Beibel ta konta: “Tabatin un trono den shelu i un persona sintá riba dje. I aparensia di esun sintá riba e trono tabata bria manera e piedranan presioso yaspe i sardio, i tabatin un regenbog tur rònt di e trono ku tabata bria manera esmeralda.”—Revelashon 4:2, 3.

“I tabatin un splendor rònt di dje. Manera e aparensia di regenbog den nubia riba un dia di áwaseru, asina e aparensia di e splendor tur rònt tabata. Asina e aparensia di e semehansa di e gloria di SEÑOR tabata.”—Ezekiel 1:27, 28.

E vishonnan ku apòstel Huan i profeta Ezekiel a haña ta deskribí e splendor di e Dios Haltísimo, Yehova, ku kosnan ku nos por visualisá, manera piedra presioso, un regenbog i un trono mahestuoso. Nan ta mustra nos ku e presensia di Yehova ta un bunitesa impreshonante, ku ta duna e idea di algu pasífiko i sereno.

E deskripshonnan akí di Dios ta kuadra ku e palabranan di e salmista, kende a skirbi: “SEÑOR ta grandi, i digno di ser alabá na gran manera; tambe e mester wòrdu temí mas ku tur dios. Pasobra tur e diosnan di e pueblonan ta ídolo, ma ta SEÑOR a traha e shelunan. Splendor i mahestat ta su dilanti, fortalesa i bunitesa ta den su santuario.”—Salmo 96:4-6.

Aunke Yehova ta e Dios Supremo, e ta invitá nos pa aserk’é den orashon i ta sigurá nos ku e ta skucha nos. (Salmo 65:2) Dios ta stima nos i ta interesá asina tantu den nos ku apòstel Huan por a bisa: “Dios ta amor.”—1 Huan 4:8.

Beibel ta bisa: “[E disipel kristian] Esteban, yen di spiritu santu, a hisa kara wak shelu i a mira e gloria di Dios i tambe Hesus pará na man drechi di Dios. I el a bisa: ‘Ata mi ta mira shelu habrí i e Yu di hende pará na man drechi di Dios!’”—Echonan 7:55, 56.

Djis promé ku Esteban a haña e vishon akí, e lidernan religioso hudiu ku Esteban tabata papia kuné a instigá e pueblo pa laga mata Hesus. E vishon akí a konfirmá ku Hesus ta na bida i a ser resusitá i a haña onor. Apòstel Pablo a skirbi lo  siguiente tokante esaki: “[Yehova] a lanta [Hesus] for di morto i a pon’é sinta na su man drechi den e lugánan selestial. El a sinta muchu mas haltu ku tur gobièrnu, outoridat, poder, dominio i tur nòmber ku por ser menshoná, no solamente den e era akí, sino tambe den esun ku ta bini.”—Efesionan 1:20, 21.

Ademas di deskribí Hesus su posishon elevá, e Skritura ta mustra ku meskos ku Yehova, e tambe ta masha interesá den hende. Durante Hesus su sirbishi riba tera, el a kura hende malu i a lanta hende for di morto. Mediante su morto sakrifisial, el a demostrá kuantu amor e tin pa Dios i pa humanidat. (Efesionan 2:4, 5) E ta pará na man drechi di Dios, i pronto lo e ehersé su outoridat i trese gran bendishon pa hende obediente rònt mundu.

Profeta Daniel a skirbi: “Mi a sigui wak te ora trononan a wòrdu poní, i e Ansiano di Dianan [Yehova] a tuma su asiento. . . . Míles i míles tabata sirbié, i dies mil biaha dies mil tabata pará su dilanti.”—Daniel 7:9, 10.

Den e vishon di shelu akí, Daniel a mira no solamente ún angel, ma un multitut di angel. Esei lo mester tabata un vishon impreshonante! Angel ta kriatura spiritual glorioso, inteligente i poderoso. Nan ta organisá den rango, ku ta inkluí serafin i kerubin. Beibel ta menshoná angel mas ku 250 biaha.

Angel no ta hende ku tabata biba riba tera. Dios a krea angel hopi mas promé ku el a krea hende. Ora Dios a krea tera, e angelnan tabata presente pa opservá i grita òf aploudí di alegria.—Yòb 38:4-7.

Un manera ku e angelnan fiel ta sirbi Dios ta ora nan ta enbolbí den e trabou di mas importante awe riba tera: e proklamashon di e bon notisia di e Reino di Dios. (Mateo 24:14) Apòstel Huan a haña un vishon ku a revelá kon angel ta yuda den e trabou akí. El a skirbi: “Mi a mira un otro angel ta bula meimei di shelu, i e tabata deklará bon notisia eterno na esnan ku ta biba riba tera, na tur nashon, tribu, idioma i pueblo.” (Revelashon 14:6) Angel no ta papia ku hende mas manera nan a yega di hasi den pasado. Pero, loke sí nan ta hasi  ta yuda guia hende ku ta prediká e bon notisia na personanan di kurason sinsero.

Beibel ta bisa: “Guera a kuminsá den shelu: Miguel [Hesukristu] ku su angelnan a bringa kontra e dragon, i e dragon ku su angelnan a bringa kontra nan, ma e no a triunfá ni no tabatin lugá mas pa nan den shelu. Di manera ku e dragon grandi, e kolebra original, esun ku yama Diabel i Satanas, ku ta gaña henter e tera habitá a ser bentá abou; el a ser bentá abou riba tera i su angelnan a ser bentá abou huntu kuné.”—Revelashon 12:7-9.

No ta semper tabatin pas den shelu. Na prinsipio di historia humano, un angel, ku tabatin un deseo pa haña adorashon, a rebeldiá kontra di Yehova, i asina el a bira Satanas, ku ta nifiká “Resistidó” òf “Opositor.” Mas despues otro angelnan a djòin e rebelion akí i a bira demoño. Nan ta oponé Yehova severamente, ta gaña mayoria di hende i pone nan bai kontra di e guia ku Yehova ta duna ku amor.

Satanas i su demoñonan ta malbado i kruel. Nan ta enemigu di hende i a kousa hopi di e sufrimentu ku hende a pasa aden. Por ehèmpel, Satanas a mata e bestia- i sirbientenan di e hòmber fiel Yòb. Despues, el a mata tur e dies yunan di Yòb ora el a manda “un bientu fuerte” ku a destruí e kas ku nan tabata aden. Mas despues, Satanas a laga Yòb su kurpa sali tur na ‘blufein ku tabata hasi masha doló, for di su plant’i pia te na su korona di kabes.’—Yòb 1:7-19; 2:7.

Pero, pronto Yehova lo kaba ku Satanas. For di tempu ku Satanas a ser bentá for di shelu den bisindario di tera, e sa ku “a ked’é masha poko tempu.” (Revelashon 12:12) Satanas ta kondená na destrukshon. Esei sigur ta un bon notisia!

Beibel ta bisa: “Bo [Hesus] a kumpra hende pa Dios for di tur tribu, idioma, pueblo i nashon; i bo a hasi nan rei i saserdote pa nos Dios, i komo rei, nan lo goberná e tera.”—Revelashon 5:9, 10.

Meskos ku Hesus, tin otro personanan ku ta haña resurekshon pa biba den shelu. Hesus a bisa su fiel apòstelnan: “Mi ta bai pa prepará un lugá pa boso. I . . . lo mi bini bèk i risibí boso serka mi, pa kaminda mi ta, boso tambe por ta.”—Huan 14:2, 3.

 Personanan ku ta bai shelu ta bai ku un propósito. Nan lo forma parti di un Reino, òf gobièrnu, huntu ku Hesus i den futuro nan lo reina riba tur e habitantenan di tera i trese bendishon pa nan. Esaki ta e Reino ku Hesus a bisa su siguidónan pa pidi p’e den e orashon modelo, bisando: “Nos Tata ku ta den shelu, bo nòmber sea santifiká. Laga bo Reino bini. Laga bo boluntat sosodé, meskos ku den shelu, tambe riba tera.”—Mateo 6:9, 10.

Apòstel Huan a bisa: “Mi a tende un stèm duru for di e trono bisa: ‘Tende! E tènt di Dios lo ta ku humanidat. . . . I lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.’”—Revelashon 21:3, 4.

E vishon profétiko akí ta referí na e tempu den kua e Reino di Dios, ku ta konsistí di Hesus i e personanan ku a ser resusitá for di tera, lo trese un fin na e gobernashon di Satanas i hasi tera un paradeis. E kosnan ku ta kousa hende hopi doló i tristesa lo no t’ei mas. Asta morto lo no eksistí mas.

Pero awor, kiko di e míles di miónes di hendenan ku a muri pero ku lo no haña resurekshon pa bai shelu? Den futuro, Dios lo resusitá nan ku e speransa di biba pa semper den Paradeis riba tera.—Lukas 23:43.