Pregunta di Lector

Jehova a cera su pacto cu Abraham na Ur of na Haran?

E promé relato dje pacto di Jehova cu Abraham ta ser hañá na Génesis 12:1-3, cu ta bisa: “Jehova a bisa Abram: ‘Sali for di bo pais i for di bo parientenan i for dje cas di bo tata, i bai n’e pais cu lo mi mustra bo; i lo mi haci bo bira un nacion grandi . . . I tur e famianan di suela siguramente lo bendicioná nan mes pa medio di bo.’” * Por ta masha bon cu Jehova a cera e pacto aki cu Abraham tempu cu Abraham tabata na Ur i cu el a confirmá esaki ora Abraham tabata na Haran.

Den promé siglo, Esteban a referí n’e mandato cu Jehova a duna Abraham pa bai Canan. Dirigiendo su mes n’e Sanedrin, el a bisa: “E Dios di gloria a aparecé na nos antepasado Abraham miéntras e tabata na Mesopotamia, promé cu el a bai biba den Haran, i el a bis’é: ‘Sali for di bo tera i for di bo parientenan i bini na e tera cu lo mi mustra bo.’” (Echonan 7:2, 3) Abraham tabata originalmente di Ur, i manera Esteban a indicá, ta einan ta caminda pa promé bes el a tende e mandato pa bai Canan. (Génesis 15:7; Nehemías 9:7) Esteban no a mencioná Dios su pacto cu Abraham, pero na Génesis 12:1-3, e pacto ei ta ser relacioná cu e mandato pa bai Canan. P’esei ta razonabel pa kere cu Jehova a cera e pacto cu Abraham na Ur.

Sin embargo, un lesamentu cuidadoso di e relato di Génesis ta indicá cu Jehova a confirmá su pacto cu Abraham na Haran, mescos cu el a ripití i bai den mas detaye di aspectonan di e pacto na vários ocasion na Canan. (Génesis 15:5; 17:1-5; 18:18; 22:16-18) Di acuerdo cu Génesis 11:31 i 32, Abraham su tata Taré a sali for di Ur pa bai Canan den compania di Abraham, Sara i Lot. Nan a yega Haran i a keda einan te na morto di Taré. Abraham a keda suficiente tempu na Haran p’e por a adkerí bastante rikesa. (Génesis 12:5) Na un dado momento, Nacor, ruman homber di Abraham, tambe a muda bai einan.

Despues di mencioná e morto di Taré, Bijbel ta duna detaye dje palabranan di Jehova na Abraham i ta continuá: “Riba esaki Abram a bai manera Jehova a bis’é.” (Génesis 12:4) P’esei anto, Génesis 11:31–12:4 ta duna e impresion fuerte cu Jehova a expresá e palabranan registrá na Génesis 12:1-3 despues di morto di Taré. Si esei ta e caso, Abraham a bandoná Haran i a muda bai e tera cu Jehova a indicá, como reaccion riba un mandato cu el a caba di tende i cu tabata similar na esun cu el a tende añanan anterior na Ur.

Segun Génesis 12:1, Jehova a manda Abraham: “Sali for di bo pais i for di bo parientenan i for dje cas di bo tata.” Na un tempu e “pais” di Abraham tabata Ur, i e “cas” di su tata tabata einan. Sin embargo, Abraham su tata a muda su famia bai Haran, i Abraham a cuminsá yama e lugá ei su tera. Ora cu Abraham tabatin hopi aña na Canan, i cu el a manda su criá na ‘su pais i cerca su famianan’ pa busca un casá pa Isaac, e criá a bai “n’e stad di Nacor” (sea Haran of un stad den becindario). (Génesis 24:4, 10) Einan e criá a haña Rebeca entre e famianan di Abraham, e famia grandi di Nacor.—Génesis 22:20-24; 24:15, 24, 29; 27:42, 43.

Den su discurso n’e Sanedrin, Esteban a bisa di Abraham: “Despues cu su tata a muri, Dios a pon’é cambia su residencia na e tera aki den cua boso ta biba awor.” (Echonan 7:4) Esaki ta indicá cu Jehova a comunicá cu Abraham na Haran. Ta razonabel pa kere cu n’e ocasion ei, Jehova a ripití su pacto cu Abraham registrá na Génesis 12:1-3, ya cu e pacto a drenta na vigor ora Abraham a muda bai Canan. Pues un consideracion di tur e echonan ta hiba n’e conclusion cu por ta masha bon cu Jehova a cera su pacto cu Abraham na Ur i a confirm’é na Haran.

[Nota]