Na Yeremías 31:15, nos ta lesa: “Asina SEÑOR ta bisa: ‘Un bos ta wòrdu tendí na Rama, lamentashon i yoramentu amargo. Rakel ta yora su yunan, i no kier wòrdu konsolá pa su yunan, pasobra nan no t’ei mas.’”

Rakel tabatin dos yu hòmber, i el a muri promé ku tur dos. P’esei, por parse ku loke Yeremías a skirbi 1.000 aña despues di Rakel su morto ta inkorekto.

Rakel su promé yu hòmber tabata Yosef. (Gén. 30:22-24) Despues, Rakel a haña un otro yu hòmber, ku nan a yama Benyamin. Pero dunando lus na e yu akí, Rakel a muri. P’esei, nos por puntra: Dikon Yeremías 31:15 ta bisa ku Rakel tabata yora pasobra su yu hòmbernan “no t’ei mas”?

Ku tempu, Yosef, a haña dos yu hòmber: Manases i Efraim. (Gén. 41:50-52; 48:13-20) Efraim a bira e tribu di mas poderoso den henter e reino di nort di Israel i tabata representá tur e dies tribunan ku a forma e reino ei. E tribu ku a bini di Benyamin (Rakel su di dos yu hòmber) a forma e reino di zùit, huntu ku Huda. Pues, den un sentido nos por bisa ku Rakel a representá tur e mamanan di Israel, tantu esnan di e reino di nort komo esnan di zùit.

Tempu ku e buki di Yeremías a ser skirbí, ya e reino di nort a kai den man di e asirionan i hopi súpdito di e reino di nort a ser hibá komo prezu. Pero kisas algun di e desendientenan di Efraim a hui bai Huda. Sinembargo, na aña 607 promé ku Kristu, e babilonionan a konkistá Huda, e reino di zùit ku a konsistí di dos tribu. Ta parse ku hopi di e hendenan ku e babilonionan a kapturá a ser hibá Rama, ku a keda un ocho kilometer nort di Herúsalèm. (Yer. 40:1) I kisas algun di nan a ser ehekutá einan, den e teritorio di Benyamin kaminda a dera Rakel. (1 Sam. 10:2) Pues, e yoramentu di Rakel pa su yu hòmbernan por ta referí simbólikamente na e lamento ku tabatin pa tur e benyaminitanan ku a muri òf esnan ku a ser matá na Rama. Un otro posibilidat ta ku Yeremías su palabranan ta referí na tur e mamanan di Israel ku a yora pa e israelitanan ku a ser matá òf hibá den eksilio.

En todo kaso, loke Yeremías a bisa tokante Rakel, esta ku e tabata yora su yu hòmbernan, ta simbóliko. Su palabranan a referí na un akontesimentu ku a tuma lugá siglonan despues tempu ku Hesus tabata mucha. Tabata asina ku Rei Heródes a duna òrdu pa mata tur mucha hòmber, resien nasí te ku dos aña di edat, na Bètlehèm, ku a keda den e parti zùit di Herúsalèm. Manera Yeremías a profetisá, e yunan ei ‘no tabat’ei’ mas; nan a muri. Bo por imaginá bo e lamento di e mamanan kendenan tabata yora di tristesa pasobra nan a pèrdè nan yu hòmbernan? Tabata komo si fuera bo por a tende nan yoramentu te na Rama, ku a keda den nort di Herúsalèm.—Mat. 2:16-18.

Pues, e yoramentu di Rakel pa su yunan ta un ekspreshon ku Beibel ta usa pa deskribí e inmenso doló ku mamanan hudiu tabatin, tantu den e dianan di Yeremías komo den tempu di Hesus, debí na morto di nan yunan. Pero no tin duda, esnan ku a muri i ku a bai e “tera di e enemigu” por sali for di gara di e enemigu ei ora e mortonan ser resusitá.—Yer. 31:16; 1 Kor. 15:26.