Gail, ku a ser menshoná anteriormente, ta duda ku un dia lo e superá e doló di a pèrdè su kasá, Rob. Pero e ta ansioso pa mir’é atrobe den e mundu nobo ku Dios a primintí. Gail a bisa: “Mi teksto faborito ta Revelashon 21:3 i 4.” E teksto ei ta bisa en parte: “Dios mes lo ta huntu ku nan. I lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”

Gail a sigui bisa: “E promesa akí ta bisa tur kos. Mi ta ègt sinti pa hende ku a pèrdè un stimá den morto ma ku no sa di e speransa ku nan por bolbe mira nan ser kerí.” Gail ta demostrá ku e ta kere loke Beibel ta bisa i ta dediká un promedio di 70 ora tur luna na prediká e bon notisia, esta, e promesa di Dios ku den futuro “lo no tin morto mas.”

Kisas esei ta parse manera un soño pa bo. Pero konsiderá e ehèmpel di un hòmber ku yama Yòb. E tabata hopi malu. (Yòb 2:7) Maske Yòb kier a muri, e tabatin fe den e poder di Dios pa lant’é for di morto i pa e biba riba tera. Ku konfiansa, Yòb a bisa: “O ku bo lo a skonde mi den Seol. . . . Abo lo yama, i ami lo kontestá bo; lo bo anhelá na e obra di bo mannan.” (Yòb 14:13, 15) Yòb tabatin konfiansa ku su Dios lo sinti su falta i lo anhelá pa lant’é for di morto.

Pronto, ora Dios transformá tera den un paradeis, lo e hasi esei, tantu pa Yòb komo pa hopi hende mas. (Lukas 23:42, 43) Beibel ta konfirmá na Echonan 24:15 ku “lo bai tin un resurekshon.” Hesus a sigurá nos: “No keda asombrá pa loke mi a kaba di bisa, pasobra lo yega e ora ku tur esnan ku ta den graf lo tende su stèm i lo sali afó.” (Huan 5:28, 29) Yòb lo mira kumplimentu di e promesa ei. Ademas, lo e tin e speransa di rekobrá e “vigor di su hubentut” i pa semper su kueru lo keda “mas suave ku esun di mucha.” (Yòb 33:24, 25) Esei lo ta e kaso tambe pa tur hende ku pone fe den Dios su promesa di un resurekshon riba tera.

Si bo a pèrdè un ser kerí den morto, e informashon ku nos a trata kisas lo no kita bo tristesa kompletamente. Pero si bo meditá riba e promesanan di Dios ku tin den Beibel, bo por haña berdadero speransa i e forsa pa sigui padilanti.—1 Tesalonisensenan 4:13.

Bo ke haña mas informashon tokante kon pa trata ku tristesa? Òf kisas bo ta puntra bo mes: ‘Dikon Dios ta permití maldat i sufrimentu?’ Pa haña kontesta práktiko di Beibel ku ta duna konsuelo, bishitá nos website, jw.org.