Skucha i Siña

“NOS a siña 85 porshento di loke nos sa dor di skucha,” segun un informe den e korant Toronto Star. Maske nos ta pasa gran parti di nos tempu skuchando, nos atenshon ta kita, nos ta okupá ku otro kos, òf nos ta lubidá 75 porshento di loke nos a tende. E sifranan interesante aki ta enfatisá kon importante ta pa nos desaroyá nos abilidat di skucha.

Segun e informe, “mal kustumber di skucha ta e rais di hopi problema den komunidat.” Rebecca Shafir, eksperto den komunikashon i spesialista den enfermedat di abla, ta kere ku hopi bes suisidio, violensia na skol, famia kibrá i uso di droga tin di haber ku mal kustumber di skucha.

Sosiólogonan ta bisa ku hende tin diferente estilo di skucha. Tin hende ku ta gusta tende tokante hende i nan ta interesá den delaster un detaye di un historia, miéntras ku otronan ta interesá den e suseso i kier mas bien pa esun na palabra yega na e punto prinsipal pa kaba. “Pues, ora dos hende ku e dos estilonan di komuniká distinto ei ta kòmbersá, por sosodé ku nan no ta komuniká manera mester ta,” segun Toronto Star.

Hesus tabatin bon motibu pa enfatisá ku nos mester ‘pone bon atenshon kon nos ta skucha.’ (Lukas 8:⁠18) Skucha ku atenshon ta un señal di bon manera. E ta un parti esensial di un bon kòmbersashon. Algun sugerensia práktiko pa nos por skucha mihó durante un kòmbersashon ta di ignorá kos ku ta kita bo atenshon, lèn un tiki dilanti, i partisipá den e kòmbersashon dor di wak e persona den su kara i move bo kabes. Ya ku loke nos ta siña ta dependé hopi di kon nos ta skucha, nos tur mester sigui purba mehorá e manera ku nos ta presta atenshon.