1. (a) Kua ta algun tema ku nos ta studia ku regularidat na nos reunionnan? (b) Ki benefisio nos ta saka ora nos repasá e temanan ei?

BO A yega di pensa ora bo ta preparando pa e Estudio di Toren di Vigilansia: ‘Nos a studia e tema akí un biaha kaba?’ Si bo tin un tempu ta asistí na reunion, lo bo a ripará ku tin algun tema ku nos ta trata bes tras bes. Por ehèmpel, ku basta regularidat nos ta studia tokante e Reino di Dios, e reskate i e predikashon, òf tokante kualidatnan manera fe i amor. E echo ku nos ta repasá e temanan akí ta yuda nos mantené un fe firme i ‘bira hende ku ta kumpli ku e palabra, i no hende ku ta tend’é so.’—Sant. 1:22.

2. (a) Kiko e rekordatorionan di Dios ta enserá? (b) Kiko ta e diferensia entre lei di hende i lei di Yehova?

² Den Beibel, nos ta haña rekordatorio den forma di lei-, mandamentu- i normanan ku Dios a duna su pueblo. Distinto for di lei di hende, ku konstantemente mester ser ahustá òf revisá, e leinan i normanan di Yehova semper ta konfiabel. Ta bèrdat ku Dios a duna algun lei den pasado ku no ta konta mas pa su pueblo awe. Pero esaki no ta pasobra tabatin algu robes ku e leinan ei. E salmista a bisa: “Bo testimonionan [“rekordatorionan,” NW] ta hustu pa semper.”—Sal. 119:144.

3, 4. (a) Ki mensahe e rekordatorionan di Yehova tin biaha ta transmití? (b) Kon e israelitanan lo a benefisiá si nan a hasi kaso di nan?

³ Tin biaha e rekordatorionan di Yehova ta transmití un mensahe di atvertensia òf spièrtamentu. Den kaso di e israelitanan, e profetanan di Dios tabata spièrta nan ku regularidat. Por ehèmpel, djis promé ku e nashon a drenta e Tera Primintí, Moises a bisa nan: “Tene kuidou pa boso kurason no wòrdu gañá i boso bira bai i sirbi otro diosnan i adorá nan. Sino e  rabia di SEÑOR lo sende kontra boso.” (Deu. 11:16, 17) Den Beibel nos ta haña un gran kantidat di rekordatorio útil ku Yehova a duna su pueblo.

⁴ Na hopi otro okashon mas Yehova a kòrda e israelitanan pa nan tem’é, skucha su bos i santifiká su nòmber. (Deu. 4:29-31; 5:28, 29) Si nan a hasi kaso di e rekordatorionan ei, lo el a bendishoná nan rikamente.—Lev. 26:3-6; Deu. 28:1-4.

5. Dikon Yehova a bringa pa Rei Ezekías?

⁵ Durante e historia turbulento di Israel, Dios semper a kumpli ku su promesa. Por ehèmpel, ora Rei Senakerib di Asiria a invadí Huda i a menasá di baha Rei Ezekías for di trono, Yehova a manda un angel pa yuda su pueblo. Den un solo anochi, e angel di Dios a mata “tur guerero poderoso” di e ehérsito di Asiria, di manera ku Senakerib a hañ’é obligá di bai kas bèk tur humiá. (2 Rei. 19:35; 2 Kró. 32:21) Dikon Dios a bringa na fabor di Rei Ezekías? Pasobra ‘Ezekías a tene duru na Yehova; e no a laga di siguié, ma a warda su mandamentunan.’—2 Rei. 18:1, 5, 6.

6. Kon Rei Yosías a demostrá konfiansa den Yehova?

⁶ Un otro rei ku a obedesé e mandamentunan di Yehova tabata Yosías. For di ora e tabatin 8 aña, el a ‘hasi bon den bista di Yehova i no a desviá ni na man drechi ni na man robes.’ (2 Kró. 34:1, 2) Yosías a demostrá su konfiansa den Yehova ora el a eliminá e diosnan falsu for di e pais i a restorá adorashon berdadero. I komo resultado, Yehova a bendishoná no e so, sino henter e nashon.—Lesa 2 Krónikanan 34:31-33.

7. Kiko tabata pasa ku e israelitanan ora nan no a hasi kaso di e rekordatorionan di Yehova?

⁷ Pero lamentablemente, no ta tur biaha e pueblo di Dios tabatin pleno konfiansa den e rekordatorionan di Yehova. Atraves di siglo, nan a desobedesé Yehova bes tras bes. Usando e palabranan di apòstel Pablo, nos por bisa ku nan a ser “hibá p’aki i p’aya pa tur bientu di siñansa” ora ku nan fe tabata suak. (Efe. 4:13, 14) I a sosodé nèt manera Yehova a spièrta nan: Nan a kosechá konsekuensia amargo ora nan no a pone konfiansa den su rekordatorionan.—Lev. 26:23-25; Yer. 5:23-25.

8. Den ki manera nos situashon ta parse esun di e israelitanan?

⁸ Den ki manera nos situashon ta parse esun di e israelitanan? Wèl, meskos ku nan, e pueblo di Dios djawe ta risibí konseho  i disiplina. (2 Ped. 1:12) Kada biaha ku nos lesa Beibel, Yehova ta kòrda nos di su normanan. I komo ku nos tin e libertat di skohe, nos mes por disidí si nos lo obedesé nan òf si nos lo hasi loke nos ta haña ta bon. (Pro. 14:12) Laga nos ban wak awor algun motibu pakiko nos por konfia e rekordatorionan di Yehova i kon nan por benefisiá nos.

9. Kon Yehova a rekordá e israelitanan durante nan biahe den desierto ku e tabata apoyá nan?

⁹ Ora ku e israelitanan a kuminsá ku nan biahe dor di un “desierto grandi i teribel,” un biahe ku a dura 40 aña, Yehova no a splika nan en detaye kon lo e bai dirigí nan, protehá nan i kuida nan. Pero sí el a demostrá nan bes tras bes ku nan por a konfia den dje i den su instrukshonnan. Pa medio di un pilá di nubia den dia i un pilá di kandela anochi, Yehova a kòrda nan ku e tabata apoyá nan i guia nan a lo largu di e biahe difísil ei. (Deu. 1:19; Éks. 40:36-38) Tambe Yehova a perkurá pa nan haña e kosnan básiko ku nan tabatin mester. “Nan no tabatin falta di nada; nan paña no a gasta, ni nan pianan no a hincha.”—Neh. 9:19-21.

10. Kon Yehova ta guia su pueblo awe?

¹⁰ Awe, e sirbidónan di Dios ta pará na porta di un hustu mundu nobo. Nos ta konfia ku Yehova ta dunando nos loke nos tin mester pa sobrebibí e binidero “tribulashon grandi”? (Mat. 24:21, 22; Sal. 119:40, 41) Ta bèrdat ku Yehova no ta usa un pilá di nubia ni un pilá di kandela pa guia nos na e mundu nobo, pero sí e ta usa su organisashon pa yuda nos keda alerta. Por ehèmpel, mas i mas nos ta ser animá pa fortalesé nos amistat ku Yehova dor di lesa Beibel, tene un anochi di Adorashon Komo Famia, asistí regularmente na reunion i sali den sirbishi. Bo a hasi e kambionan nesesario den bo bida pa asina bo por sigui e instrukshonnan akí? Esei lo yuda bo kultivá e fe firme ku nos tin mester pa ser salbá i drenta e mundu nobo.

11. Den ki manera Yehova ta demostrá ku e ta interesá den nos bienestar?

¹¹ E instrukshonnan ku nos ta risibí no solamente ta yuda nos keda lantá den sentido spiritual, sino tambe ta yuda nos tuma desishonnan sabí den bida di tur dia. Por ehèmpel, nos a haña e animashon pa nos tin un punto di bista balansá di kos material i pa hiba un bida simpel, ya asina nos por evitá hopi doló di kabes. Tambe nos a haña konseho tokante bistimentu, kuido di nos aparensia, skohementu di dibertishon sano i tambe kon pa disidí kuantu enseñansa eskolar nos tin mester. Anto pensa riba e konsehonan ku nos a haña pa tuma medidanan di siguridat pa ku nos kas, nos outo òf Salònnan di Reino, i e sugerensianan pa prepará pa un emergensia. E konsehonan ei ta demostrá ku Yehova ta interesá den nos bienestar.

12. (a) Tokante kiko Hesus a papia na vários okashon ku su disipelnan? (b) Ki gesto di humildat a hasi un impreshon profundo riba Pedro? (c) Kiko nos mester siña for di e ehèmpel di Hesus?

¹² Den promé siglo, e pueblo di Dios tabata risibí rekordatorio regularmente. Na vários okashon Hesus a papia ku su disipelnan tokante e importansia di ta humilde. Ma e no a djis splika nan kiko ke men ser humilde; el a mustra nan kon pa ta humilde. E último dia di su bida riba tera, el a reuní e apòstelnan pa nan selebrá Pasku Hudiu. Miéntras ku e apòstelnan tabata kome, Hesus a lanta para i a kuminsá laba nan pia, un tarea ku normalmente un kriá ta hasi. (Huan 13:1-17) E gesto di humildat akí a hasi un impreshon profundo riba  nan. Un 30 aña despues, apòstel Pedro, kende tabata presente na e sena ei, a konsehá su rumannan den fe pa ta humilde. (1 Ped. 5:5) E ehèmpel di Hesus mester motivá nos tur pa ta humilde ora nos ta trata ku otro.—Flp. 2:5-8.

13. Ki kualidat esensial Hesus a rekordá su disipelnan ku nan mester a kultivá?

¹³ Un otro tema ku Hesus a trata hopi biaha ku su disipelnan tabata e importansia di tin un fe fuerte. Un biaha, e disipelnan no por a saka un demoño for di un mucha hòmber. Nan a puntra Hesus: “Pakiko nos no por a sak’é?” El a kontestá nan: “Pa motibu di boso poko fe. Pasobra di bèrdat mi ta bisa boso: Si boso fe ta djis e tamaño di un pipita di mòster, . . . nada lo no ta imposibel pa boso.” (Mat. 17:14-20) Durante henter Hesus su sirbishi, el a siña su disipelnan ku fe ta un kualidat esensial. (Lesa Mateo 21:18-22.) Nos ta saka probecho di tur kongreso, asamblea i reunion? Nan ta okashonnan pa fortalesé nos fe mediante e instrukshon edifikante ku ta ser duná einan. E reunionnan akí no ta djis pa nos disfrutá di un dushi ambiente; nan ta oportunidatnan pa nos demostrá ku nos ta konfia e guia di Yehova.

14. Dikon ta importante pa nos kultivá un amor manera di Kristu awe?

¹⁴ E Skritura Griego Kristian ta rekordá nos hopi biaha pa mustra amor na otro. Hesus a bisa ku e di dos mandamentu di mas grandi ta “stima bo próhimo meskos ku bo mes.” (Mat. 22:39) Santiago, mitar ruman di Hesus, a yam’é “e lei noble.” (Sant. 2:8) I apòstel Huan a skirbi: “Rumannan stimá, mi ta skirbi boso, no un mandamentu nobo, sino un mandamentu bieu ku boso tabatin for di kuminsamentu. . . . I tòg ta un mandamentu nobo mi ta skirbi boso.” (1 Huan 2:7, 8) Kiko Huan tabata ke men ku e ekspreshon “mandamentu bieu”? E tabata referí na e mandamentu pa stima bo próhimo. E tabata “bieu” pasobra Hesus a dun’é hopi aña promé, esta, “for di kuminsamentu.” Pero e tabata “nobo” tambe pasobra e disipelnan tabatin ku sigui demostrá amor di sakrifisio propio ora situashonnan nobo a presentá. Komo disipel di Kristu, nos por ta kontentu ku e Palabra di Dios ta rekordá nos di e importansia di stima nos próhimo i di tene kuidou pa e aktitut egoista di e mundu akí no influensiá nos.

15. Kiko tabata e motibu prinsipal pakiko Hesus a bini na tera?

¹⁵ Hesus a mustra interes personal den hende. Prueba di esei ta ku el a kura hende malu i a resusitá hende morto. Ma e motibu prinsipal pakiko Hesus a bini na tera no tabata pa kura hende. Su predikashon i siñansa tabatin un efekto muchu  mas duradero riba hende. Dikon nos ta bisa esei? Pasobra e hendenan ku Hesus a kura i resusitá den promé siglo, ku tempu, tòg a bira bieu i muri. Pero esnan ku a reakshoná bon riba su mensahe a haña e oportunidat di biba pa semper.—Huan 11:25, 26.

16. Na ki eskala e predikashon ta tumando lugá den nos tempu?

¹⁶ E predikashon ku Hesus a kuminsá den promé siglo ta tuma lugá awe na un eskala hopi mas grandi. El a duna su siguidónan e enkargo: “Bai, i hasi hende di tur nashon mi disipel.” (Mat. 28:19) I esei ta loke nan a hasi i ta loke nos ta hasiendo! Den mas ku 230 pais, mas ku shete mion Testigu di Yehova ta prediká e mensahe di e Reino di Dios ku entusiasmo i ta duna lès di Beibel na miónes di hende. E trabou di prediká akí ta un prueba ku nos ta bibando den e último dianan.

17. Ki konseho Pablo i Pedro a duna e rumannan di promé siglo?

¹⁷ Ta bisto ku e rekordatorionan ku e kristiannan di promé siglo a haña a yuda nan keda ku un fe firme. Por ehèmpel, ora Pablo tabata prezu na Roma, el a bisa Timoteo: “Sigui pega na e patronchi di palabra sano ku bo a tende for di mi.” (2 Tim. 1:13) Nos por imaginá ku e palabranan ei a animá Timoteo mashá. Di otro banda, despues ku apòstel Pedro a stimulá e rumannan pa kultivá kualidatnan manera perseveransia, kariño pa otro i dominio propio, el a bisa: “Mi ta semper kla pa kòrda boso e kosnan akí, aunke boso sa nan i ta bon establesí den e bèrdat ku boso a siña.”—2 Ped. 1:5-8, 12.

18. Kon e kristiannan di promé siglo a mira e rekordatorionan ku nan a haña?

¹⁸ Si nos wak bon, e kartanan ku Pablo i Pedro a skirbi a kuadra ku “e palabranan ku e profetanan santu a papia anteriormente.” (2 Ped. 3:2) Akaso e kristiannan di promé siglo a rabia pasobra nan a haña e rekordatorionan ei? Nò, nan no a rabia, ya ku nan tabata sa ku esei tabata un prueba di ku Dios a stima nan i tabata ke pa nan “sigui haña mas bondat inmeresí i konosementu di nos Señor i Salbador Hesukristu.”—2 Ped. 3:18.

19, 20. Dikon nos por konfia e rekordatorionan di Yehova, i kon nos por benefisiá di nan?

¹⁹ Awe, nos tin motibu di sobra pa konfia e rekordatorionan di Yehova ku ta pará skirbi den su Palabra infalibel. (Lesa Hosue 23:14.) Beibel ta konta nos kon Dios a trata ku hende imperfekto den transkurso di míles di aña. E relatonan históriko akí a keda registrá pa nos benefisio. (Rom. 15:4; 1 Kor. 10:11) Tambe nos a mira profesia di Beibel kumpli den nos tempu. Profesia ta manera rekordatorio duná hopi aña di antemano, ya ku nan ta kòrda nos ku Yehova semper ta kumpli ku loke e primintí. Un ehèmpel di esei ta ku miónes di hende a djòin e adorashon puru di Yehova manera a ser profetisá pa “e último dianan.” (Isa. 2:2, 3) Beibel a profetisá tambe ku e mundu akí lo bai di malu pa pió, i esei ta presis loke ta pasando. I manera nos a konsiderá kaba, e kampaña mundial di e trabou di prediká ku ta tumando lugá aktualmente ta un kumplimentu direkto di e palabranan di Hesus.—Mat. 24:14.

²⁰ Atraves di siglo, nos Kreador a duna nos masha hopi prueba ku nos por konfia den dje. Nos ta tuma su rekordatorionan na pechu i aktua na armonia ku nan? Esei ta loke un ruman ku yama Rosellen a hasi. El a bisa: “Ora mi a kuminsá pone tur mi konfiansa den Yehova, mi a kuminsá mira mas kla ku su man amoroso tabata sostené mi i duna mi forsa.” Laga nos tambe benefisiá dor di presta atenshon na e rekordatorionan di Yehova.