E Atrakshon di Number Mistiko

IMAGINÁ bo un mundu ku no ta usa number. Lo no tin plaka. Komersio lo keda limitá na transakshonnan kara-kara. I kiko di deporte? Sin number, nos lo no por tene skor ni bisa kuantu hungadó mester tin den kada tim!

Sin embargo, fuera di e echo ku numbernan ta práktiko, tin hende ta konsiderá ku nan tin kualidatnan misterioso. Esaki ta pasobra number no ta algu konkreto. Bo no por mira, mishi ni fula number. Por ehèmpel: un apel tin su koló, tekstura, tamaño, forma, holó i sabor úniko. Dor di kada un di e rasgonan aki bo por haña sa si un sierto opheto realmente ta un apel, un lamunchi, un bala òf algu otro. Pero un number no ta asina. Kisas e úniko kos ku un kolekshon di shete artíkulo tin en komun ku un otro kolekshon di shete artíkulo ta e echo ku nan ta shete. Pues, pa komprendé e nifikashon di number⁠—⁠por ehèmpel, pa distinguí e diferensia entre seis ku shete⁠—⁠ta nifiká komprendé algu masha teorétiko. I ta esaki ta pone hende spekulá ku posiblemente numbernan tin un nifikashon òf poder misterioso.

Di Pitágoras te na Siensia Falsu

Den komunidatnan antiguo tabata komun pa hende duna nifikashon spesial na number. Pitágoras, un filósofo i matemátiko griego ku a biba un 600 aña promé ku nos era, a siña hende ku bo por analisá tur kos segun patronchi di number. E ku su disipelnan a rasoná ku henter universo ta un ehèmpel di òrdu i proporshonnan balansá. Pues anto, no ta posibel ku den tur kos material tin un relashon matemátiko fundamental?

For di tempu di Pitágoras, hende a usa interpretashon di number pa hasi pronóstiko, splika soño i tambe komo un yudansa pa kòrda kos. Griegonan,  mòslemnan i miembronan di kristiandat tur a usa interpretashon di number. Hudiu di e sekta kabala a usa un sistema di numerologia ku yama gematria. Nan a asigná un number na kada un di e 22 lèternan di álfabèt hebreo i nan a pretendé ku mediante esei nan a deskubrí kódigonan sekreto den e Skritura Hebreo.

Numerologia moderno ta kasi meskos. Hopi bes nan ta kuminsá ku bo nòmber i fecha di nasementu. Nan ta asigná un number na kada lèter di bo nòmber. Despues ku un eksperto di numerologia konta e numbernan aki huntu ku e numbernan di bo fecha di nasementu, e ta determiná bo numbernan klave. Kaba e ta atribuí un nifikashon spesial na e numbernan aki, ku segun é, ta duna un deskripshon kompleto di bo: bo personalidat, bo deseonan inkonsiente, bo destino, etcetera.

Podisé e loke realmente ta hasi numerologia atraktivo ta ku e análisis ta parse masha eksakto. Edward Albertson a skirbi den su buki Prophecy for the Millions (Profesia pa Miónes di Hende): “Hopi hende a kuminsá kere den numerologia ora nan a ripará kon e numbernan ta kuadra kasi presis ku e karakter di personanan ku nan a analisá a base di e numbernan aki.” Sin embargo, numerologia a ser katalogá tambe komo un siensia falsu. Dikon? Tin motibu pa bo duda di su pretenshonnan?

[Kuadro/Plachinan na página 5]

BEIBEL TIN MENSAHENAN SKONDÍ?

Den su buki The Bible Code (Kódigo di Beibel), e reportero Michael Drosnin ta bisa ku usando un kòmpiuter pa analisá e Skritura Hebreo, el a deskubrí mensahenan skondí. Segun Drosnin, e “kódigo” a produsí e palabranan “asesino ku lo asesiná” huntu ku e nòmber Yitzhak Rabin⁠—⁠i el a haña e mensahe aki un aña promé ku nan a asesiná e promé minister israelí Rabin.

Manera por a spera, e buki The Bible Code a krea basta kontroversia. Dave Thomas, un matemátiko i eksperto di natuurkunde, a demostrá ku si bo usa un kòmpiuter pa analisá kualkier teksto skirbí, lo bo haña loke ta parse mensahenan sekreto. Analisando e mesun teksto ku Drosnin a eksaminá, Thomas a haña e palabranan “kódigo,” “kèns” i “engaño.” Segun Thomas: “Bo por haña mensahe skondí tur kaminda, basta bo ta dispuesto na invertí tempu i esfuerso pa buska resultado for di e inmenso kampo di probabilidat ku tin.”

Un kòmpiuter, ku su kapasidat di konta bai gol, muy probablemente lo haña algun kombinashon di lèter ku un hende lo por usa komo un sorto di pronóstiko. Pero esaki ta simplemente koinsidensia i no ta duna prueba ku Beibel ta kontené mensahe skondí. *

[Nota]

[Plachi na página 4]

Pitágoras a siña hende ku tur kos tin un patronchi di number

[Rekonosementu]

Kortesia di National Library of Medicine