Dikon Norma i Balor Ta Kambiando

“Kiko ta e kos mas importante den bida?”

Nan a hasi e pregunta ei na 50.000 hende den 60 pais. E rapòrt di Gallup ta bisa ku e kontesta mas frekuente ku nan a haña na kasi tur parti di mundu tabata “un bida di famia felis” i “bon salú.”

NA PROMÉ bista lo por parse ku hende rònt mundu ta kompartí e mesun norma- i balornan noble. Sin embargo, e situashon no ta dje faborabel ei manera e ta parse. Den pasado, hende su norma- i balornan tabata basá riba prinsipionan religioso i moral tradishonal. Pero awor, kos ta kambiando rápidamente. Relashoná ku e situashon na Italia, investigadó Marisa Ferrari Occhionero ta bisa: “Hóbennan ta manifestá norma i balor ku kada bes tin ménos influensia di mayornan, di tradishon i di religion.” Anto lo por bisa meskos di hende di rònt parti mundu, tantu di hóbennan komo di grandinan.

Profèser Ronald Inglehart, kordinadó di un proyekto di investigashon yamá Enkuesta Mundial di Norma i Balor, ta bisa: “Un kresiente kantidat di evidensia ta indiká ku mundialmente tin kambionan profundo ta tumando lugá pa loke ta puntonan di bista.” Kiko ta kousando e kambionan ei? Segun Inglehart: “E kambionan aki ta un refleho di kambionan riba tereno ekonómiko i teknológiko.”

Por ehèmpel, e enkuesta di Gallup a revelá ku den paisnan riku hende a kalifiká empleo “basta abou” entre e kosnan mas importante den bida. Pero den paisnan den desaroyo, un empleo ta e kos di mas importante! Sí, ora hende ta pober, e kos di mas importante ta kon pa sobrebibí kada dia. Segun ku paisnan ta desaroyá ekonómikamente, hende ta kuminsá duna prioridat e ora ei na kosnan manera salú, bida di famia felis i ekspreshon di nan propio personalidat.

Debí na avansenan teknológiko, e norma- i balornan nobo aki sigur lo bai tin un impakto riba paisnan den desaroyo. E revista The Futurist a remarká: “Loke nos ta mira i tende ta influensiá nos kreensia- i normanan.” Pues medionan di komunikashon tabatin un enorme impakto riba norma i balor di paisnan oksidental. The Futurist ta bisa: “E medionan di komunikashon aki ta ehersiendo influensia mundialmente.”

P’esei, ki kambionan nos ta mirando den hende su aktitut i komportashon? Kon e kambionan aki den norma i balor ta afektá abo i bo famia?