Kon Largu Hende Por Biba?

DIA 3 di mart 1513, e eksploradó spañó Juan Ponce de León a kuminsá un ekspedishon remarkabel. El a hisa bela bai for di Puerto Rico ku e speransa di yega na e isla di Bimini. Segun leyenda, e tabata en buska di un fuente di awa milagroso: e Fuente di Hubentut. Pero el a bin resultá na loke awe ta konosí komo e estado di Flórida, Merka. Klaru ku nunka e no a haña e fuente di awa, pasobra simplemente e no ta eksistí.

Awe, por lo general hende no ta biba muchu mas ku 70 òf 80 aña. Ounke Beibel ta papia di hende ku a biba hopi mas largu, e Guinness Book of World Records di aña 2002 ta bisa ku e persona ku a yega di alkansá e edat di mas haltu a biba 122 aña i 164 dia. (Génesis 5:3-32) Sin embargo, e spesialista den bio-étika, John Harris, a bisa: “Investigashon resien ta permití nos tira un bista den un mundu den kua biramentu bieu—i asta morto—kisas lo no ta inevitabel mas.” Vários investigadó di siglo 21 ta bisa ku hende lo ta “práktikamente inmortal,” ku “pa aña 2099 durashon di bida di e ser humano lo no tin límite,” ku “e kapasidat t’ei pa sèlnan sigui multipliká pa semper,” i kosnan por estilo.

Mark Benecke ta remarká den su buki The Dream of Eternal Life (E Soño di Bida Eterno): “Kasi henter e kurpa ta ser renobá vários biaha durante bida. . . . Despues di mas o ménos shete aña, nos ta un hende nobo den e sentido di mas kompletu di palabra.” Ma esaki no ta sigui pa tempu indefiní pasobra despues di un par di biaha predeterminá ku e sèlnan a dividí, nan ta stòp di multipliká nan mes. Pero Benecke ta bisa ku si esaki no tabata e kaso, “e kurpa humano lo por a renobá su mes pa un tempu hopi largu—asta pa semper.”

Konsiderá tambe e kapasidat asombroso di e selebro humano, lokual ta hopi mas grandi ku loke nos por usa durante nos bida relativamente kòrtiku. Segun Encyclopædia  Britannica, e selebro humano “ta dotá ku un potensial konsiderablemente mas grandi ku loke un persona por utilisá den su bida.” (Edishon di 1976, Volúmen 12, página 998) E buki How the Brain Learns (Kon e Selebro Ta Siña) di David A. Sousa ta bisa: “Práktikamente, e kapasidat di e selebro pa warda informashon ta sin límite.”—Página 78, Di Dos Edishon, derecho di outor 2001.

Dikon investigadónan no por haña den nos komposishon di kurpa e motibu pakiko nos ta bira bieu i muri? I pakiko e selebro humano tin un kapasidat asina enorme? Ta eksistí e posibilidat ku nos a ser diseñá pa sigui gana konosementu pa semper? Ki mishi nos ta imaginá nos mes un bida eterno?

Beibel ta deklará: “[Dios] a pone eternidat den nan kurason, sin ku hende por haña sa e trabou ku Dios a hasi for di prinsipio te na fin.” (Eklesiastés 3:11) E palabranan aki ta indiká ku Dios a hinka den nos e idea di biba pa semper. Es mas, semper nos lo tin algu ku nos por siña tokante Dios i su obranan. Si nos biba pa miónes i miónes di aña—sí, pa eternidat—semper nos lo por siña mas di e maravianan di Dios su kreashon.

E palabranan di Hesukristu tambe ta mustra ku hende por biba pa semper. El a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Kiko di abo? Bo ke biba pa semper?

[Plachinan na página 3]

Juan Ponce de León a buska un fuente di hubentut

[Rekonosementu]

Ponce de León: Harper’s Encyclopædia of United States History