Kon Bo Ta Disidí Loke Ta Bon i Loke Ta Malu?

KEN tin e outoridat pa fiha e normanan di loke ta bon i loke ta malu? E pregunta ei a lanta for di kuminsamentu di historia humano. Segun e buki bíbliko di Génesis, Dios a nombra un palu ku tabata kresiendo den e hòfi di Edén komo “e palu di konosementu di bon i malu.” (Génesis 2:9) El a prohibí e promé pareha humano di kome e fruta di e palu aki. Sin embargo, e enemigu di Dios, Satanas e Diabel, a insinuá ku si nan a kome for di e palu aki, nan wowo lo a “habri” i nan lo a bira “manera Dios, konosiendo bon i malu.”—Génesis 2:16, 17; 3:1, 5; Revelashon 12:9.

Kiko Adam ku Eva mester a hasi? Aseptá e normanan di Dios di loke ta bon i malu òf sigui nan mes normanan? (Génesis 3:6) Nan a opta pa desobedesé Dios i kome di e palu. Kiko nan a duna di konosé  ku e akto simpel aki? Dor di nenga di respetá e límitenan ku Dios a pone pa nan, nan a pretendé ku si nan fiha nan mes normanan di bon i malu, kos lo bai mihó ku nan i nan yunan. Kuantu éksito humanidat tabatin den nan intento pa aktua manera Dios, fihando nan mes normanan?

E Opinionnan Ta Varia

Despues di un análisis di e doktrinanan di filósofonan prominente di pasado, Encyclopædia Britannica ta deklará ku for di tempu di e filósofo griego Sócrates te ku siglo 20, tabatin “hopi debate riba kiko eksaktamente ta bondat i kiko e norma di bon i malu lo por ta.”

Por ehèmpel, e sofistanan tabata un grupo prominente di maestro griego den siglo 5 promé ku nos era. Nan a haña ku ta opinion di e mayoria mester determiná loke ta e normanan di bon i malu. Un di e maestronan ei a bisa: “Tur loke ta parse hustu i aseptabel pa un stat, ta hustu i aseptabel pa e stat ei, tanten ku ta reina e pensamentu ku ta asina mester ta.” Segun e norma aki, Jodie (menshoná den e artíkulo anterior) lo mester a keda ku e plaka ya ku mayoria hende den su komunidat, òf “stat,” probablemente lo a hasi meskos.

Immanuel Kant, un filósofo renombrá di siglo 18, a bini ku un otro punto di bista. E revista Issues in Ethics ta bisa: “Immanuel Kant i otro hende meskos kuné . . . a enfoká riba e derecho di kada hende pa skohe pa nan mes.” Segun e filosofia di Kant, tanten ku Jodie no trapa e derechi di otro hende, ta keda kompletamente na dje kiko e ta hasi. E no mester laga opinion di e mayoria determiná su normanan.

Pues kon Jodie a resolvé su dilema? El a skohe un di tres opshon. El a apliká e siñansa di Hesukristu ku a kontené normanan moral ku tantu kristian komo no-kristian a elogiá. Hesus a siña: “Tur loke boso kier pa hende hasi pa boso, hasi meskos pa nan.” (Mateo 7:12) Pa sorpresa di su kliente, Jodie a entreg’é e 82.000 dòler. Ora a puntra Jodie pakiko e no a keda ku e sèn, el a splika ku e ta un Testigu di Yehova, i el a bisa: “E plaka no tabata di mi.” Jodie a tuma e palabranan di Hesus skirbí den Beibel na Mateo 19:18 masha na serio: “No hòrta.”

Opinion di e Mayoria Ta un Guia Konfiabel?

Kisas algun hende lo bisa ku Jodie tabata basta kèns pa ta asina onesto. Pero opinion di e mayoria no ta un guia konfiabel. Por ehèmpel, si bo ta biba den un komunidat kaminda mayoria hende ta haña ku sakrifisio di mucha ta algu gewon, manera algun sosiedat den pasado tabata pensa, esei lo hustifiká e práktika? (2 Reinan 16:3) Kiko si bo a nase den un sosiedat ku ta mira kanibalismo komo algu bon? Esei lo nifiká ku komementu di karni humano no ta dje malu ei? No ta pasobra un kustumber ta popular, e ta bon. Hopi tempu pasá, Beibel a spièrta hende pa e  trampa ei, bisando: “No sigui e mayoria den hasimentu di maldat.”—Eksodo 23:2.

Hesukristu a mustra un otro motibu pakiko nos mester tene kuidou ku adoptá un opinion popular komo guia di loke ta bon i loke ta malu. El a identifiká Satanas komo “e prens di e mundu aki.” (Juan 14:30; Lukas 4:6) Satanas ta usa su posishon pa gaña “henter mundu.” (Revelashon 12:9) P’esei, si bo basa bo normanan di bon i malu puramente riba loke ta popular, bo por ta adoptando Satanas su norma di moralidat, i esei sigur lo ta desastroso.

Bo Por Konfia Bo Mes Manera di Pensa?

Ta kada hende anto mester disidí pa su mes loke ta bon i loke ta malu? Beibel ta bisa: “No dependé riba bo mes komprondementu.” (Proverbionan 3:5) Pakiko nò? Pasobra tur hende a heredá un defekto fundamental ku por stroba nan di pensa sano. Ora Adam ku Eva a rebeldiá kontra Dios, nan a adoptá e normanan di e traidó egoista Satanas i a skohe é komo nan tata spiritual. Despues nan a pasa pa nan yunan un karakterístika típiko di nan famia: un kurason traishonero ku tin e kapasidat pa rekonosé loke ta bon pero ku tin e tendensia di hasi loke ta malu.—Génesis 6:5; Romanonan 5:12; 7:21-24.

Den su análisis tokante étika, Encyclopædia Britannica ta remarká: “No ta parse nada straño ku hende sa kiko ta nan deber moral pero tòg ta hasi loke ta na nan propio interes. Un dje problemanan prinsipal di e mundu oksidental ta kon pa duna hende asina un motibu pa hasi loke ta bon.” Beibel ta bis’é korektamente den e forma aki: “E kurason ta mas engañoso ku tur kos i ta totalmente korupto; ken por komprond’é?” (Jeremias 17:9) Lo bo konfia un persona ku ta konosí komo un hende engañoso i korupto?

Ta bèrdat ku asta hende ku no ta kere den Dios tin e kapasidat pa komportá nan mes den un manera moralmente rekto i desaroyá étika òf normanan moral ku ta práktiko i onorabel. Pero hopi bes, e prinsipionan noble tras di esakinan ta djis un refleho di e normanan moral di Beibel. Ounke kisas e personanan aki no ta kere ku ta eksistí un Dios, nan ideanan ta demostrá ku di naturalesa nan tin e potensial pa reflehá e personalidat di Dios. Esaki ta demostrá ku manera Beibel ta revelá, hende a ser kreá originalmente segun e “imágen di Dios.” (Génesis 1:27; Echonan 17:26-28) Apòstel Pablo ta bisa: “Nan ta mustra e obra di lei ku ta skirbí den nan kurason.”—Romanonan 2:15.

Naturalmente, ta bon pa bo sa kiko ta korekto; pero loke ta konta ta pa bo tin e forsa moral pa hasi loke ta korekto. Kon bo por haña e fortalesa moral nesesario? Ya ku ta bo kurason ta motivá bo pa aktua, algu ku por yuda bo desaroyá e fortalesa ei ta di kultivá un amor pa e Outor di Beibel, Yehova Dios.—Salmo 25:4, 5.

Kon pa Haña e Forsa pa Hasi Loke Ta Bon

E promé paso pa siña stima Dios ta pa nos mes mira kon rasonabel i práktiko su mandamentunan ta. Apòstel Juan ta bisa: “Esaki ta e amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) Por ehèmpel, Beibel ta kontené konseho práktiko ku por yuda hóbennan distinguí bon for di malu ora nan tin ku disidí si ta sabí pa bebe alkohòl, usa droga, òf tene relashon seksual promé ku nan kasa. Beibel por yuda parehanan kasá diserní kon pa resolvé desakuerdo, i e por duna mayornan  guia pa lanta yu. * Ora apliká e normanan moral di Beibel, esei ta benefisiá tantu hóben komo bieu, sin importá ki nivel sosial, skol òf kultura nan tin.

Meskos ku alimento nutritivo ta duna bo forsa pa bo traha, lesamentu di e Palabra di Dios ta duna bo forsa pa bo biba segun su normanan. Hesus a kompará e palabranan di Dios ku pan ku ta sostené bida. (Mateo 4:4) Tambe el a bisa: “Mi kuminda ta pa hasi e boluntat di esun ku a manda mi.” (Juan 4:34) Hesus a alimentá su mes ku e palabra di Dios i esei a yud’é resistí tentashon i tuma desishon sabí.—Lukas 4:1-13.

Na prinsipio kisas bo ta haña ta difísil pa alimentá bo mente ku e Palabra di Dios i adoptá su normanan. Pero kòrda ku tempu bo tabata chikí, podisé bo no tabata gusta e smak di kuminda ku tabata bon pa bo. Pa krese bira fuerte, bo tabatin ku siña disfrutá di tal alimento saludabel. Meskos tambe, por tuma tempu pa bo haña un smak p’e normanan di Dios. Si bo persistí, lo bo bin stima nan i bira spiritualmente fuerte. (Salmo 34:8; 2 Timoteo 3:15-17) Lo bo siña konfia den Yehova i ser motivá pa “hasi loke ta bon.”—Salmo 37:3.

Kisas nunka lo bo no haña bo den un situashon manera esun di Jodie. No opstante, tur dia bo ta tuma desishon moral, sea chikitu òf grandi. P’esei Beibel ta urgi bo: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Proverbionan 3:5, 6) Konfiansa den Yehova no solamente lo benefisiá bo awor sino tambe lo e duna bo e oportunidat di biba pa semper, pasobra e kaminda di obedensia na Yehova Dios ta hiba na bida.—Mateo 7:13, 14.

[Nota]

[Komentario na página 6]

Opinion di e mayoria por ta bou di influensia di forsanan invisibel

[Plachinan na página 5]

Atraves di historia, filósofonan a debatí e kuestion di kiko ta bon i kiko ta malu

SÓCRATES

KANT

CONFUCIO

[Rekonosementu]

Kant: For di e buki The Historian’s History of the World; Sócrates: For di e buki A General History for Colleges and High Schools; Confucio: Universidat di Sung Kyun Kwan, Seul, Korea

[Plachinan na página 7]

Beibel no solamente ta yuda nos distinguí bon for di malu sino tambe e ta motivá nos pa hasi loke ta bon