1-3. (a) Dikon Hosue ta un bon ehèmpel pa nos? (b) Kiko nos mester keda kòrda ora nos tin ku tuma desishon?

“SKOHE” ta un palabra hopi importante. Ora un persona por skohe, esei ta indiká ku e tin vários opshon i ku, te na sierto grado, e por kontrolá e rumbo ku su bida lo sigui. Por ehèmpel, pensa riba un hòmber ku ta kana i diripiente e ta ripará ku e kaminda ta splet bai den dos direkshon diferente. Kua direkshon lo e skohe? Si e hòmber tin un destinashon na mente, lo e skohe probablemente esun ku ta hib’é mas serka di e kaminda ku e ke bai, en bes di e otro ku lo hib’é mas leu for di einan.

² Den Beibel tin hopi ehèmpel di hende ku a haña nan den un situashon similar. Por ehèmpel, Kain tabatin ku disidí si lo el a kontrolá su rabia òf nò. (Gén. 4:6, 7) Hosue mester a skohe si lo el a sigui sirbi e Dios berdadero òf bai adorá dios falsu. (Hos. 24:15) Hosue su meta tabata pa keda serka di Yehova. Pues, el a skohe e kaminda ku lo a hib’é den e direkshon ei. Kain no tabatin e meta ei, pues el a skohe e kaminda ku a aleh’é for di Yehova.

³ Tin biaha nos tambe tin ku skohe entre dos opshon. Den tal kaso, kòrda kiko ta bo destinashon òf meta: laga tur loke bo ta hasi trese gloria pa Yehova i evitá kualke kos ku lo alehá bo for di dje. (Lesa Hebreonan 3:12.) Den e artíkulo akí i esun siguiente, nos lo analisá shete área di bida den kua nos no mester laga nada alehá nos for di Yehova.

4. Dikon ta importante pa nos traha pa nos pan di kada dia?

⁴ Kristiannan tin e obligashon di traha pa mantené nan mes i nan famia. Beibel ta mustra ku si un hende no ke perkurá pa su hendenan di kas, e ta pió ku un  persona sin fe. (2 Tes. 3:10; 1 Tim. 5:8) Pues, ta bisto ku trabou ta un parti importante di bida, pero si bo no tene kuidou, bo trabou i karera lo por alehá bo for di Yehova. Kon asina?

5. Kua ta algun faktor importante ku bo mester tuma na kuenta promé ku bo aseptá un trabou?

⁵ Suponé ku bo ta buska trabou. Si bo ta biba den un pais kaminda trabou ta skars, lo bo por sinti e tentashon pa aseptá kualke trabou ku nan ofresé bo. Pero kiko si e tipo di trabou ei no ta kuadra ku prinsipionan di Beibel? Kiko si e orario di trabou, e kareda ku bo tin ku kore pa yega trabou òf e biahamentu pa trabou lo stroba bo di partisipá den aktividatnan kristian òf di pasa tempu ku bo famia? Lo bo mester tuma e trabou numa, pensando ku maske e no ta kumbiní bo, e ta mihó ku nada? No lubidá ku si bo skohe e kaminda robes, esei por alehá bo for di Yehova. (Heb. 2:1) Sea ku bo ta buskando trabou òf bo tin pensá di kambia di trabou, kon bo por tuma un desishon sabí?

6, 7. (a) Ku ki meta un persona lo por aseptá un trabou? (b) Ki meta lo hiba bo mas serka di Yehova, i dikon?

⁶ Manera nos a menshoná anteriormente, semper kòrda kiko ta bo destinashon òf meta. Puntra bo mes: ‘Kiko mi ke logra ku mi trabou òf karera?’ Si bo ta konsiderá bo trabou simplemente komo un medio pa logra un meta, esta, pa mantené abo ku bo famia den Yehova su sirbishi, Yehova lo bendishoná bo esfuerso. (Mat. 6:33) Yehova lo no keda tur tolondrá, sin sa kiko pa hasi, si bo mester pèrdè trabou òf si diripiente e situashon ekonómiko bira malu. (Isa. 59:1) Beibel ta bisa ku e “sa kon pa libra hende deboto na dje for di prueba.”—2 Ped. 2:9.

⁷ Di otro banda, kiko si bo ta traha ku e meta pa bira riku? Kisas lo bo logra esei. Pero asta si bo logra, no lubidá ku lo bo tin ku paga karu pa e “éksito” ei; e tin un preis ku bo no por afòrt. (Lesa 1 Timoteo 6:9, 10.) Si rikesa i trabou ta e kos di mas importante den bo bida, lo bo logra un kos so: alehá bo mes for di Yehova.

8, 9. Kiko mayornan mester puntra nan mes relashoná ku nan trabou òf karera? Splika dikon.

⁸ Si bo ta un mayor, pensa riba ki efekto bo ehèmpel lo tin riba bo yunan. Kiko nan ta mira ku ta e kos di mas importante pa bo? Bo karera òf bo amistat ku Yehova? Si nan ta mira ku loke ta bini na promé lugá den bo bida ta posishon, prestigio i rikesa, bo no ta kere ku nan lo imitá bo i sigui e kaminda desastroso ei? Òf ku nan lo por pèrdè rèspèt pa bo komo mayor? Un mucha muhé kristian a bisa: “Te asina leu ku mi ta kòrda, semper mi tata tabata masha okupá ku su trabou. Na prinsipio, tabata parse ku el a traha asina duru pasobra e tabata ke pa nos famia tin lo mihó. E tabata ke pa nos ta bon kuidá. Pero den e último añanan algu a kambia. E ta blo traha i traha, anto ta kumpra kos di luho en bes di kos ku ta nesesario. Komo resultado, nos ta konosí komo e famia ku tin hopi plaka i no komo e famia ku ta animá otronan pa alkansá metanan spiritual. Lo mi a preferá mil biaha ku mi tata tabata duna mi apoyo spiritual en bes di plaka.”

⁹ Mayornan, no pone demasiado énfasis riba boso karera i asina alehá boso mes for di Yehova. Sea un ehèmpel pa boso yunan. Mustra nan ku boso di bèrdat ta kere ku e rikesa di mas grandi ku nos por tin ta rikesa spiritual, esta, un bon relashon ku Yehova, i no plaka òf kos material.—Mat. 5:3.

10. Kiko un hóben mester pensa ariba promé ku e skohe un karera òf e tipo di trabou ku lo e bai hasi?

¹⁰ Si bo ta un hóben ku ta pensando riba un karera òf e tipo di trabou ku lo bo ke hasi ora bo bira grandi, kon bo por skohe e  kaminda korekto? Manera nos a konsiderá kaba, bo tin ku sa promé kiko bo ke hasi ku bo bida, kua rumbo bo ke bai. E estudio i trabou ku bo ke skohe lo duna bo oportunidat pa partisipá mas plenamente den aktividatnan di Reino, òf lo e alehá bo for di Yehova? (2 Tim. 4:10) Bo meta ta pa imitá e estilo di bida di e hendenan di mundu kende nan felisidat ta dependé di e kantidat di sèn ku nan tin na banko òf di e situashon di e merkado finansiero? Òf lo bo skohe pa imitá e konfiansa ku David tabatin den Yehova? David a skirbi: “Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.” (Sal. 37:25) Kòrda: Un kaminda lo alehá bo for di Yehova, miéntras ku e otro lo hiba bo na e mihó bida ku lo bo por tin. (Lesa Proverbionan 10:22; Malakías 3:10.) Kua lo bo skohe? *

11. Kiko Beibel ta rekonosé tokante rekreo i dibertishon, pero kiko nos mester keda kòrda?

¹¹ Beibel no ta kontra pa hende dibertí, ni e no ta pinta rekreo i dibertishon komo pèrdèmentu di tempu. Pablo a bisa Timoteo: “Entrenamentu físiko ta yuda ku algu.” (1 Tim. 4:8) Beibel ta asta bisa ku tin “un tempu pa hari” i “un tempu pa baila,” i e ta stimulá hende pa reservá un tempu rasonabel pa sosegá. (Ekl. 3:4; 4:6) Pero si bo no tene kuidou, rekreo i dibertishon por alehá bo for di Yehova. Kon asina? E peliger ta dependé prinsipalmente di dos aspekto: Ki tipo di rekreo i dibertishon bo ta skohe i kuantu tempu bo ta dediká na nan.

12. Ki faktornan bo mester tuma na kuenta relashoná ku e tipo di rekreo i dibertishon ku bo ta skohe?

¹² Promé, laga nos analisá e tipo di rekreo i dibertishon ku nos mester skohe. Un kos ta sigur, bo por haña formanan sano di rekreo i dibertishon. Pero ta bèrdat tambe ku gran parti di loke ta disponibel den mundu ta glorifiká kosnan ku Dios ta odia, entre otro, violensia, spiritismo i relashon seksual inmoral. Pues, bo tin ku tene kuidou ki tipo di rekreo i dibertishon bo ta skohe. Pensa riba e preguntanan akí: Ki efekto e tin riba mi? E ta stimulá un spiritu violento, kompetitivo òf nashonalista?  (Pro. 3:31) E ta kosta mi muchu plaka? E por pone hende trompeká? (Rom. 14:21) Ku ki tipo di hende e ta pone mi asosiá? (Pro. 13:20) E ta duna mi gana di hasi malu?—Sant. 1:14, 15.

13, 14. Kiko bo mester tuma na kuenta relashoná ku e kantidat di tempu ku bo ta dediká na aktividatnan di rekreo?

¹³ Pensa tambe riba e kantidat di tempu ku bo ta dediká na rekreo i dibertishon. Puntra bo mes: ‘Mi ta dediká asina tantu tempu na aktividatnan di rekreo ku kasi mi no ta sobra tempu pa aktividatnan spiritual?’ Si bo ta dediká muchu tempu na rekreo i dibertishon, lo bo ripará ku tòg bo no ta disfrutá dje tantu ei di nan manera mester ta. De echo, hende ku ta tene dibertishon na su debido lugá ta disfrutá mas di dje. Dikon? Pasobra nan sa ku nan a atendé “e kosnan mas importante” promé, pues nan no tin nodi di sinti nan kulpabel ora nan ta dibertí.—Lesa Filipensenan 1:10, 11.

¹⁴ Aunke ta parse dushi si bo por dediká hopi tempu na aktividatnan di rekreo, e kaminda ei lo por alehá bo for di Yehova. Kim, un ruman muhé di 20 aña, a siña esei di eksperensia. El a konta kon e tabata bai tur fiesta ku tin. Tur wikènt tabatin un kos spesial: djabièrnè, djasabra i djadumingu. Pero awor e ta mira ku tin asina tantu kos di hasi ku ta muchu mas importante. E di: “Por ehèmpel, komo pionero, mi ta lanta 6 or di mainta pa bai sirbishi di vèlt, pues mi no por keda serka mi amigunan te 1 or òf 2 or di mardugá. Mi sa ku no ta tur aktividat sosial ta malu, pero nan por kita tur bo atenshon for di loke ta mas importante. Meskos ku tur otro kos, mester tene nan na nan debido lugá.”

15. Kon mayornan por yuda nan yunan disfrutá di rekreo refreskante?

¹⁵ Mayornan tin e responsabilidat di perkurá pa nan mes i pa nan yunan den sentido material, spiritual i emoshonal. Esei ta enserá perkurá pa nan por distraí nan mente. Si bo ta un mayor, no sea un ‘aguafiestas’ ku ta konsiderá tur rekreo komo algu malu. Pero na mesun tempu, bo tin ku keda alerta pa influensianan perhudisial. (1 Kor. 5:6) Ku bon planiamentu, bo por haña rekreo i dibertishon ku di bèrdat ta refreská bo famia. * Di e manera ei, abo ku bo yunan lo skohe e kaminda ku lo hiba boso mas serka di Yehova.

16, 17. Ki situashon doloroso hopi mayor ta enfrentá, i kon bini nos sa ku Yehova ta komprondé nan doló?

¹⁶ E laso entre mayor i yu ta asina fuerte ku Yehova ta usa e relashon ei pa ilustrá e amor ku e tin pa su pueblo. (Isa. 49:15) Pues, ta normal pa sinti un tristesa profundo ora un miembro di famia bandoná Yehova. Un ruman muhé, kende su yu muhé a ser ekspulsá, a konta: “Mi a keda hopi kibrá. Mi tabata blo puntra mi mes, ‘Dikon el a bandoná Yehova?’ Mi tabata sinti ku ta mi falta.”

¹⁷ Si bo ta pasando den un situashon asina, Yehova ta komprondé bo doló. E mes tambe “tabata tristu den su kurason” ora ku e promé miembro di su famia humano, i despues mayoria di hende ku a biba promé ku Diluvio, a rebeldiá kontra dje. (Gén. 6:5, 6) Kisas ta difísil pa un hende ku nunka a pasa den e situashon ei komprondé ki teribel esei por ta. Sinembargo, lo no ta sabí pa laga e mal kondukta di un miembro di famia ekspulsá pone abo alehá for di Yehova. Pues, kon bo por perseverá apesar di e tristesa profundo ku bo ta sinti ora un miembro di famia bandoná Yehova?

18. Dikon mayornan no mester kulpa nan mes ora un yu bandoná Yehova?

 ¹⁸ No kulpa bo mes pa loke a pasa. Yehova a pone dilanti di kada persona e opshon di skohe, di tuma nan propio desishon, i kada miembro di famia dediká i batisá tin ku “karga su propio karga di responsabilidat.” (Gal. 6:5) Na final di kuenta, Yehova ta tene e pekadó—no abo—responsabel pa loke el a skohe. (Eze. 18:20) No kulpa otro hende tampoko. Respetá e manera ku Yehova ta disipliná su pueblo. Tuma bo posishon kontra Diabel, no kontra e wardadónan ku ta tuma medida pa protehá e kongregashon.—1 Ped. 5:8, 9.

19, 20. (a) Kon mayornan di yunan ekspulsá por trata ku nan tristesa? (b) Ki speransa e mayornan ei por karga?

¹⁹ Di otro banda, kiko lo pasa si bo rabia ku Yehova pa loke a pasa ku bo yu? Esei lo alehá bo for di Yehova. Pero loke en realidat bo ser kerí mester mira ta bo determinashon firme di pone Yehova promé ku tur kos, inkluso promé ku laso di famia. Pues pa trata ku e situashon, sòru di konserbá bo spiritualidat. No isolá bo mes for di bo fiel rumannan kristian. (Pro. 18:1) Deshogá bo serka Yehova den orashon. (Sal. 62:7, 8) No buska èksküs pa asosiá ku un miembro di famia ekspulsá, por ehèmpel, via sms, telefòn òf e-mail. (1 Kor. 5:11) Keda okupá den aktividatnan spiritual. (1 Kor. 15:58) E ruman muhé sitá anteriormente a bisa: “Mi sa ku mi mester keda okupá den e sirbishi di Yehova i mantené mi mes spiritualmente fuerte ya ora mi yu muhé bini bèk serka Yehova lo mi ta den e posishon pa yud’é.”

²⁰ Beibel ta bisa ku amor ta “spera tur kos.” (1 Kor. 13:4, 7) Pues, no tin nada malu den karga e speransa ku bo ser kerí lo bini bèk serka Yehova. Tur aña, hopi persona ekspulsá ta arepentí i bini bèk na Yehova su organisashon. Yehova no ta keda rabiá ku nan despues ku nan arepentí. Al kontrario, e ta “kla pa pordoná.”—Sal. 86:5.

21, 22. Den ki manera bo ta determiná pa usa bo libertat di skohe?

²¹ Yehova a krea hende ku libertat di skohe, esta, boluntat liber. (Lesa Deuteronomio 30:19, 20.) Pero e libertat ei ta nifiká ku nos tin un responsabilidat serio. Kada kristian mester puntra su mes: ‘Riba kua kaminda mi ta? Mi a laga trabou i karera, rekreo i dibertishon òf laso di famia alehá mi for di Yehova?’

²² Yehova nunka ta stòp di stima su pueblo. E úniko kos ku lo por alehá nos for di Yehova ta si nos skohe pa sigui un mal kaminda. (Rom. 8:38, 39) Pero esei no tin nodi di sosodé! Sea determiná pa no laga nada alehá bo for di Yehova. E siguiente artíkulo lo trata kuater área di bida mas den kua bo por demostrá e determinashon ei.