Number i Bo Bida

NUMBERNAN tin un nifikashon sekreto? “Klaru ku sí!” tin hende ta kore bisa, i nan ta menshoná un ehèmpel interesante: e atakenan terorista ku a tuma lugá dia 11 di sèptèmber 2001.

Un eksperto di numerologia a bisa: “For di momentu ku mi a tende e notisia, mi a tuma nota di e fecha: 11-9-2001.” Ekspertonan di numerologia generalmente ta konsiderá number 11 komo un di e “numbernan maestro.” P’esei fanátikonan di numerologia a kompilá un lista di vários punto relashoná ku e atake terorista ku ta señalá na e “number maestro” 11. At’akí djis un parti di loke nan a haña:

▪ E tragedia a sosodé riba e fecha 11/9. 1 + 1 + 9 = 11.

▪ 11 di sèptèmber tabata e di 254 dia di aña. 2 + 5 + 4 = 11.

▪ E avion ku a dal den e toren nort tabata Buelo 11.

▪ E buelo ei tabatin 92 persona abordo. 9 + 2 = 11.

▪ E avion ku a dal den e toren sùit tabatin 65 pasahero. 6 + 5 = 11.

▪ Twin Towers tabata parse number 11.

▪ E ekspreshon ingles “New York City” tin 11 lèter.

Numerologia⁠—⁠e práktika di duna nifikashon spesial òf místiko na sifra, kombinashon di sifra i totalnan di number⁠—⁠ta komun na Áfrika, Asia i Amérika. Dikon hende ta ser atraé na esei? Segun un Web site, e práktika di desifrá e lèternan di alfabèt ku tin den nòmber⁠—⁠un aspekto popular di numerologia⁠—⁠“ta duna informashon eksakto di un hende su personalidat, karakter, kualidatnan i faltanan.” E fuente aki ta bisa ku un análisis di nos “fecha di nasementu ta revelá nos rumbo di bida, ku tur su gosonan i eksperensianan doloroso.”

E loke nan ta pretendé aki ta sierto? Òf lo por tin peligernan skondí den studia number pa motibunan sobrenatural?