1. Splika e kontraste entre e manera ku mayoria di hende ta mira sklabitut i e sklabitut ku Romanonan 12:11 ta menshoná.

PA MAYORIA di hende, un esklabo ta un persona ku ta ser dominá kruelmente, kontrolá i maltratá pa su shon òf doño. Pero ser un esklabo di Dios ta hopi diferente. E Palabra di Dios ta bisa ku un kristian por skohe boluntariamente pa sirbi komo esklabo di un Doño amoroso. De echo, ora apòstel Pablo a konsehá e kristiannan di promé siglo pa “sirbi manera esklabo pa Yehova,” e tabata animando nan pa sirbi Dios pasobra nan stim’é. (Rom. 12:11) Kiko e tipo di sklabitut akí ta enserá? Kiko nos mester hasi pa nos no bira esklabo di Satanas i di su mundu? I kua ta e rekompensa- òf benefisionan di sirbi Yehova fielmente manera esklabo?

2. (a) Kiko lo a motivá un esklabo israelita pa renunsiá su libertat? (b) Kiko un esklabo a demostrá ora el a laga su shon bora su orea?

² E Lei ku Dios a duna Israel ta yuda nos komprondé ki sorto di esklabo nos mester ta. Normalmente un esklabo hebreo tabata haña su libertat despues di seis aña di sklabitut. (Éks. 21:2) Pero pa e esklabo ku di bèrdat tabata stima su shon i kier a keda sirbié, Yehova a inkluí un eksepshon den Lei ku a hasi esei posibel. E shon mester a pone e katibu para na un porta òf kozein i bora su orea ku prim, un opheto skèrpi. (Éks. 21:5, 6) Dikon mester a bora nèt su orea? Pasobra na hebreo, nan a ekspresá e idea di obedensia ku un palabra ku ta nifiká skucha i tende. Pues, ora e esklabo a laga bora su orea, el a demostrá ku e kier a sigui sirbi su shon obedientemente. Esei ta meskos ku nos dedikashon na Dios. Ora nos hasi esei, nos ta bisando ku nos ta dispuesto pa obedesé Yehova pasobra nos stim’é.

3. Dikon nos a dediká nos mes na Dios?

³ Promé ku nos boutismo, nos a tuma e desishon ku nos lo sirbi Yehova, sí, ku nos lo ta su esklabo. Ora nos a hasi nos dedikashon na Yehova, nos a primintié  ku nos lo obedes’é i hasi su boluntat. Niun hende no a obligá nos tuma e desishon ei. De echo, asta ora hóbennan ta bai batisá, nan ta hasi esei pasobra nan a hasi un dedikashon personal na Yehova i no djis pa nan hasi nan mayornan kontentu. Pues, e motibu pakiko nos komo kristian a dediká nos mes na nos Doño selestial, Yehova, ta pasobra nos stim’é. Apòstel Huan a skirbi: “Amor pa Dios ta nifiká ku nos ta kumpli ku su mandamentunan.”—1 Huan 5:3.

4. Kiko nos tin ku hasi pa nos bira “esklabo di hustisia”?

⁴ Nos ta masha gradisidu na Yehova ku nos por ta su esklabo! Nos fe den e sakrifisio di reskate di Kristu a libra nos di sklabitut na piká. Ainda nos ta imperfekto, pero nos a skohe pa obedesé Yehova i Hesus komo nos Doñonan. Pablo a splika esaki bon kla den un di su kartanan inspirá: “Konsiderá ku boso realmente ta morto pa loke ta piká, ma bibu pa Dios pa medio di Kristu Hesus.” Kaba el a duna e spièrtamentu akí: “Boso no sa ku si boso sigui presentá boso mes na un hende komo esklabo obediente, boso ta esklabo di esun ku boso ta obedesé? P’esei, boso ta sea esklabo di piká ku ta hiba na morto òf esklabo di obedensia ku ta hiba na hustisia. Ma mi ta gradisí Dios ku boso, ku un tempu tabata esklabo di piká, awor a bira obediente di kurason na e patronchi di siñansa ku tabata konfiá na boso. Sí, komo ku boso a keda librá di piká, boso a bira esklabo di hustisia.” (Rom. 6:11, 16-18) Tuma nota ku apòstel Pablo a bisa ku nos mester ta “obediente di kurason.” Pues, ora nos a dediká nos mes na Yehova, nos a bira “esklabo di hustisia.”

5. Kontra kiko nos tur tin ku lucha, i dikon?

⁵ Pero pa nos kumpli ku nos dedikashon na Dios, nos tin ku superá vários opstákulo. Nos tin ku lucha kontra dos kos. Di promé, nos tin e mesun lucha ku Pablo tabatin. El a skirbi: “Realmente, mi tin plaser den e lei di Dios segun e hende ku mi ta di paden, pero mi ta mira den mi kurpa un otro lei ku ta bringa kontra e lei di mi mente. I e lei di piká akí tin mi prezu.” (Rom. 7:22, 23) Komo ku nos tambe a heredá imperfekshon, nos tin un lucha diario kontra nos mal inklinashonnan. Apòstel Pedro a urgi nos: “Sea manera hende liber, pero no usa boso libertat komo kapa pa hasi malu, sino us’é komo esklabo di Dios.”—1 Ped. 2:16.

6, 7. Kon Satanas ta laga e mundu parse masha atraktivo?

⁶ E di dos kos ku nos tin ku lucha kontra dje ta e mundu akí ku ta bou di influensia di demoño. Satanas ta e gobernante di mundu, i e ta usa tur arma ku e tin na su disposishon pa purba di kibra nos lealtat na Yehova i na Hesus. E ke pa nos bira su katibu i pa logra esei e ta purba di hinka nos den tentashon pa bira parti di mundu. (Lesa Efesionan 6:11, 12.) Un manera ku e ta hasi esei ta dor di laga e mundu parse masha atraktivo, sí, algu ku nos lo ke ta parti di dje. Pero apòstel Huan a spièrta: “Si un hende ta stima mundu, e no tin amor pa e Tata; pasobra tur loke tin den mundu—deseo di karni, deseo di wowo i kana broma ku loke bo tin—no ta bini di e Tata, sino di mundu.”—1 Huan 2:15, 16.

⁷ Den mundu ta reina e deseo pa prosperidat material; tur hende ke mas i mas kos material. Satanas ta laga nan kere ku plaka ta e yabi pa felisidat. Tur kaminda nan ta traha ‘megastore.’ Propaganda ke laga nos kere ku e mihó kos ta di hiba un bida yen di luho i plaser. Agensianan di biahe ta ofresé ekskurshon pa lugánan eksótiko, hopi biaha den kompania di hende ku no tin e mesun prinsipionan ku nos. Unda ku nos bira, e mesun mensahe ta resoná: sòru pa bo superá bo mes, pa bo bai dilanti. Sí,  bai dilanti, pero for di e punto di bista di mundu.

8, 9. Kiko lo por pasa ku nos, i dikon esei ta asina peligroso?

⁸ Den promé siglo, Pedro a spièrta e kristiannan pa tene kuidou ku hende den kongregashon ku a kuminsá pensa meskos ku e mundu. El a bisa: “Pa nan ta un plaser pa hiba un bida di luho, asta di dia kla. Nan ta manera mancha i defekto meimei di boso ku ta gosa sin fin den nan siñansanan engañoso ora nan ta na boso banketenan. Nan ta usa palabranan grandi, sin bisa nada. I ku akshonnan sinbèrgwensa, stimulando deseonan di karni, nan ta sedusí esnan ku apénas a skapa for di hende ku ta hasi malu. Miéntras ku nan ta primintí e hendenan akí libertat, nan mes ta esklabo di kosnan degenerá. Pasobra si un hende ta bou di dominio di un otro hende, e ta esklabo di e hende ei.”—2 Ped. 2:13, 18, 19.

⁹ Si nos ta trata di satisfasé e “deseo di wowo,” es desir, purba di haña tur loke nos ke, esei lo no duna nos libertat. Al kontrario, nos lo bira esklabo di Satanas e Diabel, e doño invisibel di e mundu akí. (1 Huan 5:19) E peliger di bira esklabo di materialismo ta masha real i, si nos kai den materialismo, ta bira hopi difísil pa libra nos mes for di dje.

10, 11. (a) Ken den nos tempu ta un blanko faborito di Satanas? (b) Kon e enseñansa di mundu por kousa problema pa hóbennan kristian?

¹⁰ Satanas, e enemigu di Dios, ta preferá di ataká hende ku no tin masha eksperensia, manera el a hasi den Edén. Su blanko faborito ta e hóbennan. E no ta keda kontentu ora un hóben, òf de echo kualke hende, disidí di sirbi Yehova komo esklabo. Satanas su meta ta pa kibra e lealtat i deboshon di tur hende ku a dediká nan bida na Yehova.

¹¹ Ban bèk na e ehèmpel di e esklabo ku a laga bora su orea. Esei mester a hasi doló, pero e doló lo no a dura largu. Loke sí lo a keda tabata un marka permanente ku a indiká ku el a disidí di keda serka su doño. Asina tambe por ta difísil, asta doloroso, pa hóbennan skohe un kaminda ku ta distinto for di loke otro hóbennan rònt di nan ta skohe. Por ehèmpel, Satanas ta fomentá e idea ku e úniko kos ku por hasi hende felis ta di sigui un karera profeshonal den e mundu akí. Pero komo kristian, nos mester kòrda ku felisidat ta bini di otro fuente. Nos lo ta felis solamente ora nos ta hasi Yehova e parti mas importante di nos bida. Hesus a bisa: “Felis ta esnan ku ta konsiente di nan  nesesidat spiritual.” (Mat. 5:3) Kristiannan dediká na Dios ta biba pa hasi Su boluntat, no di Satanas. Nan ta stima e lei di Yehova, i nan ta meditá riba dje di dia i anochi. (Lesa Salmo 1:1-3.) Pero hopi di e kursonan di enseñansa superior djawe ta tuma asina tantu tempu ku ora un sirbidó di Yehova disidí di sigui un di nan, e no ta sobra masha tempu pa meditá i satisfasé su nesesidat spiritual.

12. Ki desishon hopi hóben tin ku tuma awe?

¹² Pablo a puntra den su promé karta na e korintionan: “Bo tabata un esklabo ora bo a risibí bo yamada?” Anto el a duna e konseho: “No laga esei preokupá bo; ma si bo por bira liber, probechá di e oportunidat ei.” (1 Kor. 7:21) Den e promé siglo tabatin doño ku lo por a hasi bida difísil pa un esklabo kristian. Den tal kaso, lo tabata mihó pa e kristian haña su libertat. Awe, den hopi pais enseñansa ta obligatorio te ku sierto edat. Despues di esei, e hóben tin e libertat pa disidí si e ta sigui bai skol òf si e ta skohe sirbishi di tempu kompleto. Si un hóben kristian skohe pa sigui enseñansa superior pa asina desaroyá su mes profeshonalmente den e mundu akí, e por pèrdè su libertat pa drenta sirbishi di tempu kompleto.—Lesa 1 Korintionan 7:23.

13. Ki tipo di enseñansa ta benefisiá sirbidónan di Yehova mas tantu?

¹³ Pablo a spièrta e kristiannan di Kolósas: “Tene kuidou pa ningun hende no kue boso den nan gara pa medio di filosofia i engaño bano ku ta basá riba tradishon di hende, segun e kosnan básiko di mundu i no segun e siñansanan di Kristu.” (Kol. 2:8) Awendia, hopi dosente ta promové e “filosofia i engaño bano ku ta basá riba tradishon di hende.” Enseñansa superior ta siña hóbennan desaroyá abilidatnan akadémiko pero ta duna nan masha poko, òf kasi ningun entrenamentu práktiko, i komo resultado nan no ta realmente prepará pa e bida di tur dia. Ma sirbidónan di Yehova ta skohe enseñansa ku ta yuda nan desaroyá e abilidatnan nesesario pa nan por hiba un bida simpel den sirbishi na Dios. Nan ta tuma na pechu e konseho ku Pablo a duna Timoteo: “Un kos ta sigur: deboshon na Dios ta di gran probecho, basta nos ta satisfecho ku loke nos tin. Pues, si nos tin kuminda, paña i un dak riba nos kabes, nos lo keda kontentu ku e kosnan akí.” (1 Tim. 6:6, 8) Kristiannan berdadero no ta traha duru pa haña hopi diploma na muraya òf título tras di nan nòmber. Mas bien, nan ta hasi esfuerso pa haña “karta di rekomendashon,”  esta, hende ku nan a yuda bira disipel di Hesus. Nan ta hasi esei dor di partisipá mas tantu posibel den sirbishi di vèlt.—Lesa 2 Korintionan 3:1-3.

14. Segun Filipensenan 3:8, kon Pablo a mira su privilegio di ta un esklabo di Dios i Kristu?

¹⁴ Tuma e kaso di apòstel Pablo. El a ser eduká na pia di Gamaliel, un maestro hudiu di Lei. E edukashon ku Pablo a haña ta meskos ku un enseñansa universitario djawe. Pero kon Pablo a mira esaki ora el a kompar’é ku su privilegio di ta un esklabo di Dios i di Hesus? El a skirbi: “Mi ta konsiderá tur kos komo pèrdida pa motibu di e konosementu tokante Kristu Hesus, mi Señor, ku ta di muchu mas balor. Pa motibu di dje mi a aseptá pèrdida di tur kos i ta konsiderá nan komo kos di benta afó, a fin ku mi por gana Kristu.” (Flp. 3:8) Pablo su manera di mira e enseñansa ei por yuda hóbennan kristian i nan mayornan tuma un desishon sabí pa loke ta enseñansa. (Wak e plachinan.)

15, 16. Ki enseñansa e organisashon di Yehova ta ofresé, i ku ki propósito?

¹⁵ Ki tipo di ambiente ta reina hopi biaha na e institutonan di enseñansa superior? Wèl, inmoralidat i bebementu di mas sa ta masha komun. E institutonan ei ta promové tambe e teoria di evolushon i ta instigá hende pa rebeldiá. (Efe. 2:2) Na kontraste ku esei, e organisashon di Yehova ta ofresé e mihó enseñansa ku tin den e ambiente trankil di e kongregashon kristian. Nos tur por benefisiá tur siman di e Skol di Ministerio Teokrátiko. Tambe tin kursonan spesial pa ruman hòmber soltero ku ta traha pionero (Skol Bíbliko pa Ruman Hòmber Soltero) i pa pareha kasá ku ta pionero (Skol Bíbliko pa Pareha Kristian). Tur e enseñansa teokrátiko akí ta yuda nos obedesé Yehova, nos Doño selestial.

¹⁶ Nos por deskubrí hopi bèrdat balioso ku yudansa di e Índise di Publikashon Watch Tower òf di e Biblioteka Online di Watchtower. E propósito di tur e enseñansa bíbliko akí ta pa yuda nos adorá Yehova mihó. Nos ta siña kon nos por yuda otro hende bira amigu di Dios. (2 Kor. 5:20) I nan, na nan turno, lo por siña otro hende.—2 Tim. 2:2.

17. Ki rekompensa nos ta haña ora nos skohe pa e mihó enseñansa?

¹⁷ Den Hesus su komparashon di e talentonan, e doño a elogiá e dos esklabonan fiel pa nan trabou. Ademas, nan a kompartí e alegria di nan doño, i el a konfia nan ku mas trabou. (Lesa Mateo 25:21, 23.) Nos por ta felis i kontentu si nos skohe e mihó enseñansa ku tin. Tuma, por ehèmpel, Michael. E tabata siña asina bon na skol ku su dosentenan a invit’é pa un reunion pa nan papia tokante e posibilidatnan ku e tin pa bai universidat. Pa nan sorpresa, Michael no a skohe pa enseñansa superior, sino mas bien a disidí di sigui un kurso kòrtiku ku a siñ’é un fishi ku kua e por kria su mes i a la bes traha pionero. Akaso Michael ta sinti ku el a pèrdè un bon chèns? El a bisa: “E enseñansa teokrátiko ku mi a haña komo pionero—i awor komo ansiano den kongregashon—ta impagabel. E bendishonnan i privilegionan ku mi tin ta bal mas ku tur e plaka ku lo mi por a gana. Mi ta masha kontentu mes ku mi no a skohe pa enseñansa superior.”

18. Kiko ta motivá bo pa skohe e mihó enseñansa ku tin?

¹⁸ E enseñansa ku ta bini di Dios ta e mihó ku tin, pasobra e ta yuda nos sirbi Yehova manera esklabo i ta laga nos sa kiko ta su boluntat. Tambe e ta duna nos e speransa di “ser librá di sklabitut na un kurpa ku ta kaba na nada” i, ku tempu, alkansá “e glorioso libertat di e yunan di Dios.” (Rom. 8:21) Mas ku tur kos, e ta siña nos e mihó manera pa demostrá ku di bèrdat nos ta stima nos Doño selestial, Yehova.—Éks. 21:5.