1. (a) Kua ta algun manera ku hende ta reakshoná riba instrukshon i konseho, i dikon? (b) Kon orguyo por afektá un persona su punto di bista di konseho?

HENDE ta reakshoná na maneranan hopi distinto ora nan haña instrukshon. Tin hende ta aseptá un òrdu di un persona ku tin outoridat sin protestá, pero e sugerensianan di un hende di nan mes edat òf ku tin ménos outoridat nan ta rechasá mesora. Tin hende ta sinti tristesa, bèrgwensa òf ta bira preokupá ora nan haña disiplina òf konseho, ma otronan ta sinti nan motivá, sigur di nan mes i ku e deseo di hasi mihó. Kiko ta kousa e diferensianan ei? Un faktor ta orguyo. Ora un persona arogante haña konseho, e ta pensa ku esei no ta konta p’e. Kiko e ta hasi? E ta rechasá e konseho i no ta benefisiá di instrukshon balioso ku e por a haña.—Pro. 16:18.

2. Dikon kristiannan berdadero ta apresiá konseho for di e Palabra di Dios?

² Di otro banda, kristiannan berdadero sí ta apresiá bon konseho, foral ora e ta basá riba e Palabra di Dios. Dikon? Wèl, e rekordatorionan di Yehova ta hasi nos sabí, pasobra nan ta siña nos kon pa evitá e trampanan di materialismo, inmoralidat seksual, droga i mal uso di alkohòl. (Pro. 20:1; 2 Kor. 7:1; 1 Tes. 4:3-5; 1 Tim. 6:6-11) Ademas, nos ta disfrutá di un “kurason kontentu” pasobra nos ta obedesé e rekordatorionan di Dios.—Isa. 65:14.

3. Ki aktitut di e eskritor di un salmo nos lo ke imitá?

³ Pa nos konserbá e amistat balioso ku nos tin ku nos Tata selestial, Yehova, nos tin ku sigui praktiká su konsehonan sabí den nos bida. Nos mester imitá e bon aktitut di e eskritor di un salmo ku a skirbi: “Mi a heredá bo testimonionan [òf, rekordatorionan] pa semper,  pasobra nan ta e goso di mi kurason.” (Sal. 119:111) Nos tambe ta kontentu ku e mandamentunan di Yehova? Òf tin biaha nos ta haña nan muchu pisá pa kumpli kuné? Asta si de bes en kuando ta difísil pa nos aseptá sierto konseho, nos no mester desanimá. Un kos ku nos por hasi ta di fortalesé nos konfiansa di ku e instrukshonnan di Yehova semper ta pa nos bon. Ban wak tres manera ku nos por hasi esei.

4. Kiko ta un kos ku no a kambia nunka den David su bida?

⁴ Rei David tabatin hopi ‘ups and downs’ den su bida, pero un kos no a kambia nunka: su konfiansa apsoluto den su Kreador. El a bisa: “Na bo, o SEÑOR, mi ta halsa mi alma. O mi Dios, den bo mi ta konfia.” (Sal. 25:1, 2) Kiko a yuda David kultivá asina un konfiansa den su Tata selestial?

5, 6. Kiko e Palabra di Dios ta revelá tokante e amistat ku David tabatin ku Yehova?

⁵ Hopi hende ta resa na Dios solamente ora nan tin problema. Imaginá ku bo tin un amigu ku ta ora e tin mester di sèn, òf ora e ke pa bo hasié un fabor, so bo ta tende di dje. Ku tempu, bo ta kuminsá kuestioná e motibu pakiko e ta bo amigu. Pero David su amistat ku Yehova no tabata asina. Durante henter su bida, tantu den tempu bon komo den tempu malu, el a demostrá ku e tabata stima Yehova i a konfi’é.—Sal. 40:8.

⁶ Tuma nota di e palabranan di alabansa i gratitut ku David a ekspresá na Yehova: “O SEÑOR, nos Señor, ki mahestuoso bo nòmber ta riba henter mundu, abo ku a pone bo splendor mas ariba di e shelunan!” (Sal. 8:1) Bo a ripará for di e palabranan di David kon íntimo su amistat ku su Tata selestial tabata? David tabata asina impreshoná ku Yehova su gloria i grandesa ku e kier a alab’é “henter dia.”—Sal. 35:28.

7. Ki benefisio nos ta saka ora nos ta komuniká regularmente ku Yehova?

⁷ Meskos ku David, nos tin ku komuniká ku Yehova ku regularidat pa nos por fortalesé nos konfiansa den dje. Beibel ta bisa: “Hala serka Dios, i lo e hala serka boso.” (Sant. 4:8) Orashon ta hala nos serka Dios i ta un manera importante pa haña su spiritu santu.—Lesa 1 Huan 3:22.

8. Dikon nos mester evitá di keda ripití e mesun kosnan den orashon?

⁸ Kiko di bo orashonnan? Bo tin e tendensia di keda ripití sierto frase òf usa tur biaha e mesun palabranan? Si ta asina, tuma un par di minüt promé ku bo hasi orashon pa pensa riba loke bo ke bisa. Un ehèmpel: Si tur biaha ku bo topa un amigu, bo ta bis’é e mesun kosnan bes tras bes, lo e gusta esei? Despues di tempu, kasi sigur lo e no ke skucha bo mas. Klaru ku Yehova nunka lo rechasá orashon sinsero di un di su sirbidónan leal, pero lo ta bon pa nos evitá di hasi orashonnan ripititivo.

9, 10. (a) Tokante kiko nos por hasi orashon? (b) Kiko por yuda nos ofresé orashonnan mas signifikativo?

⁹ Si nos ta deseá di hala mas serka Yehova, ta klaru ku nos no por papia kuné tokante kosnan general òf superfisial so. Mas nos konta Yehova nos pensamentu- i sintimentunan di mas profundo, mas serka dje nos lo hala i mas nos lo konfia den dje. Kiko asina nos por inkluí den nos orashonnan? E Palabra di Dios ta kontestá: “Den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.” (Flp. 4:6) De echo, nos por papia ku Yehova tokante kualke kos ku ta influensiá nos bida òf nos amistat kuné.

¹⁰ Nos por siña hopi for di e orashonnan di sirbidónan fiel ku tin pará skirbí den Beibel. (1 Sam. 1:10, 11; Echo. 4:24-31) E buki di Salmonan tin kantidat di orashon i kantika dirigí na Yehova. Den nan  nos ta haña tur emoshon humano: for di agonia te na gran alegria. Si nos studia e palabranan ei ku sirbidónan leal a ekspresá, nan por yuda nos ofresé Yehova orashonnan mas signifikativo.

11. Dikon nos tin ku meditá riba e konsehonan di Dios?

¹¹ David a deklará: “E testimonio [òf, rekordatorio] di SEÑOR ta fiel, e ta hasi hende simpel bira sabí.” (Sal. 19:7) Pues, aunke nos no tin masha eksperensia, nos por bira sabí si nos obedesé e mandamentunan di Dios. Pero tin algun konseho den Beibel ku nos tin ku meditá ariba si nos ke keda fiel den tur situashon. Por ehèmpel, ora nos meditá riba prinsipionan bíbliko, esei por yuda nos resistí preshon òf tentashon na skol i na trabou. Tambe esaki por yuda nos respetá Dios su lei tokante sanger, keda neutral den asuntunan polítiko i apliká prinsipionan bíbliko ora di skohe kiko pa bisti. Pues, meditashon ta prepará nos pa situashonnan difísil ku por surgi. Ora nos ta komprondé kiko Dios ta pensa tokante e asuntunan ei, nos por antisipá sierto problema i disidí den nos kurason kiko nos lo hasi promé ku e situashon presentá. E tipo di meditashon i preparashon ei por spar nos hopi doló di kurason.—Pro. 15:28.

12. Riba kua preguntanan nos mester meditá pa obedesé e rekordatorionan di Dios?

¹² Kon nos ta hiba nos bida? Nos ta demostrá ku nos ta konfia den Yehova i ta keda lantá den sentido spiritual miéntras ku nos ta warda p’e kumpli ku su promesanan? Por ehèmpel, di bèrdat bo ta kere ku denter di poko Babilonia e Grandi lo ser destruí? E bendishonnan ku ta na kaminda—manera bida eterno den paradeis riba tera i e resurekshon—ta mesun real ainda pa bo ku tempu bo a konosé e bèrdat? Bo a keda ku bo entusiasmo pa sirbishi, òf mas bien bo a laga asuntunan personal bai na promé lugá den bo bida? E speransa di resurekshon, e santifikashon di e nòmber di Yehova i vindikashon di su soberania ainda ta importante pa bo? Ora nos meditá riba e preguntanan akí, esei por yuda nos kumpli ku e rekordatorionan di Dios i konsiderá nan komo un herensia “pa semper.”—Sal. 119:111.

13. Dikon e kristiannan di promé siglo tabatin problema pa komprondé algun kos? Duna un ehèmpel.

¹³ Kisas nos ta lesa algun kos den Beibel ku nos no ta komprondé kompletamente pasobra ainda no a yega e momento pa Yehova klarifiká nan. Hesus a bisa su apòstelnan bes tras bes ku lo e tabatin ku sufri i muri. (Lesa Mateo 12:40; 16:21.) Ma e apòstelnan no a komprondé kiko e tabata ke men. Ta te despues ku Hesus a resusitá i aparesé na e disipelnan i “a habri nan mente kompletamente pa nan kapta nifikashon di e Skritura,” nan a bin komprondé su palabranan. (Luk. 24:44-46; Echo. 1:3) Di igual manera, e siguidónan di Kristu no a komprondé ku e Reino di Dios lo a ser establesé den shelu, sino te ora ku nan a risibí spiritu santu na Pentekòste di aña 33.—Echo. 1:6-8.

14. Ki bon ehèmpel nos rumannan na prinsipio di siglo 20 a pone pa nos?

¹⁴ Algu similar a pasa na prinsipio di siglo 20. E kristiannan berdadero tabatin vários idea robes tokante kiko lo tuma lugá durante “e último dianan.” (2 Tim. 3:1) Por ehèmpel, na aña 1914, algun di nan a pensa ku denter di poko Dios lo a tuma nan na shelu. Ora loke nan a spera no a sosodé, nan a bolbe hasi un estudio profundo di e Skritura i a bin realisá ku un gran kampaña di predikashon mester a tuma lugá promé. (Mar. 13:10) Ta p’esei na aña 1922,  Joseph F. Rutherford, kende e tempu ei tabata dirigí e trabou di prediká, a bisa e presentenan na e asamblea internashonal na Cedar Point, Ohio (Merka): “Tende! E Rei ta reina! Boso ta su agentenan di publisidat. P’esei, anunsiá, anunsiá, anunsiá e Rei i su reino.” Di e dia ei padilanti, predikashon di “e bon notisia di Reino” a bira e marka di identifikashon di e sirbidónan di Yehova di e tempu akí.—Mat. 4:23; 24:14.

15. Dikon ta bon pa nos meditá riba loke Yehova a hasi pa su pueblo?

¹⁵ Ta bon pa nos meditá riba tur loke Yehova a hasi pa su pueblo, tantu den pasado komo den presente. Esaki ta fortalesé nos konfiansa ku e por kumpli ku su boluntat i propósito den futuro. Ademas, e rekordatorionan di Dios ta yuda nos keda den ekspektativa di su profesianan ku tin ku kumpli ainda. Nos por tin sigur ku esaki ta yuda nos konfia plenamente den su promesanan.

16. Kua ta algun bendishon ku nos ta haña debí ku nos ta partisipá aktivamente den sirbishi?

¹⁶ Nos Dios, Yehova, ta un Dios dinámiko, un Dios ku ta aktua. E salmista a puntra: “Ken ta manera bo, o SEÑOR poderoso?” I el a agregá: “Bo tin un brasa fuerte; bo man ta poderoso, bo man drechi ta halsá.” (Sal. 89:8, 13) Siendo un Dios di obra, Yehova ta apresiá e esfuerso ku nos ta hasi den sirbishi i ta bendishoná nos pa esei. E ta mira ku tur su sirbidónan—hòmber i muhé, hóben i di edat—no ta sinta man krusá ni ta “kome pan di flohedat.” (Pro. 31:27) Mas bien, nos ta imitá nos Kreador i ta hopi okupá ku aktividatnan teokrátiko. Ademas, ora nos ta sirbi Yehova di henter nos kurason, nos ta sinti un gran satisfakshon, i pa Yehova ta un plaser pa bendishoná nos sirbishi.—Lesa Salmo 62:12.

17, 18. Dikon nos por bisa ku obranan di fe ta fortalesé nos konfiansa den Yehova? Duna un ehèmpel.

 ¹⁷ Den ki manera obranan di fe ta fortalesé nos konfiansa den Yehova? Pensa riba loke e israelitanan a pasa aden ora tabata tempu pa nan drenta e Tera Primintí. Yehova a duna e saserdotenan ku tabata karga e arka di pakto e instrukshon pa kana drenta Riu Hordan. Pero, ora e pueblo a yega einan, nan a mira ku áwaseru di primavera a pone ku e nivel di awa tabata haltu i e awa di e riu tabata kore masha duru. Kiko e israelitanan lo a hasi? Nan lo a keda kamper kantu di oriya i warda simannan largu te ora e awa baha? Nò, nan a pone pleno konfiansa den Yehova i a sigui su instrukshon. Ku ki resultado? Beibel ta bisa ku asina ku ‘e saserdotenan ku tabata karga e arka a yega kantu di riu i a hinka nan pia den awa di Hordan, e awa ku tabata bini for di ariba a stòp di kore.’ Anto, “e saserdotenan ku tabata karga e arka di aliansa di SEÑOR tabata para ketu sin move den e riu seku. Nan a keda para einan te ora tur hende a yega na e otro banda.” (Hos. 3:12-17, BPK) Lo mester tabata masha emoshonante pa nan ora nan a mira e awa brutu stòp di kore! Nan fe den Yehova a bira mas fuerte pasobra nan a konfia den su instrukshon.

¹⁸ Ta bèrdat ku awe Yehova no ta hasi e tipo di milagernan ei pa su pueblo, pero sí e ta bendishoná nos obranan di fe. Su spiritu santu ta duna nos e forsa i kurashi ku nos mester pa prediká e mensahe di Reino rònt mundu. I Hesukristu, e Testigu prinsipal di Yehova, a sigurá su disipelnan ku lo e apoyá nan den e obra importante akí. Despues ku Hesus a resusitá, el a bisa nan: “Bai, i hasi hende di tur nashon mi disipel . . . I wak!, mi ta ku boso tur e dianan, te na konklushon di e era akí.” (Mat. 28:19, 20) Hopi Testigu di Yehova ku kisas ta tímido òf nèrvioso pa papia ku otro hende por konta di nan propio eksperensia kon e spiritu santu di Dios a duna nan kurashi pa papia den sirbishi ku hende ku nan no konosé.—Lesa Salmo 119:46; 2 Korintionan 4:7.

19. Aunke nos no por hasi mes tantu ku nos lo ke hasi den e sirbishi di Yehova, nos por ta sigur di kiko?

¹⁹ Algun ruman, pa motibu di malesa òf edat avansá, no por hasi mes tantu ku nan lo ke hasi den sirbishi di Yehova. Pero nan por ta sigur ku “e Tata di tierno miserikòrdia i Dios di tur konsuelo” ta komprondé nan situashon. (2 Kor. 1:3) E ta apresiá tur loke nos por hasi den su sirbishi. Nos no tin ku lubidá ku nos salbashon ta dependé prinsipalmente di nos fe den e sakrifisio di reskate di Kristu.—Heb. 10:39.

20, 21. Kua ta algun manera ku nos por demostrá konfiansa den Yehova?

²⁰ Adorá Yehova ta enserá ku nos ta usa nos tempu, energia i rekursonan material mas tantu posibel den su sirbishi. Sí, di henter nos kurason nos ta deseá di “hasi e trabou di un predikadó di e bon notisia.” (2 Tim. 4:5) Anto nos ta kontentu ku nos por hasié, ya ku e ta yuda otro hende “yega na un konosementu eksakto di e bèrdat.” (1 Tim. 2:4) No tin duda ku ora nos ta onra i alabá Yehova, esei ta hasi nos riku den sentido spiritual. (Pro. 10:22) I esaki ta yuda nos desaroyá un konfiansa inkebrantabel den nos Kreador.—Rom. 8:35-39.

²¹ Manera nos a mira, no ta outomátikamente nos ta haña konfiansa den Yehova su konsehonan sabí; nos tin ku hasi esfuerso pa kultivá esei. Pues, fortalesé bo konfiansa pa medio di orashon. Meditá riba e manera ku Yehova a kumpli ku su boluntat den pasado i kon lo e bai hasié den futuro. I sigui kultivá konfiansa den Yehova pa medio di obranan di fe. No lubidá ku e rekordatorionan di Yehova ta dura pa semper. I si abo obedesé nan, bo tambe lo biba pa semper!