E Mundu Aki Su Bida Anshá

E RITMO DI BIDA SA LAGA BO SINTI APLASTÁ TIN BIAHA? E TA LAGA BO KEDA FRUSTRÁ, CANSÁ, I CU APÉNAS BO POR MANEH’É CU ÉXITO? SI TA ASINA, BO NO TA BO SO.

MIYONES di hende, foral den stad, ta haña cu bida a bira un anshamentu confuso i agotador. Foral den paisnan occidental esaki ta e caso. Na Merca, na un reciente reunion religioso, un orador a pidi su auditorio pa hisa man si nan ta sinti nan cansá gran parti di tempu. Mesora, un gran cantidad di man a bai laira.

E buki Why Am I So Tired? (Di Con Mi Ta Asina Cansá?) ta bisa: “Bida moderno ta yen di tension cu ántes hende no a tende di dje—mester coge avion, mester ta cla promé cu e ‘deadline,’ mester hiba i busca yu na tempu for di krèsh—e lista no tin fin.” No ta un sorpresa anto cu hende a describí cansancio como e pesadia di nos tempu. *

Den pasado, bida tabata mas simpel, i e ritmo di bida tabata mas lento. Hende tabata incliná na biba mas na armonia cu e ciclonan di naturalesa: di dia tabata pa trabou, i anochi tabata pa bo famia i pa drumi. Awe, tin vários motibu pakico hende ta sinti nan mas i mas cansá i agotá.

Di Ripiente, Dianan Mas Largu

Un factor por ta cu hende ta drumi ménos. I un dje desaroyonan mas significante cu a horta e tempu di drumi tabata yegada di lus eléctrico. Djis bira un switch, i hende por a controlá e largura di “dia,” i no a tarda hopi cu hende a cuminsá bai drumi mas lat. De echo, hopi hende no tabatin otro opcion den esei, pasobra fábricanan a cuminsá drei 24 ora pa dia i industrianan di duna servicio a rek nan oranan. Un escritor a bisa: “E sociedad di binticuater ora a nace.”

Otro avancenan tecnológico, manera radio, television i computer personal, tambe a hunga un rol den horta soño necesario for di hende. Den hopi pais, ta pasa programanan di television 24 ora pa dia. Hopi biaha amantenan di película of fanáticonan di deporte ta yega trabou mainta yen di soño i cansá despues di a wak  television pa casi henter anochi. Computernan di cas—i e sinfin di distraicion cu nan ta ofrecé—tambe ta persuadí miyones di hende pa keda lantá te lat. Claro cu e productonan aki riba nan mes no tin falta; no obstante, nan ta duna algun hende mas motibu pa ignorá nan necesidad di sosiegu.

Bida Ta Bira Mas Purá

Nos dianan no solamente a bira mas largu sino ta parce manera cos cu bida mes ta move mas lihé; i un biaha mas, facilitá dor di tecnologia. E garoshi halá pa cabai di ménos cu un siglo pasá ta masha distinto for dje autonan velos, treinnan super rápido i avionnan djet djawendia. De echo, un comerciante moderno, kende su tawela probablemente a sea cana bai trabou of a core cabai of baiskel, por come almuerso na un banda di océano Atlántico i cena n’e otro banda!

Oficinanan tambe a experenciá un revolucion silencioso na interes di velocidad i productividad. Type mashin i post convencional a traha lugá pa computer, fax mashin i E-mail. Computernan ‘notebook,’ telefon celular i ‘pager,’ a asta pone cu no tin un distincion cla entre cas i oficina.

Claro cu niun di nos no por baha e ritmo di mundu cu cada bes ta bira mas purá. Sin embargo, riba un base personal, nos por haci ahustenan cu ta permití nos hiba un bida mas trankil i balansá. Pero promé cu nos considerá esei, laga nos examiná algun dje efectonan cu e ritmo anshá di bida djawendia por tin riba nos personalmente i riba sociedad en general.

[Nota]