Bo Tin Mester di un Concenshi Entrená

A parce di bira un dia memorabel p’e pasaheronan i tripulacion na bordo di Vuelo 901 di Air New Zealand pa Antártica. E cámaranan di saca potret tabata cla prepará, i tabata reina un ambiente festivo. Segun cu e DC-10 a acercá e continente blancu, e pasaheronan por a haña un bista magnífico segun cu e avion a bula pasa na poco haltura riba dje.

E CAPITAN, cu 15 aña como piloot, tabatin mas cu 11.000 ora di vuelo. Promé cu nan a lanta vuelo, el a hinca e plan di vuelo cuidadosamente den computer dje avion, sin sa cu e datonan cu nan a dun’é tabata incorecto. Ora nan a pasa den un nubia net algu bou di 600 meter di haltura, e DC-10 a dal den barica di ceru Erebus, matando tur e 257 hendenan na bordo.

Mescos cu avion djawendia ta dependé riba computer pa guia nan den laira, hende a ricibí un concenshi pa guia nan atrabes di bida. I e teribel tragedia di Vuelo 901 por siña nos algun les importante tocante nos concenshi. Por ehempel, mescos cu siguridad di vuelo ta dependé di un sistema di nabegacion cu ta traha bon, i tambe di bon puntonan di referencia, asina nos bienestar spiritual, moral i asta físico tambe ta dependé di un concenshi activo, guiá dor di puntonan di referencia moral corecto.

Lamentablemente, den e mundu djawe puntonan di referencia asina ta disparciendo lihé, of nan ta ser ignorá. “Awendia, tur ora nos ta tende cu Johnny no sa lesa, cu e no sa conta, i cuantu dificultad e tin pa localisá Francia riba mapa,” segun un educadó mericano. “Pero Johnny tin dificultad pa distinguí bon for di malu tambe. Huntu cu dificultad cu taal i rekenen, nos mester incluí confusion moral den nos lista di problema educacional.” El a remarcá tambe cu “hóbennan djawendia ta biba cu un sentido moral masha dòf. Puntra un di nan si ta existí ‘bon i malu,’ i di ripiente bo ta haña bo cu un persona bo dilanti, tur bruhá, sin sa kico pa bisa, nervioso i insigur. . . . Ora nan bai scol secundario, e confusion aki ta bira pió na lugá di drecha.”

Un dje causanan dje confusion aki ta relativismo moral; un punto di bista comun di cu cada hende of cultura por sigui e normanan cu e ta preferá. Imaginá bo kico lo sosodé si na lugá di usa punto di referencia fiho, pilootnan cuminsá bula usando marcanan cu ta move bai bin pa loco, i cu tin bes asta ta disparcé mes! Sin duda, desasternan manera esun riba ceru Erebus lo bira comun. Mescos, mundu a bira lomba pa normanan moral fiho, i awor e ta cosechá cada bes mas miseria i morto. Infieldad ta kibra famia, i miyones di hende ta sufri debí na AIDS i otro malesanan transmití sexualmente.

Relativismo moral por zona sofisticá. Pero de echo, esnan cu ta bai su tras ta manera e ninivitanan di antigwedad cu ‘no tabata sa e diferencia entre nan man drechi i nan man robes.’ Esnan cu ta practicá relativismo moral ta manera e israelitanan apóstata cu a bisa cu “bon ta malu i cu malu ta bon.”—Jónas 4:11; Isaías 5:20.

Wel, unda nos por acudí pa haña ley i principionan cu ta papia palabra cla, pa nos entrená nos concenshi cu nan, di manera cu nos concenshi por ta un guia confiabel? Miyones di hende a descubrí cu Bijbel ta cumpli  perfectamente cu e necesidad ei. Sea ta trata di moralidad of ética di trabou, entrenamentu di yu of adoracion di Dios, Bijbel no ta laga nada importante afó. (2 Timoteo 3:16) El a demostrá di ta completamente confiabel atrabes di siglonan. Debí cu ta nos Creador, e autoridad di mas haltu, a establecé e normanan moral di Bijbel, nan ta relevante pa tur hende. Pues, nos no tin nodi biba cu duda tocante cuestionnan moral.

Pero awendia mas cu nunca, bo concenshi ta bou di atake. Con ta posibel? I con bo por protehá bo concenshi? Un bon manera di hacié ta di haña sa ta ken ta e fuente dje atake, i ki táctica e ta usa. E siguiente artículo ta bai trata e puntonan aki.