Pregunta di Lector

Ora apostel Pablo a bisa na Romanonan 12:19: “No venga boso mes, stimánan, sino duna lugá na rabia,” e tabata kier men cu cristiannan no mester rabia?

No, no ta esei e kier men si nos wak e nificacion exacto. Aki apostel Pablo tabata referí n’e rabia di Dios. Naturalmente esaki no kier men sí cu no ta nada si un cristian entregá na rabia. Bijbel ta consehá nos bon cla contra rabiamentu. Considerá algun ehempel di conseho divino.

“Laga rabia para i bandoná furia; no mustra bo mes excitá solamente pa haci malu.” (Salmo 37:8) “Ken cu sigui rabiá cu su ruman lo keda responsabel dilanti corte di husticia.” (Mateo 5:22) “E obranan di carni ta bisto, i nan ta fornicacion, impuresa, conducta inmoral, idolatria, práctica di spiritismo, enemistad, pleitu, yaluzí, atake di rabia.” (Galationan 5:19, 20) “Boso kita tur amargura malicioso i furia i rabia i griteria i abla ofensivo for di boso.” (Efesionan 4:31) “Tur hende mester ta lihé pa tende, slow pa papia, slow pa rabia.” (Santiago 1:19) Ademas, bes tras bes e buki di Proverbionan ta consehá nos pa no duna lugá na rabia ni pa ta lihé pa rabia pa motibu di ofensanan chikitu i erornan humano.—Proverbionan 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

E contexto di Romanonan 12:19 ta di acuerdo cu e consehonan ei. Pablo a recomendá pa nos amor ta sin hipocresia, pa nos bendicioná esnan cu ta persiguí nos, pa nos purba pensa bon di otronan, pa nos no paga malu cu malu i pa nos haci esfuerso pa ta na pas cu tur hende. Anto el a urgi: “No venga boso mes, stimánan, sino duna lugá na rabia; pasobra ta pará skirbí: ‘Vengansa ta di mi; ami lo paga, Jehova ta bisa.’”—Romanonan 12:9, 14, 16-19.

Sí, nos no mester permití rabia pone nos paga bek cu actonan di vengansa. Nos conocimentu di circunstancia i nos sentido di husticia ta imperfecto. Si nos permití rabia motivá nos pa tuma vengansa, hopi bes nos lo haci cos robes. Esei lo cumpli cu e meta di Dios su Adversario, Diabel. Un otro caminda Pablo a skirbi: “Rabia, i tog no peca; no laga solo baha cu boso den un estado provocá, ni no permití lugá p’e Diabel.”—Efesionan 4:26, 27.

E curso mihó i mas sabí ta di laga Dios dicidí ki ora i riba ken mester trece vengansa. E por haci esei cu pleno conocimentu dje echonan, i cualkier castigu cu e duna lo reflehá su husticia perfecto. Nos por comprendé cu ta esaki Pablo tabata kier men na Romanonan 12:19, ora nos tuma nota di su referencia na Deuteronomio 32:35 i 41, cu ta bisa entre otro: “Vengansa ta di mi, i castigu.” (Compará cu Hebreonan 10:30.) P’esei, aunke e palabranan “di Dios” no ta den e texto griego, un cantidad di traductor moderno a agregá nan na Romanonan 12:19. Esaki a pone cu a bini traduccionnan manera, “laga Dios tuma vengansa” (The Contemporary English Version), “duna lugá n’e rabia di Dios” (American Standard Version), “laga Dios kastigá” (Beibel na papiamentu koriente), “duna lugá, na dia di huicio.”—Testament Nobo.

Asta ora enemigunan dje berdad ta abusá di nos of ta persiguí nos, nos por manifestá confiansa den e descripcion di Jehova Dios cu Moises a tende: “Jehova, Jehova, un Dios misericordioso i yen di gracia, cu ta tarda pa rabia i ta abundante den bondad amoroso i berdad, cu ta conserbá bondad amoroso pa miles, i ta pordoná eror i transgresion i picá, pero di ningun manera lo e duna dispensacion di castigu.”—Exodo 34:6, 7.