E Punto di Bista Bíbliko

Pornografia Ta Simplemente un Dibertishon Inofensivo?

ORA ku arkeólogonan di e era di Reina Viktoria a kuminsá koba pa saka e ruinanan di e antiguo stat Pompei sistemátikamente, nan a keda di shòk ku loke nan a deskubrí. Plamá libremente entre e obranan di arte i e pinturanan riba muraya tabatin hopi kuadro i eskultura ku a presentá hende sunú òf aktividat seksual abiertamente. Hororisá pa e kontenido sensashonal i eskandaloso, outoridatnan a warda nan den museonan sekreto. Nan a krea e palabra “pornografia” (di griego pornē i grafos, ku ta nifiká “skirbimentu tokante prostitutanan”) pa deskribí e artefaktonan aki. Awe nan ta definí pornografia komo presentashon di komportashon erótiko den buki, potrèt, estatua, pelíkula, etc., ku e intenshon p’e stimulá eksitashon seksual.

E dianan aki pornografia ta presente tur kaminda i ta parse ku gran parti di sosiedat moderno ta hañ’é aseptabel. Ántes, pornografia tabata aparesé solamente den sinenan di mala fama i den áreanan kaminda tabatin kasnan di prostitushon i otro aktividat komersial basá riba sèks. Pero awor e ta masha komun den hopi komunidat. Na Merka so pornografia ta generá mas ku 10 mil mion dòler pa aña!

Tin defensor di pornografia ku ta promov’é komo un manera pa duna sous na un matrimonio laf. Un eskritor a bisa: “E ta stimulá un bida di fantasia aktivo. E ta duna instrukshon pa logra plaser seksual.” Otronan ta pretendé ku e ta stimulá frankesa i kòmbersashon habrí riba asuntunan seksual. “Pornografia ta benefisiá hende muhé,” segun e eskritora Wendy McElroy.

Pero no ta tur hende ta di akuerdo ku esei. Hopi bes hende a konektá pornografia ku un gran variedat di konsekuensia i aktitut perhudisial. Tin hende ta indiká ku pornografia ta ligá ku violashon i tambe ku otro formanan di violensia kontra hende muhé i mucha. E notorio Ted Bundy, kende a kometé un seri di asesinato, a atmití ku e tabatin un “deseo fuerte pa pornografia violento.” El a bisa: ‘E persona no ta ripará e kondishon aki mesora ni ta identifik’é komo un problema serio. Pero e interes aki ta ser kanalisá den direkshon di asuntunan di karakter seksual ku ta enbolbé violensia. Mi kier enfatisá ku e deseo aki ta desaroyá gradualmente. E no ta algu ku ta tuma lugá den un periodo kòrtiku.’

En bista di e debate kontinuo i e abundansia di material pornográfiko ku tin awe, kisas bo ta puntra bo mes: ‘Beibel ta duna guia tokante e asuntu aki?’

 Beibel Ta Franko Tokante Sèks

Beibel ta trata asuntunan seksual den un manera franko i sin ripara. (Deuteronomio 24:5; 1 Korintionan 7:​3, 4) Sálomon a konsehá: “Alegrá bo den e esposa di bo hubentut. . . . Laga su pechunan satisfasé bo tur ora.” (Proverbionan 5:​18, 19) Beibel ta duna rekomendashon i konseho kla tokante relashon seksual, inkluso denter di ki límite mester disfrutá di dje. Sèks pafó di matrimonio ta prohibí. Tambe tur forma di práktikanan seksual apnormal.​—⁠Levítiko 18:​22, 23; 1 Korintionan 6:9; Galationan 5:⁠19.

Asta denter di e límitenan pèrmití parehanan mester tin rèspèt i dominio propio. Apòstel Pablo a skirbi: “Laga matrimonio wòrdu onrá pa tur hende, i laga e kama matrimonial ta sin mancha.” (Hebreonan 13:⁠4) E konseho aki ta na kontraste skèrpi ku e intenshon i mensahe di pornografia.

Pornografia Ta Duna un Mal Impreshon di Sèks

En bes di presentá relashon seksual komo un ekspreshon bunita i íntimo di amor entre un hòmber i un muhé den un matrimonio onorabel, pornografia ta rebahá i duna un mal impreshon di e akto seksual. E ta presentá sèks parotin i apnormal komo algu eksitante i deseabel. E ta enfatisá satisfakshon personal ku kasi no ta tene kuenta mes ku e otro persona.

Hende muhé, hòmber i mucha ta ser presentá komo ophetonan ku ta eksistí solamente pa satisfakshon seksual. Un informe ta bisa: “Ta un hende su forma di kurpa ta determiná si e ta bunita, lokual ta hiba na ekspektativanan irealístiko.” Un otro informe ta konkluí: “Presentando hende muhé komo personanan anónimo, ku semper tin deseo/semper ta warda riba un oportunidat, komo ko’i hunga seksual insignifikante pa hende hòmber, kitando nan sunú i ekshibiendo nan kurpa pa gana plaka i pa dibertishon, no por transmití e mensahe ku hende muhé tin igualdat, dignidat i humanidat.”

Al kontrario, amor “no ta komportá su mes indesente,” apòstel Pablo a skirbi. “E no ta buska su propio interes.” (1 Korintionan 13:⁠5) Beibel ta animá hòmbernan pa “stima nan esposa manera nan mes kurpa” i ‘duna nan onor.’ Beibel no ta bisa pa konsiderá hende muhé simplemente komo un opheto pa haña satisfakshon seksual. (Efesionan 5:28; 1 Pedro 3:⁠7) Un persona, sea ta hòmber òf muhé, ku regularmente ta wak imágennan seksual abierto di otro hende, di bèrdat ta komportando su mes desente? I e persona ei realmente ta mustra onor i rèspèt? En bes di kultivá amor, pornografia ta lanta deseo egoista.

Tin un faktor mas. No ta tarda hopi ku loke inisialmente ta eksitá un persona⁠—⁠meskos ku tur otro stimulashon inkorekto⁠—⁠ta bira algu komun i koriente. Un eskritor ta bisa: “Despues di tempu [e usadó di pornografia] mester di material mas detayá i apnormal . . . Kisas nan ta preshoná nan partnernan pa hasi aktonan seksual ku ta mas i mas ekstrabagante . . . , lokual ta mengua nan [propio] kapasidat di ekspresá berdadero kariño.” Esei ta parse un dibertishon inofensivo?  Pero tin un otro motibu importante pa evitá pornografia.

Beibel i Pashon

Ounke hopi hende awe ta haña ku no tin nada malu ni peligroso den stimulá fantasianan seksual, Beibel sí no ta di akuerdo ku esei. E ta splika bon kla ku tin un relashon natural entre loke nos ta yena nos mente kuné i kon nos ta aktua. E disipel kristian Santiago a bisa: “Kada un ta wòrdu tentá ora ku e wòrdu atraí i sedusí dor di su mes pashon. Anto ora pashon konsebí, e ta duna lus na piká.” (Santiago 1:​14, 15) Hesus a bisa: “Ken ku wak un muhé pa dese’é, ya kaba el a kometé adulterio kuné den su kurason.”​—⁠Mateo 5:⁠28.

Manera tantu Santiago komo Hesus a indiká, hende ta aktua riba e impulso di nan deseonan interno. E deseonan ei, ora alimentá nan i stimulá nan, ku tempu por bira opseshon fuerte. Ta difísil pa resistí un opseshon i ku tempu e por obligá un persona na aktua. Pues, loke nos ta hinka den nos mente por tin un influensia poderoso riba loke nos lo hasi ku tempu.

Fantasianan seksual por interferí direktamente ku nos adorashon na Dios. Ta pa e motibu ei Pablo a skirbi: “P’esei, konsiderá e miembronan di boso kurpa . . . komo morto pa inmoralidat, impuresa, pashon, deseo malu, i golosidat, ku ta igual na idolatria.”​—⁠Kolosensenan 3:⁠5.

Aki Pablo ta konektá pashon (apetit seksual, NW ) ku golosidat. Golosidat ta un deseo eksesivo pa algu ku bo no tin. * Golosidat ta un forma di idolatria. Dikon? Pasobra e persona goloso ta pone loke e ta deseá promé ku tur otro kos, inkluso promé ku Dios. Pornografia ta stimulá pashon, un deseo seksual intenso, pa algu ku e persona no tin. Un eskritor religioso a bisa: “Bo kier e bida seksual di un otro hende. . . . Úniko kos ku bo por pensa ariba ta bo deseo pa e bida seksual ei ku bo no tin. . . . Loke nos tin un deseo intenso p’e, nos ta adorá.”

Pornografia Ta Daña Balornan Moral

Beibel ta konsehá: “Tur loke ta puru, tur loke ta bunita, tur loke ta di bon fama, si tin algun birtut . . . , laga esakinan okupá boso mente.” (Filipensenan 4:⁠8) Un persona ku ta alimentá su bista i su mente ku pornografia ta rechasá e konseho di Pablo. Pornografia ta indesente pasobra di un manera deskará e ta ekshibí pa bista públiko e aktonan mas íntimo i privá. E ta despresiabel pasobra e ta rebahá hende i kita nan dignidat humano. E ta mustra falta di amor pasobra e no ta stimulá ternura ni interes. E ta simplemente promové pashon egoista.

Dor di presentá aktonan inmoral i sushi pa loko, pornografia ta debilitá òf sabotiá un kristian su esfuersonan pa desaroyá ‘odio pa loke ta malu.’ (Ámos 5:⁠15) Pornografia ta stimulá hende pa praktiká piká i ta un violashon di Pablo su animashon na e efesionan pa “no laga inmoralidat òf kualkier sorto di impuresa òf golosidat ni wòrdu mentá mes meimei di boso, manera ta pas pa santunan, ni sushedat, . . . ni chansanan bulgar, ku no ta pas.”​—⁠Efesionan 5:​3, 4.

Pornografia sigur no ta inofensivo. E ta probechá di otronan i ta daña balornan moral. E por destruí relashonnan personal, i ta kambia e ekspreshon natural di intimidat seksual den un aktividat kaminda otronan ta para wak pa haña satisfakshon seksual. E ta venená e mente i spiritualidat di esun ku ta para wak. E ta stimulá egoismo, golosidat i ta siña hende konsiderá otronan komo opheto ku ta sirbi solamente pa satisfasé nan pashon. E ta debilitá un hende su esfuerso pa hasi bon i di tin un bon konsenshi. Pero mas importante, e por stroba òf asta daña un hende su relashon spiritual ku Dios. (Efesionan 4:​17-⁠19) Di bèrdat pornografia ta un plaga ku hende mester evitá.​—⁠Proverbionan 4:​14, 15.

[Nota]

[Plachi na página 28]

Pornografia ta daña un hende su manera di mira e sekso opuesto