‘Kuida Yu Estilo Kángaru’—E Solushon pa Salba Beibi?

Tabata na un hospital den Bogotá, Kolombia, na 1979. Komo ku masha poko beibi ku nase prematuro tabata keda na bida, un dòkter kolombiano a bini ku un solushon diferente: ‘kuida yu estilo kángaru.’

No ta fásil pa dòkternan tene beibi prematuro na bida. Hopi bes nan ta pone beibi ku nase bou di peso den e ambiente kayente di un couveuse, kaminda nan ta keda te ora nan peso subi. Sin embargo den paisnan den desaroyo, hospitalnan demasiado yen, situashonnan a-higiéniko i skarsedat di personal i ekipo médiko hopi bes ta pone e beibinan haña infekshon peligroso.

Un dòkter na Kolombia a bini ku un método ku ta parse di aliviá e problema aki. Kon e ta funshoná? Ora un beibi nase prematuro, nan ta kuid’é manera kustumber te ora ku su kondishon stabilisá. Miéntras tantu ta siña e mama kon pa kuida e yu. Ora e beibi su salú drecha un poko, e mama ta bira un couveuse bibu. Kon? Dor di tene e beibi pegá na su kurpa, mará vertikalmente entre su pechunan. Safe den su saku estilo kángaru, e beibi ta keda kayente, i e por bebe lechi di su mama fásilmente. P’esei nan ta yama e método aki ‘kuida yu estilo kángaru.’

No tin mester di ekipo karu. E mama ta bisti un blusa apropiado òf shimis normal ku banchi na sintura. Ora e beibi tin sufisiente peso, mama ku beibi por bai kas, i ta djis bin kontrolá na hospital regularmente.

Investigashon preliminar ta indiká ku e estilo di kuida yu manera kángaru ta efektivo i safe. Ademas, e ta parse di promové un laso mas íntimo entre beibi i mama. P’esei nada straño ku vários pais a adaptá e método aki pa nan us’é. Na Mèksiko, nan ta siña miembronan di famia pa bira “tata kángaru,” “wela kángaru,” i asta “ruman muhé kángaru,” pa nan por duna un man ora e mama tin mester di un periodo di sosiegu bon meresí. Dra. Guadalupe Santos, kende ta manehá un programa di kuida yu estilo kángaru na Mèksiko, a bisa Spièrta!: “Nos ta usando e método aki for di 1992 i a mira ku e ta hopi efektivo. Nos tin mester di ménos couveuse i tambe hopi ménos tempu di estadia den hospital.”