon i despresio di hende malagradesí. E echo ku nos ta perseverá ta un prueba ku ta Yehova su spiritu santu ta yuda nos.

15. Kiko e trabou di prediká e bon notisia tin di haber ku e propósito di Dios pa humanidat?

¹⁵ Pensa un ratu riba e papel ku e trabou di prediká ta hunga den Yehova su propósito pa humanidat. Su propósito tabata pa hende biba pa semper riba tera, i esei no a kambia ora ku Adam a peka. (Isa. 55:11) En bes di legumai hende, Yehova a hasi tur loke tabata nesesario pa libra nos for di e kondena di piká i morto. Hesus a kolaborá ku e propósito ei i a bini na tera pa sakrifiká su bida pa hende. Pero pa benefisiá di su sakrifisio, hende mester obedesé Dios, i pa nan por hasi esei nan mester sa kiko su leinan ta. Hesus a siña hende kiko eseinan ta i a manda su disipelnan pa nan tambe bai siña hende. Pues, ora nos ta prediká i ta yuda hende bira amigu di Dios, nos ta kolaborá direktamente ku Dios pa reskatá hende for di piká i morto.

16. Ki relashon tin entre nos trabou di prediká i e dos mandamentunan di mas grandi?

¹⁶ Ora nos ta yuda hende haña e kaminda ku ta hiba na bida eterno, nos ta demostrá nos amor pa nan i pa Yehova, “kende su boluntat ta pa tur sorto di hende ser salbá i yega na un konosementu eksakto di e bèrdat.” (1 Tim. 2:4) Un biaha un fariseo a puntra Hesus kua ta e mandamentu di mas grandi ku Dios a duna e nashon di Israel. Hesus a kontest’é: “‘Stima Yehova bo Dios ku henter bo kurason, ku henter bo alma i ku henter bo mente.’ Esaki ta e mandamentu di mas grandi i esun di promé. E di dos, igual kuné, ta esaki: ‘Stima bo próhimo meskos ku bo mes.’” (Mat. 22:37-39) Ora nos ta prediká, nos ta kumpli ku e dos mandamentunan ei.—Lesa Echonan 10:42.

17. Kiko bo ta pensa di e privilegio ku bo tin di prediká e bon notisia?

¹⁷ Yehova a duna nos un trabou ku ta hasi nos felis, ku ta hala nos mas serka dje i serka nos rumannan i ku ta protehá nos relashon kuné. Ademas, e trabou di prediká ei ta duna nos e oportunidat di demostrá nos amor pa Dios i pa otro hende. Ki un gran bendishon! Yehova tin miónes di sirbidó rònt mundu, i kada un di nan tin nan propio sirkunstansianan. Pero sea ku nos ta hóben òf di edat, riku òf pober, fuerte òf débil, nos tur ta buska maneranan pa papia di nos fe ku otro hende. Sin duda, nos ta di akuerdo ku Chantal di Fransia, kende a bisa: “E Persona di mas poderoso den universo, e Kreador di tur kos, e Dios felis, ta bisa mi: ‘Bai! Papia! Papia pa mi, papia di kurason. Ami lo duna bo forsa. Tambe lo mi duna bo mi Palabra, yudansa di e angelnan, rumannan pa kompañá bo, entrenamentu progresivo i instrukshon spesífiko na e debido tempu.’ Esta un gran privilegio di por hasi loke Yehova ta pidi nos i di traha huntu ku nos Dios!”