Pregunta di Lektor

Kon kristiannan mester konsiderá piedra di nasementu?

Den algun kultura, kada hende tin un piedra di nasementu ku ta korespondé ku e luna den kua el a nase. Si un kristian kier bisti un renchi ku tin un sierto piedra presioso esei ta un asuntu personal. (Galationan 6:5) Pero tin algun faktor importante pa tene kuenta kuné ora di tuma e desishon ei.

Encyclopaedia Britannica ta splika ku un piedra di nasementu ta un “piedra presioso ku ta korespondé ku un hende su fecha di nasementu, i hopi hende ta pensa ku bistimentu di piedra di nasementu ta trese suerte i bon salú pa nan.” E ensiklopedia ta sigui bisa: “Pa hopi tempu kaba astrólogonan a pensa ku sierto piedranan presioso tin podernan sobrenatural.”

Spesialmente ántes hopi hende tabata kere ku bistimentu di piedra di nasementu lo trese suerte pa nan. Un kristian berdadero ta kere esei? Nò, pasobra e ta komprondé ku Yehova a kondená esnan ku a bandon’é i ku a bai konfia den “e dios di suerte.”—Isaias 65:11, BPK.

Durante Edat Medio, miradó di destino tabata skohe un piedra presioso pa kada luna di aña. Nan tabata animá hende pa bisti e piedra presioso di e luna di nan nasementu, i esei supuestamente mester a protehá esun ku a bistié di daño. Pero ta inkorekto pa un kristian bai tras di e pronóstikonan di miradó di destino ya ku Beibel ta kondená nan.—Deuteronomio 18:9-12.

Lo ta inapropiá tambe pa un kristian duna nifikashon spesial na e echo ku un renchi tin un piedra di nasementu. Testigunan di Yehova no ta selebrá kumpleaño. Esei ta pa motibu ku tal selebrashon ta hala muchu atenshon na e persona i e úniko dos hasimentu di aña ku Beibel ta papia di dje ta esnan di gobernantenan ku no a sirbi Dios.—Génesis 40:20; Mateo 14:6-10.

Tin hende ta pensa ku bistimentu di renchi ku tin un piedra di nasementu tin un bon influensia riba nan personalidat. Sin embargo, kristiannan berdadero no ta kere den esei, pasobra nan sa ku ta bou di influensia di e spiritu santu di Dios i dor di apliká prinsipionan bíbliko nan por bisti “e hende [òf, “personalidat,” NW] nobo.”—Efesionan 4:22-24.

Un faktor masha importante pa tene kuenta kuné ta motivashon. Promé ku un kristian disidí si e ta bai bisti un renchi ku piedra di nasementu, ta bon pa e puntra su mes lo siguiente: ‘Mi kier bisti e renchi aki djis pasobra mi gusta e piedra presioso, apesar ku mi sa ku di otro banda e ta loke nan ta yama piedra di nasementu? Òf mi a laga mi mes wòrdu influensiá un tiki dor di ideanan superstisioso ku sierto hende tin di e piedranan presioso ei?’

Un kristian mester eksaminá su kurason pa e determiná ta kiko ta su motivashon tras di e asuntu. E Skritura ta bisa: “Warda bo kurason riba tur kos, pasobra e ta e fuente di bida.” (Proverbionan 4:23) Ora di tuma un desishon relashoná ku e asuntu di piedra di nasementu, kada kristian ta hasi bon di analisá ta kiko ta su motivashon tras di e asuntu i e posibel efektonan ku su desishon lo por tin riba su mes i riba otro hende.—Romanonan 14:13.