1. Dikon ora nos ta imitá Hesus nos ta hala mas serka di Yehova?

NORMALMENTE, ora nos ta atmirá un persona su personalidat i manera di aktua, nos ta purba di imit’é. Di tur e hendenan ku a yega di biba riba e mundu akí, Hesukristu ta e mihó ehèmpel pa nos imitá. Dikon? Pasobra e mes a yega di bisa: “Esun ku a mira mi, a mira e Tata tambe.” (Huan 14:9) Hesus a reflehá e personalidat di su Tata perfektamente. P’esei, ora nos ta siña tokante Hesus, ta komo si fuera nos ta siña tokante Yehova. I segun ku nos ta imitá Hesus, nos ta hala mas serka Yehova, e Persona di mas importante di universo. Pues, ta bale la pena hasi esfuerso pa imitá e kualidatnan i manera di aktua di su Yu!

2, 3. (a) Dikon Yehova a duna nos un deskripshon detayá di e bida di Hesus, i kiko Yehova ta ferwagt di nos? (b) Kiko nos lo analisá den e artíkulo akí i esun siguiente?

² Pero kon nos por sa ki sorto di persona Hesus ta? Wèl, den e Skritura Griego Kristian Yehova a duna nos un deskripshon detayá di e bida di Hesus. Dikon? Pasobra e ke pa nos konosé su Yu pa asina nos por imit’é. (Lesa 1 Pedro 2:21.) Beibel ta bisa  ku ora nos ta imitá e ehèmpel di Hesus, ta komo si fuera nos ta sigui “su pasonan.” I esei ta loke Yehova ke pa nos hasi, esta, imitá Hesus den tur loke el a hasi. Pero Hesus a laga un ehèmpel perfekto pa nos, i nos ta leu di ta perfekto. Ma Yehova no ta ferwagt ku nos lo sigui e pasonan di Hesus perfektamente; loke e ta deseá ta pa nos imitá su Yu lo mihó ku nos por.

³ Pues, laga nos analisá algun di e bunita kualidatnan di Hesus. Den e artíkulo akí, nos lo trata su humildat i ternura. Den e siguiente artíkulo, nos lo analisá su kurashi i bon huisio. Nos lo kontestá tres pregunta relashoná ku kada kualidat: Kiko e ta enserá? Kon Hesus a demostr’é? Kon nos por imit’é?

4. Kon lo bo definí humildat?

⁴ Kiko humildat ta enserá? Den e mundu orguyoso akí, tin hende ta pensa ku humildat ta un señal di debilidat òf di falta di konfiansa. Pero esei ta bèrdat? Nò. Pa un hende ta humilde, e mester tin kurashi i fortalesa. Humildat ta lo kontrario di orguyo i arogansia, i e tin di haber ku e manera ku nos ta mira nos mes. Un dikshonario di Beibel ta bisa: “Humildat ta ora nos ta rekonosé kon insignifikante nos realmente ta na komparashon ku Dios.” Si di bèrdat nos ta humilde, nos lo no pensa ku nos ta mas ku otro hende. (Rom. 12:3; Flp. 2:3) No ta fásil pa hende imperfekto kultivá humildat. Pero nos por hasié si nos meditá riba nos posishon insignifikante kompará ku Yehova i si nos sigui den e pasonan di Hesus.

5, 6. (a) Ken ta Miguel e arkangel? (b) Kon Miguel a demostrá un aktitut humilde?

⁵ Kon Hesus a demostrá humildat? E Yu di Dios semper tabata humilde, tantu ora e tabata un angel poderoso den shelu komo ora e tabata un hòmber perfekto riba tera. Laga nos wak algun ehèmpel.

⁶ Su aktitut. Den e buki bíbliko di Hudas, nos ta haña un ehèmpel di humildat ku Hesus a demostrá durante un suseso ku a tuma lugá promé ku el a bini na tera. (Lesa Hudas 9.) Miguel—kende ta Hesus den su posishon di arkangel, òf hefe di e angelnan—“tabatin un desakuerdo ku Diabel” i a “diskutí” ku e malbado ei “tokante e kurpa di Moises.” Beibel ta bisa ku despues ku Moises a muri, Yehova a dera su kurpa na un lugá ku niun hende no por a haña. (Deu. 34:5, 6) Dikon Yehova a hasi esei? Kisas Diabel tabata ke pa e israelitanan adorá e kurpa di Moises. Sea kual sea e plan malisioso di Diabel tabata, Miguel a par’é ku kurashi. Segun un ensiklopedia, e palabranan griego tradusí komo “tabatin un desakuerdo” i ‘a diskutí’ ta ser usá tambe pa deskribí “un disputa legal” i kisas ta indiká ku “Miguel ‘a kuestioná Diabel su derecho’ di bai ku e kurpa di Moises.” Sinembargo, Miguel, e hefe di e angelnan, tabata sa ku e no tabatin e outoridat di kondená Diabel, ni maske si esaki a provok’é. Pues, el a laga e kaso den man di e Hues Supremo, Yehova. Ki un aktitut humilde Hesus a demostrá!

7. Kon Hesus su manera di papia i di aktua a demostrá ku e ta humilde?

⁷ Durante Hesus su sirbishi riba tera, el a demostrá na su manera di papia i di aktua ku e tabata un persona humilde. Su manera di papia. Hesus nunka a hala atenshon na su mes. Na lugá di esei, semper el a dirigí tur gloria na su Tata. (Mar. 10:17, 18; Huan 7:16) Nunka e no a papia ku su disipelnan na un manera ku a laga nan sinti ku nan ta bobo òf inferior. Al kontrario, el a papia ku nan ku rèspèt i dignidat, a elogiá  nan pa nan bon kualidatnan i a ekspresá konfiansa den nan. (Luk. 22:31, 32; Huan 1:47) Su manera di aktua. Hesus a skohe pa hiba un bida simpel, sin hopi kos material. (Mat. 8:20) E tabata dispuesto pa hasi tareanan humilde ku otronan no kier a hasi. (Huan 13:3-15) Ademas, el a demostrá humildat ekstraordinario mediante su obedensia. (Lesa Filipensenan 2:5-8.) Distinto for di personanan arogante ku no gusta obedesé otro hende, Hesus a kumpli humildemente ku tur loke Yehova a mand’é hasi, sí, el “a bira obediente te na morto.” Ta bisto anto ku Hesus, e Yu di hende, tabatin “un kurason humilde.”—Mat. 11:29.

8, 9. Kon nos por demostrá humildat?

⁸ Kon nos por imitá Hesus su humildat? Nos aktitut. Ora nos ta humilde, nos lo evitá di hasi kosnan ku nos no ta outorisá pa hasi, i nos lo rekonosé ku nos no tin derecho di husga otro hende. Nos lo no ta kla pa kritiká hende ni kuestioná nan motibunan. (Luk. 6:37; Sant. 4:12) Humildat ta yuda nos pa nos no ta “demasiado hustu.” Esaki ke men ku nos lo no menospresiá e rumannan ku tin ménos abilidat òf privilegio ku nos. (Ekl. 7:16) Ansianonan humilde no ta kere ku nan ta mihó ku nan rumannan. Al kontrario, un wardadó lo ‘konsiderá otro hende superior’ i lo komportá su mes komo “esun di mas chikitu.”—Flp. 2:3; Luk. 9:48.

⁹ Tuma por ehèmpel Walter Thorn, kende na aña 1894 a kuminsá sirbi komo peregrino (loke nos ta yama awe superintendente di sirkuito). Despues di hopi aña den e trabou ei, nan a kambia su asignashon. E mester a bai atendé e krio di galiña na e Hasienda di Reino den e estado di New York. Tabatin biaha ku Ruman Thorn tabata sinti ku eigenlijk e meresé un trabou mas importante. Kiko e tabata hasi e ora ei? El a konta: “Ki ora ku mi kuminsá kere ku mi ta masha kos, mi ta bai den un huki ku mi mes, na moda di papia, i mi ta bisa mi mes: ‘Tende aki, pipita di stòf. Ken bo ta kere ku bo ta?’” (Lesa Isaías 40:12-15.) Esei ta un aktitut humilde!

10. Kon nos manera di papia i di aktua por demostrá ku nos ta humilde?

¹⁰ Nos manera di papia. Loke nos ta papia ku otro hende ta indiká si nos ta humilde òf nò. (Luk. 6:45) Den nos kòmbersashonnan, nos lo no hala atenshon na nos propio logro- i privilegionan. (Pro. 27:2) Na lugá di esei, nos lo konsentrá riba e kosnan bon ku nos rumannan ta hasi i elogiá nan pa nan bon kualidatnan, abilidatnan i logronan. (Pro. 15:23) Nos manera di aktua. Kristiannan humilde no ta trata di bira famoso ni importante den e mundu akí. Nan ta preferá di hiba un bida simpel, i kisas asta ta hasi trabou ku mundu ta konsiderá di kategoria inferior, ya asina nan por sirbi Yehova mas tantu posibel. (1 Tim. 6:6, 8) Mas ku tur kos, nos ta demostrá humildat ora nos ta obedesidu. Un persona mester ta humilde pa e por aseptá i sigui e guia ku ta bini for di e organisashon di Yehova i pa “obedesé esnan ku ta dirigí” e kongregashonnan lokal.—Heb. 13:17.

11. Splika kiko ternura i kompashon ta enserá.

¹¹ Kiko ternura ta enserá? E palabra “tierno,” ku ta bini di “ternura,” ta deskribí emoshonnan suave i kariñoso. Ternura ta un faseta di amor i ta similar na otro emoshonnan suave manera kompashon i miserikòrdia. Beibel ta papia di “tierno kompashon,” “tierno miserikòrdia” i “tierno  kariño.” (Luk. 1:78; 2 Kor. 1:3; Flp. 1:8) Segun un dikshonario bíbliko, kompashon ta enserá mas ku djis sinti duele di hende den nesesidat. Ora ku di bèrdat nos tin tierno sintimentu, nos lo ta ‘asina interesá den otro hende ku nos ta preokupá pa nan i lo ke hasi algu pa kambia nan bida pa mas mihó.’ Ternura i kompashon ta motivá un persona pa hasi algu pa aliviá e sufrimentu di otro hende.

12. (a) Kiko ta mustra ku Hesus tabatin tierno kompashon pa otro hende? (b) Kiko Hesus su kompashon a motiv’é pa hasi?

¹² Kon Hesus a demostrá ternura i kompashon? Su sintimentunan i manera di aktua. Hesus a sinti tierno kompashon pa hende. Ora el a mira Maria i e hendenan huntu kuné ta yora pasobra Lázaro a muri, e tambe a kuminsá yora. (Lesa Huan 11:32-35.) Kompashon a motivá Hesus pa lanta e yu hòmber di e biuda di Nain for di morto. I e mesun kualidat ei a konmov’é pa resusitá su amigu Lázaro. (Luk. 7:11-15; Huan 11:38-44) Ku e akto di ternura ei, Hesus kisas a duna Lázaro e oportunidat di haña bida den shelu. Na un okashon anterior, Hesus a “sinti kompashon” pa un grupo grandi di hende ku a bini serka dje. Su tierno kompashon a motiv’é pa “siña nan hopi kos.” (Mar. 6:34; BS) E bida di tur esnan ku a hasi kaso di su siñansa a drecha konsiderablemente! No tin duda ku Hesus su kompashon tabata mas ku djis un sintimentu. E kualidat ei a motiv’é pa tuma e inisiativa pa yuda hende den nesesidat.—Mat. 15:32-38; 20:29-34; Mar. 1:40-42.

13. Kon Hesus a papia ku hende? (Wak e promé plachi.)

¹³ Su manera di papia. Hesus su ternura a motiv’é pa papia amablemente ku hende, foral ku esnan pober i maltratá. Apòstel Mateo a sita e siguiente palabranan di Isaías i a apliká nan na Hesus: “Lo e no trapa riba ningun kaña kibrá, i lo e no paga ningun mecha ku ta huma.” (Mat. 12:20; Isa. 42:3) Kiko esaki ta nifiká? Hesus no a papia malu ku hende ni maltratá nan. Mas bien, su palabranan a animá hende ku tabata manera kaña kibrá òf mecha di un lampi ku tabata serka di paga. El a prediká un mensahe di speransa “pa kura hende di kurason kibrá.” (Isa. 61:1) El a invitá hende ku tabata “traha duru i ku ta kargá” pa bini serka dje pa asina e por a “refreská” nan. (Mat. 11:28-30) Ademas, el a sigurá su disipelnan ku Dios ta masha interesá den kada un di Su sirbidónan, inkluso den “e chikitunan,” esta, esnan ku for di e punto di bista di mundu kisas no tabata parse importante.—Mat. 18:12-14; Luk. 12:6, 7.

14. Kon nos por kultivá ternura i kompashon pa otro hende?

¹⁴ Kon nos por imitá Hesus su ternura i kompashon? Nos sintimentunan. Kisas di naturalesa nos no tin e sintimentunan ei, pero Beibel ta urgi nos pa kultivá nan. “Tierno kompashon” ta parti di e personalidat nobo ku Yehova ta ferwagt pa tur kristian bisti. (Lesa Kolosensenan 3:9, 10, 12.) Kon bo por kultivá ternura i kompashon pa otro hende? Beibel ta bisa: “Habri boso kurason hanchu.” (2 Kor. 6:11-13) Tambe bo por skucha ku atenshon ora un hende ta konta bo kon e ta sintié i kiko ta preokup’é. (Sant. 1:19) Purba di imaginá bo e situashon i puntra bo mes: ‘Si ami ta den su lugá, kon lo mi sinti mi? Kiko lo mi tin mester?’—1 Ped. 3:8.

15. Kiko nos por hasi pa yuda rumannan ku kisas ta manera un kaña kibrá òf mecha ku ta serka di paga?

¹⁵ Nos manera di aktua. Ternura i kompashon  ta motivá nos pa hasi algu pa yuda otro hende, foral esnan ku ta pena i ku ta sinti nan mes manera un kaña kibrá òf un mecha ku ta serka di paga. Kon nos por yuda nan? Romanonan 12:15 ta bisa: “Yora ku esnan ku ta yora.” Hopi biaha, hende desanimá tin mas mester di konsuelo ku di solushon. Loke nan mester ta un amigu òf amiga ku ta komprondé nan i skucha nan. Un Testigu ku a haña gran konsuelo serka e rumannan despues ku su yu muhé a muri a bisa: “Mi tabata gusta ora e rumannan bini mi kas i simplemente yora huntu ku mi.” Un otro manera ku nos por mustra tierno kariño ta di hasi kosnan práktiko pa yuda e rumannan. Bo konosé un biuda ku mester di yudansa pa drecha algun kos na su kas? Òf tin un ruman di edat ku mester di transpòrt pa yega reunion, pa sali den sirbishi òf pa bai dòkter? Asta un akto chikitu di bondat por nifiká hopi pa un ruman ku ta den nesesidat. (1 Huan 3:17, 18) Mas ku tur kos, nos por demostrá kompashon pa otro hende ora nos ta partisipá plenamente den e trabou di prediká e bon notisia. Esei ta e mihó kos ku nos por hasi pa hende di kurason onrado!

16. Kiko nos por bisa pa animá rumannan ku ta deprimí?

¹⁶ Nos manera di papia. Nos tierno kariño pa otro hende ta motivá nos pa “papia palabranan di konsuelo ku esnan ku ta deprimí.” (1 Tes. 5:14) Kon nos por lanta e ánimo di esnan deprimí? Nos por laga nan sa ku nos ta realmente interesá den nan. Nos por elogiá nan i yuda nan mira nan bon kualidatnan i abilidatnan. Tambe nos por kòrda nan kon balioso nan ta den bista di Yehova ya ku ta é a yuda nan haña e bèrdat. (Huan 6:44) Ademas, nos por sigurá nan ku Yehova ta profundamente interesá den su sirbidónan ku tin un “kurason kibrá” òf un “spiritu abatí.” (Sal. 34:18) Nos palabranan di kariño por fria e doló di rumannan ku tin mester di konsuelo.—Pro. 16:24.

17, 18. (a) Kon Yehova ke pa ansianonan trata su karnénan? (b) Kiko nos lo analisá den e siguiente artíkulo?

¹⁷ Ansianonan, Yehova ta ferwagt di boso ku boso ta trata su karnénan ku ternura i kompashon. (Echo. 20:28, 29) Kòrda ku el a duna boso e responsabilidat di alimentá, animá i refreská su karnénan. (Isa. 32:1, 2; 1 Ped. 5:2-4) Pues, un ansiano ku tin tierno kompashon lo no purba di dominá e karnénan, es desir, lo e no traha regla pa nan ni pone preshon riba nan pa hasi mas di loke nan sirkunstansianan ta permití. Mas bien, lo e sòru pa e rumannan ta kontentu, teniendo e konfiansa ku nan amor pa Yehova lo motivá nan pa sirbié mas plenamente posibel.—Mat. 22:37.

¹⁸ Segun ku nos ta meditá riba e humildat i ternura ku Hesus a demostrá, nos lo sinti nos motivá pa sigui kana den su pasonan. Den e siguiente artíkulo, nos lo analisá dos aspekto mas di Hesus su bunita personalidat, esta, su kurashi i bon huisio.