“Dia di Tolerancia Religioso”

UN COMBERSACION cu Testigo di Jehova a lanta interes di un cabes di scol na Polonia asina tantu cu el a dicidí di pone un “Dia di Tolerancia Religioso” pa su scol. El a sugerí pa algun studiante boluntario—católico, budista i Testigo di Jehova—prepará presentacionnan breve pa laga otro studiantenan cera conocí cu nan creencia i prácticanan. Mesora tres tiener Testigo di Jehova a ofrecé nan mes como boluntario.

Ora e dia a yega, Malwina di 15 aña tabata esun cu a papia promé. El a bisa den su presentacion: “Hopi di boso tabata conocé nos promé cu nos a cuminsá bini e scol aki pasobra nos a bishitá boso na cas. Probablemente boso ta puntra pakico nos ta sigui haci e trabou ei. Esei ta pasobra nos ta sigui e ehempel di Jesucristo, e Fundador di cristianismo. El a predicá e bon nobo dje Reino di Dios tur caminda cu tabatin hende. E apostelnan i e otro cristiannan di promé a haci mescos. Na hopi lugá, Testigonan di Jehova ta soportá pruebanan difícil di fe, pero nos ta contentu cu na nos scol nos tin pas, algu cu boso tur ta contribuí na dje. Nos ta gradicí boso pa esei!”

Na conclusion di su presentacion, Malwina a declará: “Tin un motibu mas pakico nos ta bishitá boso na cas. Nos ta interesá den boso. Bijbel ta bisa cu pronto humanidad lo experenciá sucesonan cu lo afectá henter e mundu. P’esei, e siguiente biaha cu nos yama na boso porta, por fabor, tuma tempu pa scucha nos. Nos lo tin gana di conta boso con nos por biba huntu pa semper den un paradijs riba tera.”

E siguiente orador tabata Mateusz, kende tambe tabatin 15 aña. Mateusz a conta su auditorio cu atrabes di añanan, Testigonan di Jehova a usa vários método pa plama e bon nobo. Por ehempel, na 1914—durante e era di película sin zonido—e Testigonan tabata pasa e “Foto-Drama di Creacion,” un película i programa di slide cu a incluí zonido sincronisá.

 Mateusz a papia tocante e papel cu radio a hunga den plama e mensahe di Reino i despues el a splica con e sistema di computer plurilingwe di fotocomposicion electrónico (MEPS), cu Testigonan di Jehova a desaroyá, ta hincá den otro. Tambe el a relatá con Testigonan di Jehova a yuda informá dokternan tocante técnicanan pa tratamentu sin sanger. El a bisa: “Awor, dokternan polaco renombrá ta duna comentarionan faborabel tocante nos posicion i ta enfatisá cu cada aña mas i mas pashent cu no ta Testigo ta ser operá sin sanger.”

Mateusz a concluí cu un relato tocante e construccion di Salonnan di Reino i a bisa: “Boso ta deseá di bishitá nos Salon? Entrada ta grátis i no ta pasa colect.” Papiando tocante e centro di congreso na Sosnowiec, Mateusz a bisa: “Boso mester wak e edificio grandi i práctico aki. Di con nos no ta bai huntu einan? Nos tin un sugerencia, i nos amiga Katarzyna ta bai conta boso di dje.”

E siguiente Testigo, Katarzyna di 15 aña, a bisa yen di entusiasmo: “Boso ta bon biní na Sosnowiec p’e congreso di distrito di Testigonan di Jehova. Lo trata tópiconan cu tin di haber cu hóbennan.” Tambe Katarzyna a referí na e celebracion principal pa cristiannan, esta, e Memorial dje morto di Cristo Jesus. El a animá su oyentenan: “Aña pasá mas cu 14 miyon hende rond mundu a asistí n’e celebracion ei. Di con boso no ta djoin nos e siguiente biaha?”

Despues di nan presentacionnan, Malwina, Mateusz i Katarzyna a ofrecé e maestronan e buki Testigonan di Jehova—Proclamadónan dje Reino di Dios huntu cu dos video caset cu ta considerá e creencia i actividadnan di Testigonan di Jehova. * E maestronan a keda masha gradicidu i a primintí di usa nan den les di historia.

Na fin di e sesion, Martyna di 12 aña di edad a toca pa tur presente e cantica titulá “Danki, Jehova.” E tienernan Testigo aki ‘a tuma un curashi mediante nan Dios’ i a duna un excelente testimonio. (1 Tesalonicensenan 2:2) Esta un excelente ehempel pa hóbennan Testigo rond mundu!

[Nota]

[Plachi na página 26]

Katarzyna ta scoge e textonan di Bijbel p’e presentacion

[Plachi na página 26]

Malwina ta prepará su presentacion un par di dia promé cu e dun’é na scol