Den antigwedat, hopi nashon tabata ehekutá sierto kriminalnan klabando nan na un staka, òf palu. E romanonan tabata mara òf klaba un persona asina bibu na staka; e tabata keda asina kisas pa vários dia te ora ku e muri di doló, set, hamber i di e efektonan di elementonan di naturalesa. Pa e romanonan, kastigu di morto na un staka tabata un kastigu bergonsoso, reservá pa e kriminalnan di mas baho.

Kiko di e nashon di Israel di antigwedat? E israelitanan a ehekutá kriminalnan kologando nan na staka? E Lei di Moises a bisa: “Si un hòmber a kometé un piká digno di morto i e wòrdu matá, i boso kolog’é na un palu, e ora ei su kurpa no mester keda kologá henter anochi na e palu, ma siguramente bo mester der’é riba e mesun dia.” (Deu. 21:22, 23) Ta klaru anto ku, den tempu di e Skritura Hebreo, un persona ku a meresé morto a ser matá promé ku a kolog’é na staka, òf palu.

Levítiko 20:2 ta bisa: “Kualke hòmber for di e yunan di Israel òf for di e estranheronan ku ta keda biba pa un tempu na Israel ku duna un di su yunan na Molok, mester wòrdu matá sigur; e pueblo di e tera mester piedr’é ku piedra.” Pues, “montadó òf spiritista” tambe mester a ser matá. Kon? Nan mester a “piedra” nan.—Lev. 20:27.

Na Deuteronomio 22:23 i 24, nos ta lesa: “Si tin un mucha muhé ku ta bírgen, ku ta komprometí ku un hòmber, i un otro hòmber hañ’é den stat i drumi kuné, e ora ei boso lo saka tur dos hiba na porta di e stat ei i piedra nan mata; e mucha muhé, pasobra e no a grita pa yudansa den e stat, i e hòmber, pasobra el a violá esposa di su próhimo. Asina bo mester kita e maldat for di meimei di boso.” Pues, nos ta komprondé anto ku e método prinsipal ku e promé israelitanan tabata usa pa ehekutá un persona kulpabel di un krímen teribel tabata di piedra hende mata. *

Deuteronomio 21:23 ta bisa: “Esun ku wòrdu kologá ta maldishoná di Dios.” E echo ku tur hende por a mira kurpa di un malechor, un persona “maldishoná di Dios,” kologá na staka siguramente lo tabatin efekto riba e israelitanan. Sí, e echo ku nan tabata ehekutá un persona ku a kometé un mal echo i kologá su kadaver na staka, òf palu, sigur a sirbi komo un spièrtamentu pa otronan.