HESUKRISTU a siña su siguidónan: “Hasi orashon anto asin’aki: ‘Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.’” (Mateo 6:9, 10) E orashon aki ku hopi hende konosé komo e Orashon di Nos Tata, ta splika e propósito di e Reino di Dios.

Mediante e Reino, Dios su nòmber lo ser santifiká. Ke men, e Reino lo limpia Dios su nòmber di tur e desonor ku e rebelion di Satanas i di hende a montoná riba dje. Esaki ta masha importante. Felisidat di tur kriatura inteligente ta dependé di si nan ta konsiderá Dios su nòmber komo sagrado i boluntariamente ta aseptá su derecho di goberná.—Revelashon 4:11.

Ademas, e Reino ta ser establesé pa laga Dios su “boluntat sosodé na tera meskos ku den shelu.” I kiko ta su boluntat? Esei ta pa restorá e relashon entre Dios i humanidat ku Adam a pèrdè. Tambe e Reino lo kumpli ku e propósito di e Soberano Universal, Yehova, pa establesé un paradeis riba tera kaminda bon hende por disfrutá di bida pa semper. Sí, e Reino di Dios lo deshasí tur e daño kousá pa e piká original i lo hasi Dios su propósito amoroso pa e tera un realidat. (1 Juan 3:8) De echo, e Reino aki i loke lo e logra, ta e mensahe prinsipal di Beibel.

E Reino di Dios ta un berdadero gobièrnu ku tin gran poder. Profeta Daniel ta duna nos un idea kon poderoso e ta. Hopi tempu pasá, el a predisí: “E Dios di shelu lo lanta un reino ku . . . lo garna i pone un fin na tur e reinonan [humano].” Ademas, na kontraste ku gobièrnunan humano, ku atraves di historia a bin na poder i despues a baha, e Reino di Dios sí “nunka lo no wòrdu destruí.” (Daniel 2:44) Pero esei no ta tur kos. E Reino aki den tur aspekto ta hopi mas superior ku kualke gobièrnu humano.

E Reino di Dios tin un Rei superior.

Wak ta ken e Rei ei ta. Den “un soño i vishonnan” ku a ser duná na Daniel, el a mira kon e Gobernante di e Reino di Dios ku tabata “manera un Yu di hende” a keda presentá dilanti di Dios Todopoderoso i duná “dominio, gloria i un reino” eterno. (Daniel 7:1, 13, 14) E Yu di hende no ta ningun otro sino Hesukristu, e Mesias. (Mateo 16:13-17) Yehova Dios a apuntá su propio Yu, Hesus, komo Rei di Yehova su Reino. Ora ku Hesus tabata riba tera, el a bisa e fariseonan malbado: “E reino di Dios ta meimei di boso.” E tabata ke men ku é, e futuro Rei di e Reino ei, tabata riba tera huntu ku nan.—Lukas 17:21.

Ken riba tera for di entre humanidat por igualá Hesus su kredensialnan komo Gobernante? Hesus a demostrá kaba di ta un Lider kompletamente hustu, konfiabel i yen di kompashon. E Evangelionan ta present’é komo un persona dinámiko i tambe komo un persona ku tierno kariño i hopi sintimentu.  (Mateo 4:23; Marko 1:40, 41; 6:31-34; Lukas 7:11-17) Ademas, awor ku Hesus a ser resusitá pa biba den shelu, e no ta sometí na morto ni na otro limitashonnan humano.—Isaias 9:6, 7.

Hesus i su kompañeronan ta reina for di un posishon superior.

Den e vishon ku Daniel a haña den un soño, el a mira tambe ku gobernashon òf dominio a “wòrdu duná na e pueblo di e santunan.” (Daniel 7:27) Hesus no ta goberná su so. E tin mas personanan huntu kuné ku lo goberná komo rei i sirbi komo saserdote. (Revelashon 5:9, 10; 20:6) Apòstel Juan a skirbi relashoná ku nan: “Mi a wak, i ata e Lamchi tabata pará riba Seru Sion, i huntu kuné 144.000 . . . ku a wòrdu kumprá for di tera.”—Revelashon 14:1-3.

E Lamchi ta Hesukristu despues ku el a keda instalá komo Rei di e Reino. (Juan 1:29; Revelashon 22:3) E Seru Sion aki ta referí na shelu. * (Hebreonan 12:22) Hesus ku su 144.000 kompañeronan ta goberná for di shelu. Esei ta un posishon masha elevá pa goberná for di dje! Siendo den shelu, nan tin un perspektiva mas amplio. Komo ku shelu ta e asiento di “e Reino di Dios,” e ta ser yamá tambe “e reino di shelu.” (Lukas 8:10; Mateo 13:11) Ningun arma, ni sikiera atakenan nuklear, por yega na e gobièrnu selestial ei, te pa nan tumb’é. E ta invensibel i lo kumpli ku e propósito ku Yehova tin p’e.—Hebreonan 12:28.

E Reino di Dios tin representantenan konfiabel riba tera.

Kon nos por sa esaki? Salmo 45:16 [NW] ta deklará: “Lo bo nombra . . . prens riba tur e tera.” E “bo” den e profesia aki ta referí na e Yu di Dios. (Salmo 45:6, 7, NW; Hebreonan 1:7, 8, NW) Pues, Hesukristu mes lo nombra e representantenan ku ta manera prens. Nos por tin sigur ku nan lo kumpli fielmente ku su instrukshon. Awe mes, hòmbernan kualifiká ku ta sirbi komo ansiano den e kongregashon kristian ta ser siñá pa no ‘dominá’ riba nan rumannan den fe, sino mas bien pa nan protehá, refreská i konsolá nan.—Mateo 20:25-28; Isaias 32:2.

E Reino tin súpditonan hustu.

Nan ta personanan rekto i sin kulpa den bista di Dios. (Proverbionan 2:21, 22) Beibel ta bisa: “E humildenan lo heredá e tera, i lo deleitá nan mes den pas abundante.” (Salmo 37:11) E súpditonan di e Reino ta hende mansu, dispuesto pa siña, humilde i suave. Nan interes prinsipal ta asuntunan spiritual. (Mateo 5:3, NW) Nan ke hasi loke ta korekto i ta reakshoná umbes riba Dios su instrukshon.

E Reino di Dios ta ser dirigí pa leinan superior.

E leinan i prinsipionan ku ta dirigí e Reino ta bin for di Yehova Dios mes. Na lugá di restringí nos inhustamente, e leinan ei ta benefisiá nos. (Salmo 19:7-11) Hopi hende ta benefisiando kaba di ta biba na armonia ku Yehova su rekisitonan hustu. Por ehèmpel, si nos hasi kaso di e konseho bíbliko duná na esposo-, esposa- i yunan, nos bida di famia ta mehorá. (Efesionan 5:33–6:3) Ora ku nos ta obedesé e mandamentu pa “bisti amor,” nos relashon ku otro hende ta drecha. (Kolosensenan 3:13, 14) Segun ku nos ta biba na armonia ku prinsipionan bíbliko, nos ta kultivá tambe bon kustumbernan di traha i un punto di bista balansá di plaka. (Proverbionan 13:4; 1 Timoteo 6:9, 10) Nos ta evitá buracheria, inmoralidat seksual, tabako i droga, i asina nos ta yuda protehá nos salú.—Proverbionan 7:21-23; 23:29, 30; 2 Korintionan 7:1.

E Reino di Dios ta un gobièrnu dekretá pa Dios. Su Rei—e Mesias, Hesukristu—i tur su ko-gobernantenan ta responsabel dilanti Dios pa sostené Su leinan hustu i prinsipionan amoroso. Pa e súpditonan di e Reino, inkluso pa su representantenan riba tera, ta un delisia pa biba na armonia ku e leinan di Dios. Pues, Dios ta e interes prinsipal di e  gobernantenan i di e súpditonan di e Reino. P’esei e Reino ta un berdadero teokrasia, es desir, un gobernashon ehersé pa Dios. Ta sigur ku e gobernashon aki lo kumpli ku e propósito pa kua el a ser establesé. Pero ki tempu e Reino di Dios, konosí tambe komo e Reino Mesiániko, ta kuminsá goberná?

Den e palabranan di Hesus nos ta haña un faktor klave pa komprondé ki tempu gobernashon di e Reino ta kuminsá. El a bisa: “Yerusalèm lo wòrdu trapá dor di e paganonan te ora ku e tempunan di e paganonan keda kumplí.” (Lukas 21:24) Yerusalèm tabata e úniko stat riba tera ku tabata direktamente asosiá ku e nòmber di Dios. (1 Reinan 11:36; Mateo 5:35) E tabata e kapital di un reino terenal ku Dios a aprobá i apoyá. E stat ei lo a ser trapá pa e nashonnan pagano den e sentido ku e gobernashon ku Dios a ehersé riba su pueblo lo a keda interumpí pa gobièrnunan mundano. Na ki tempu esaki lo a kuminsá?

Na e último rei ku a sinta riba e trono na Yerusalèm a ser bisá: “Lòs tulban i kita korona . . . Esaki tampoko lo no t’ei mas, te ora ku esun bin ku tin derecho riba dje; i lo mi dun’é esei.” (Ezekiel 21:25-27) E korona lo a ser kitá for di kabes di e rei ei, i Dios su gobernashon riba Su pueblo lo a keda interumpí. Esaki a tuma lugá na aña 607 promé ku nos era [P.E.K.], ora ku e babilonionan a destruí Yerusalèm. Durante “e tempunan di e paganonan” ku lo a sigui, Dios lo no tabatin un gobièrnu riba tera pa representá su gobernashon. Ta te na final di e periodo di tempu ei Yehova lo a duna e poder di goberná na esun “ku tin derecho riba dje,” esta, Hesukristu. Kon largu e periodo ei lo tabata?

Un profesia den e buki bíbliko di Daniel ta deklará: “Basha e palu abou i destruyé, ma laga e tronkon ku su raisnan keda den tera, ma ku un banchi di heru i bròns rònt di dje . . . te ora shete periodo di tempu pasa riba dje.” (Daniel 4:23) Manera nos ta bai mira, e “shete periodo di tempu” menshoná den e versíkulo aki ta mesun largu ku “e tempunan di e paganonan.”

Den Beibel, tin biaha palu ta representá personanan individual, gobernantenan i reinonan. (Salmo 1:3; Jeremias 17:7, 8; Ezekiel, kapítulo 31) E palu simbóliko “tabata visibel te na e fin di henter tera.” (Daniel 4:11) Pues, e gobernashon representá pa e palu ku lo a ser bashá abou i mará ku banchi rònt di dje, a ekstendé “te na e fin di henter tera,” loke a enserá henter e reino di humanidat. (Daniel 4:17, 20, 22) Ke men, e palu ta representá Dios su gobernashon supremo, partikularmente pa ku tera. Pa un tempu Yehova a ehersé e gobernashon aki riba tera mediante e reino ku el a pone riba e nashon di Israel. Pero a basha e palu simbóliko abou, i a pone banchi di heru i bròns rònt di e tronkon pa asina strob’é di krese. Esaki a indiká ku e reino ku Dios tabata usa pa goberná riba tera lo a stòp di funshoná —manera a pasa na aña 607 P.E.K.—pero no pa tempu indefiní. E palu lo a keda ku banchi rònt di dje te ora ku “shete periodo di tempu” a pasa. Na fin di e periodo ei, Yehova lo a duna gobernashon na e heredero legítimo, Hesukristu. Klaramente anto, e “shete periodo di tempu” i “e tempunan di e paganonan” ta referí na e mesun periodo.

Beibel ta yuda nos determiná e largura di e “shete periodo di tempu.” Beibel ta indiká ku 1.260 dia ta igual ku “un tempu i tempunan [dos tempu, plural] i mitar di un tempu,” pa un total di tres “tempu” i mitar. (Revelashon 12:6, 14) Esaki ta nifiká ku dos biaha e kantidat ei, esta, shete tempu, ta 2.520 dia.

Ora nos konta 2.520 dia literal for di aña 607 P.E.K., nos ta yega na aña 600 P.E.K. Sin embargo, e shete periodo di tempu a dura hopi mas largu ku esei. E tabata den progreso ainda ora ku Hesus a papia di “e tempunan di e paganonan.” P’esei e shete periodo di tempu ta profétiko. Pues nos tin ku apliká e regla bíbliko: “Un aña pa kada dia.” (Numbernan 14:34; Ezekiel 4:6) Den tal kaso, e shete periodo di tempu ku mundu a ser dominá pa podernan mundano sin interferensia divino ta suma 2.520 aña. Si nos konta 2.520 aña for di 607 P.E.K., nos ta yega na aña 1914 di nos era [E.K.]. Esei ta e aña ora ku “e tempunan di e paganonan,” òf shete periodo di tempu, a terminá. Esaki ta nifiká ku Hesukristu a kuminsá goberná komo Rei di e Reino di Dios na aña 1914.

Ya ku e Reino Mesiániko a ser establesé den shelu kaba, nos lo tin ku sigui pidi den orashon pa e bin, manera Hesus a siña den e orashon modelo? (Mateo 6:9, 10) Sí. E petishon ei ta na su lugá i te ainda e ta válido. E Reino di Dios pronto lo demostrá su pleno poder pa ku e tera aki.

Humanidat lo eksperensiá bendishonnan grandi ora ku esei sosodé! Beibel ta bisa: “Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:3, 4) Na e tempu ei, “ningun habitante lo no bisa: ‘Mi ta malu.’” (Isaias 33:24) E personanan ku ta agradá Dios lo haña bida eterno. (Juan 17:3) Segun ku nos ta warda riba kumplimentu di e profesianan bíbliko aki i otro profesianan maravioso, laga nos sigui “buska promé e reino di Dios i Su hustisia.”—Mateo 6:33.