For di Nos Lektornan

Kurashi na Momentu di Desaster Masha danki pa e seri ku e portada “Kurashi na Momentu di Desaster​—⁠E Dia Ku Twin Towers A Basha Abou.” (8 di yanüari 2002) E artíkulonan aki a konmové mi masha hopi, i nan a pone mi realisá ku tempu i suseso imprevisto por afektá nos tur. Mi ta sinti masha duele ora mi pensa riba tur e bidanan ku a bai pèrdí.

S.B.R., Dinamarka

Danki pa publiká “E Orashon di Tatiana.” For di ora mi tabata lesa e seri di artíkulo mi tabata yora kaba, pero ora mi a lesa e parti ei, mi a grita yora. Mi kier resa pa kresementu spiritual di e muchanan ku a pèrdè un mayor den e atake terorista ya nan por topa otro atrobe den e mundu nobo. Tambe, e artíkulo aki a pone mi apresiá mas tantu ainda e echo ku komo un Testigu di Yehova, mi tin un speransa briante pa futuro.

T. A., Hapon

Maske ta na Alemania mi ta biba, e susesonan di 11 di sèptèmber tabata un shòk pa mi i mi famia. Tres luna despues, ainda mi yu muhé di nuebe aña tabata pinta avion ku ta dal den un edifisio haltu. Nos ta spera ku anhelo riba e dia ku tragedianan asina lo no eksistí mas.

E. G., Alemania

Ora mi a mira loke a pasa na New York, mi a resa na Yehova i a pidié duna forsa na e sobrebibientenan i speransa na famia di e víktimanan. Ora mi a lesa e artíkulonan aki, mi a mira kon Yehova a skucha mi orashon i tambe e orashon di hopi hende mas. E susesonan aki a hasi mi konsiente ku un tragedia por tuma lugá na kualkier momentu, i esei a pone mi reevaluá mi bida.

M. V., Italia

Nos a apresiá foral e komentarionan di hende ku a eksperensiá personalmente loke a pasa. E deklarashonnan di e sobrebibientenan a pone nos wowo yena ku awa. Nos ta pidi Yehova yuda tur esnan ku ta sufri i ta spera ku via Spièrta! nan lo por haña konsuelo. Komo ku nos ta yòn, e preguntanan a animá nos pa pensa riba nos bida i riba nos prioridatnan. Nos kier pa boso sigui publiká e revista aki pa semper.

T. M. i A. P., Slovenia

Mi tin 14 aña i ta den klas 3 di skol sekundario. Ora mi a lesa e seri aki, mi a bin komprendé e miedu ku a kompañá e suseso. Mi a mira kon hende a sakrifiká nan bida pa salba otronan. Mi a tende na notisia ku hopi pagadó di kandela a pèrdè nan bida, pero nunka mi no a sintié asina personal manera ora mi a lesa e artíkulonan. Mi a yora ora mi a lesa e parti “E Orashon di Tatiana.” Mi tambe a pèrdè mi tata, debí na malesa, ora mi tabata den e promé klas di skol sekundario. E parti di Tatiana a pone mi puntra mi mes: ‘Mi ta mira e mundu nobo komo algu asina real, manera Tatiana ta mir’é?’ Mi kier duna mi maestronan na skol i hopi di mi amiganan e revista aki. Por fabor, sigui publiká e revistanan maravioso aki!

H. T., Hapon

Diseño Nobo Ta un plaser pa mira kon e aparensia di Spièrta! a drecha for di tempu ku mi a kuminsá lesa e revista na 1978. Ora mi a analisá e edishon di 8 di yanüari 2002, e páginanan realmente a kapta mi atenshon. E título di e artíkulonan ta destaká, i e plachinan ta impreshonante. E diseño di e artíkulonan ta hasi e lesamentu asta mas dushi ainda. Mi tin sigur ku e “look” nobo aki lo atraé hopi mas hende sinsero na Yehova.

V.P.L., Brazil