Mas i Mas Famia ku un Mayor So

“Hopi anochi mi tabata resa ku awa na wowo i bisa Dios: ‘Mi no sa kiko pa hasi mayan.’”​—⁠GLORIA, UN MAMA SOLTERO KU TIN TRES YU.

FAMIA ku un mayor so a bira un fenómeno permanente i notabel den hopi sosiedat awe. * Ekspertonan ku ta studia kambio den poblashon i sosiólogonan na hopi parti di mundu ta puntra nan mes ta kon bin e struktura di e famia tradishonal ku ta konsistí di esposo, esposa i yunan a ser remplasá pa otro formanan di bida di famia.

E profesornan di sosiologia, Simon Duncan i Rosalind Edwards, ta remarká ku tin “kambionan di largu alkanse ta tumando lugá den e areglonan di famia i den e manera ku hòmber i muhé ta trata otro.” Dikon? Segun algun opservadó, esaki ta resultado di e manera ku hende ta skohe pa hiba nan bida den un ambiente kaminda tin kambionan ekonómiko, kultural i sosial.

Laga nos konsiderá algun di e kambionan aki i tambe e manera ku hende ta dirigí nan bida. Preshon di bida ta un faktor prinsipal ku ta influensiá bida di hende. Loke ta sosodé pafó di kas ta afektá miembronan dje famia for di ora nan lanta mainta te ora nan bai drumi. Tempu ku ántes nan tabata dediká na aktividatnan di famia, awor nan ta dediká na Internet, dilanti televishon, na telefon, den outo i moviendo di un aktividat pa otro.

Preshon ekonómiko tambe tin su influensia. E bida kómodo djawe ta kosta plaka, p’esei mas i mas mayor ta traha. Komo parti di un sosiedat den kua hende por move fásilmente, hopi miembro di famia ta biba i traha leu for di e otro miembronan di famia ku por duna nan yudansa, i den  algun kaso asta e kasánan ta biba i traha leu for di otro. I den hopi pais, pelíkula, músika i otro entretenimentu popular ta hasi e kos pió, ya ku hopi bes nan ta promové menospresio pa nèt e institushonnan, manera matrimonio i famia, ku ta duna un sentido di stabilidat. *

E Mama Soltero Moderno

E mama soltero di awendia no nesesariamente ta kuadra ku e konsepto bieu di ta un tiner soltero ku ta biba di ònderstant. Awendia si bo ta un mama ku no ta kasá, esei no ta un bèrgwensa mas manera ántes. Al kontrario, streanan di farándula ku ta sirbi komo ‘role model’ ta asta promov’é komo algu ideal. Ademas, hopi hende muhé tin mas edukashon ku ántes i nan ta den mihó kondishon pa perkurá pa nan mes⁠—⁠pues si nan kier bira mama, nan no tin nodi kasa pa motibunan finansiero.

Algun mama soltero, foral adultonan ku a bini di mayornan divorsiá, ta keda soltero pasobra nan no kier pa nan yunan sufri e doló di wak un di nan mayornan bandoná e famia. Tin otro hende muhé ku ta bira mama soltero sin ku ta nan mes a skohe esei, mas bien ta nan kasá ta bandoná nan. Segun e Fundashon Joseph Rowntree di Gran Bretania: “Por lo general no ta e persona mes ta skohe egoistamente p’e ta un mayor soltero, ni no ta asina ku e yunan di un famia ku tin un mayor so ta muchanan neglishá ku no ta haña disiplina.”

Sin embargo, e echo ku tin hopi famia ku un mayor so ta un motibu di preokupashon pasobra mayornan soltero i nan yunan por haña nan ku tenshon emoshonal, nesesidat ekonómiko i desbentahanan sosial. Algun hende kisas ta duda ku un mayor so por lanta su yunan bon. Kiko ta algun dje problemanan partikular ku famianan ku un mayor so por haña nan kuné? Kon un kristian por logra kumpli ku e tarea di kria yu komo un mayor soltero?

[Nota]

[Kuadro na página 4]

Algun Klarifikashon

Rònt mundu nan ta usa vários ekspreshon pa deskribí mamanan ku ta lanta nan yunan nan so. Den sierto paisnan nan ta usa e ekspreshon “mama soltero” pa referí solamente na mamanan ku no a kasa nunka. Sin embargo, tin tambe otro mamanan ku ta lanta nan yunan sin un partner maskulino. Esakinan por ta mamanan ku a divorsiá, separá òf ku a bira biuda.

Den e seri di artíkulo aki nos ta usa e ekspreshonnan “un mayor so” i “mama soltero” pa referí na mayornan ku ta kria nan yunan sin un kasá.

[Kuadro/Mapa na página 4, 5]

MAYOR SOLTERO​—UN TENDENSIA DEN HOPI PAIS

Merka: “Di 1970 pa aña 2000, e kantidat di mama soltero a oumentá di 3 mion pa 10 mion; durante e mesun lapso di tempu, e kantidat di tata soltero tambe a oumentá di 393.000 pa 2 mion.”​—⁠Ofisina di Senso di Merka.

Mèksiko: Segun e korant La Jornada, rònt di 27 porshento di tur embaraso den e pais ta di mamanan teenager.

 Irlanda: E porsentahe di hogarnan ku un mayor so a oumentá di 5,7 na 1981 pa 7,9 porshento na 1991. “Matrimonionan kibrá ta keda un faktor masha importante ku ta kontribuí n’e kantidat di mama soltero.”​—⁠Single Mothers in an International Context, 1997.

Gran Bretania: “Pa promé bes e kantidat di famia ku un mayor so, a pasa 25 porshento di e totalidat di famia. Esei ta mustra un oumento drástiko den e kantidat di mamanan ku no a kasa nunka i un oumento signifikativo den e porsentahe di divorsio atraves di e último 30 añanan aki.”​—⁠The Times, Lònden, 2 di mart 2000.

Fransia: “Desde final di añanan ’70 di siglo 20, e porsentahe di famia ku un mayor so a oumentá ku mas ku 50 porshento.​—⁠Single Mothers in an International Context, 1997.

Alemania: “Den e último dos dékadanan, e kantidat di mayor soltero a bira dòbel. Kasi tur famia ku un mayor so . . . ta ser dirigí dor di e mama.”​—⁠Single Mothers in an International Context, 1997.

Hapon: E kantidat di famia ku ta ser dirigí dor di mama so a kuminsá oumentá desde añanan ’70 di siglo 20. Na 1997, di tur e famianan, 17 porshento tabatin un mama soltero na kabes.​—⁠Single Mothers in an International Context, 1997; The World’s Women 2000: Trends and Statistics.

Gresia: “For di 1980, e kantidat di mama soltero na [Gresia] a oumentá ku 29,8 porshento. I di akuerdo ku e sifranan di Union Europeo, na 1997 e porsentahe di yunan ku a nase pafó di matrimonio tabata 3,3 porshento, siendo ku na 1980 e tabata solamente 1,1 porshento.”​—⁠E korant Ta Nea, Aténas, di 4 di sèptèmber 1998.

Oustralia: Kasi 1 di kada 4 mucha ta biba ku solamente un di su mayornan biológiko. Generalmente esaki ta pa motibu ku e mayornan su relashon òf matrimonio a kibra. Ta ser kalkulá ku den e próksimo 25 añanan, e kantidat di famia ku un mayor so lo krese ku un porsentahe di 30 pa 66 porshento.​—⁠Büró di Statistik Oustraliano.