1, 2. (a) Kiko nos mester hasi pa haña salbashon? (b) Kiko por yuda nos keda riba e kaminda ku ta hiba na bida eterno?

ORA nos a bira disipel di Kristu, ta komo si fuera nos a kuminsá un biahe. E biahe ei ta hiba nos na bida eterno, sea den shelu òf riba tera. Hesus a bisa: “Esun ku perseverá te na fin ta esun ku lo ser salbá.” (Mat. 24:13) Sí, pa nos haña salbashon, nos tin ku keda fiel na Dios “te na fin,” sea ta fin di nos bida òf fin di e mundu malbado akí. Pero nos tin ku tene kuidou sí pa mundu no kita nos tinu òf pone nos pèrdè kaminda. (1 Huan 2:15-17) Kon nos por keda riba e bon kaminda durante nos biahe?

² Nos tin ku sigui e ehèmpel perfekto di Hesus. El a mustra nos e kaminda ku ta hiba na bida. Ora nos ta studia loke Beibel ta bisa di su biahe, nos por haña sa ki sorto di persona e ta. Anto nos lo por siña stim’é i pone fe den dje. (Lesa 1 Pedro 1:8, 9.) Kòrda ku apòstel Pedro a bisa ku Hesus a laga un ehèmpel pa nos sigui su pasonan fielmente. (1 Ped. 2:21) Si nos imitá e ehèmpel di Hesus kuidadosamente, nos lo yega nos  destinashon, esta, “e meta” di nos fe: nos salbashon. * Den e artíkulo anterior, nos a siña kon nos por imitá e ehèmpel di Hesus i mustra humildat i ternura. Laga nos analisá awor kon nos por sigui su pasonan i mustra kurashi i bon huisio.

3. Kiko kurashi ta enserá, i kon nos por kultiv’é?

³ Kiko kurashi ta enserá? Kurashi ta un sintimentu di konfiansa ku ta duna nos fortalesa i ta yuda nos wanta prueba. Un persona ku kurashi ta perseverá apesar di kontratempu, e ta defendé loke ta korekto i e ta soportá sufrimentu ku dignidat i konfiansa. Kurashi ta estrechamente ligá ku temor, speransa i amor. Den ki manera? E temor di desagradá Dios lo duna nos e forsa pa vense temor di hende. (1 Sam. 11:7; Pro. 29:25) Berdadero speransa ta yuda nos wak futuro ku konfiansa i no enfoká riba nos pruebanan. (Sal. 27:14) Amor ta motivá nos pa sakrifiká nos mes pa otro hende asta ora nos bida ta na peliger. (Huan 15:13) Kiko lo yuda nos haña kurashi? Nos tin ku konfia den Dios i sigui e pasonan di su Yu.—Sal. 28:7.

4. Kon Hesus a demostrá kurashi ora e tabatin 12 aña? (Wak e promé plachi.)

⁴ Tempu ku Hesus tabata yòn, el a demostrá kurashi i a defendé loke ta korekto. Un biaha, ora e tabatin 12 aña, e tabata “den tèmpel, sintá meimei di e maestronan.” (Lesa Lukas 2:41-47.) E maestronan religioso ei tabata bon vèrsá den e Lei di Moises i tambe den e tradishonnan hudiu ku eigenlijk a stroba hende di obedesé e Lei. Pero Hesus no tabatin miedu; e no a laga nan konosementu pon’é keda ketu. Al kontrario, el a sigui “hasi nan pregunta,” i no pregunta ku normalmente un mucha kurioso ta hasi. Nos por imaginá ku Hesus a hasi preguntanan profundo ku a pone nan pensa. Anto si e maestronan ei a kere ku nan por a kue Hesus den trampa ku preguntanan kontroversial, nan a dal nan dede duru! Kon nos por sa? Wèl, Beibel ta bisa ku tur esnan ku tabata skuch’é—inkluyendo e maestronan—a keda asombrá “di e kontestanan ku e tabata duna i di kuantu kos e tabata komprondé.” Sí, ku kurashi Hesus a defendé e Palabra di Dios!

5. Menshoná algun manera ku Hesus a demostrá kurashi durante su sirbishi.

⁵ Hesus a demostrá kurashi den vários manera durante su sirbishi. Por ehèmpel, sin miedu el a bisa e hendenan ku e lidernan religioso tabata gaña nan ku nan siñansanan falsu. (Mat. 23:13-36) El a para firme kontra e mal influensia di mundu. (Huan 16:33) El a sigui prediká, apesar ku opositornan tabata pone preshon riba dje p’e stòp. (Huan 5:15-18; 7:14) Anto dos biaha el a limpia e tèmpel i a kore ku e hendenan ku tabata mustra falta di rèspèt pa e adorashon di Yehova.—Mat. 21:12, 13; Huan 2:14-17.

6. Kon Hesus a demostrá kurashi riba e último dia di su bida riba tera?

⁶ Ta bon tambe pa nos reflekshoná riba e kurashi ku Hesus a demostrá ora el a hañ’é ku prueba, ya ku esei por fortalesé nos fe. Por ehèmpel, wak kiko a sosodé riba e último dia di su bida riba tera. E tabata sa kiko lo a bai pasa kuné despues ku Hudas lo a traishon’é. Tòg, na e sena di Pasku Hudiu el a bisa Hudas: “Loke bo ta hasiendo, kaba di hasié pa kaba.” (Huan 13:21-27) Despues, den e Hòfi di Getsémani, ora e sòldánan a bini pa arestá Hesus, e no tabatin miedu di identifiká su mes. Aunke su propio bida tabata na peliger, el a protehá  su disipelnan bisando e sòldánan pa laga nan bai. (Huan 18:1-8) Ora e tabata dilanti di Sanedrin, e no tabatin miedu di konfirmá ku é tabata e Kristu i e Yu di Dios, maske e tabata sa ku e sumo saserdote tabata buska un motibu pa mat’é. (Mar. 14:60-65) Hesus a mantené su integridat na Dios te na morto riba e staka di tormento. P’esei, promé ku el a hala su último rosea, e por a bisa: “Tur kos a kumpli!”—Huan 19:28-30.

7. (a) Hóbennan, kiko boso ta pensa di e echo ku boso ta Testigu di Yehova? (b) Kon boso por demostrá ku boso tin kurashi?

⁷ Kon nos por imitá Hesus su kurashi? Na skol. Hóben, bo ta demostrá ku bo tin kurashi ora bo ta kla pa laga bo kompañeronan di klas i otro hende sa ku bo ta un Testigu di Yehova. Asina bo ta mustra ku bo ta orguyoso di karga e nòmber di Yehova, asta si hende ta tenta bo. (Lesa Salmo 86:12.) Kisas hende ta pone preshon riba bo pa bo kere den evolushon. Pero bo tin motibunan sólido pa konfia ku loke Beibel ta bisa tokante kreashon ta bèrdat. Bo por usa e foyeto Dios Realmente Ta Interesá den Nos? òf Sinku Pregunta Importante Tokante Orígen di Bida (na spañó) pa duna un kontesta konvinsente na esnan ku ke sa e “motibu di e speransa ku [bo] tin.” (1 Ped. 3:15) Si bo hasi esei, lo bo sinti bo bon pasobra bo a defendé e Palabra di Dios ku kurashi!

8. Menshoná algun motibu ku nos tin pa prediká ku kurashi.

⁸ Den sirbishi. Komo kristian berdadero, Yehova ta fortalesé nos pa sigui “papia ku kurashi.” (Echo. 14:3) Dikon nos por prediká ku kurashi? Pa vários motibu. Di promé, nos sa ku loke nos ta prediká ta e bèrdat pasobra e ta basá riba Beibel. (Huan 17:17) Di dos, “nos ta kompañero di trabou di Dios,” i el a duna nos su spiritu santu pa apoyá nos. (1 Kor. 3:9; Echo. 4:31) Di tres, ora nos ta hasi esfuerso pa papia ku mas tantu hende posibel tokante e bon notisia, nos ta demostrá nos deboshon na Yehova i nos amor pa próhimo. (Mat. 22:37-39) P’esei nos ta demostrá kurashi i no ta laga niun hende silensiá nos. Al kontrario, nos ta determiná pa saka na kla e mentiranan religioso ku ta siega hende pa e bèrdat. (2 Kor. 4:4) Nos lo sigui prediká e bon notisia apesar ku e hendenan ta indiferente, ta hasi bofon di nos òf ta persiguí nos.—1 Tes. 2:1, 2.

9. Kon nos por demostrá kurashi ora nos ta enfrentá prueba?

⁹ Ora nos ta enfrentá prueba. Nos konfiansa den Dios ta duna nos e fe i kurashi nesesario pa wanta difikultat. Naturalmente nos ta sinti nos masha tristu ora un ser kerí muri, pero nos no ta pèrdè speransa. Nos tin konfiansa ku e “Dios di tur konsuelo” lo fortalesé nos. (2 Kor. 1:3, 4; 1 Tes. 4:13) Kisas nos tin doló ora nos ta gravemente malu òf heridá, pero nos lo rechasá kualke tratamentu ku ta bai kontra di prinsipionan bíbliko. (Echo. 15:28, 29) “Asta si nos kurason ta kondená nos” ora nos ta deprimí, nos lo no entregá, pasobra nos ta konfia den Yehova, e Dios ku “ta serka di e hende di kurason kibrá.” *—1 Huan 3:19, 20; Sal. 34:18.

10. Kiko bon huisio ta enserá, i kon un kristian ku tin bon huisio ta papia i aktua?

¹⁰ Bon huisio ta konektá ku disernimentu. E ta enserá ku un hende tin e kapasidat di distinguí loke ta bon for di loke ta malu i ta skohe pa hasi loke ta korekto. (Heb. 5:14) Un kristian ku tin bon huisio ta tuma  desishonnan ku lo fortalesé su relashon ku Dios. E ta papia i aktua na maneranan ku ta agradá Dios. E ta skohe palabranan ku ta animá otro hende na lugá di ofendé nan. (Pro. 11:12, 13) Ademas, e “no ta rabia lihé.” (Pro. 14:29) E ta “kana den rektitut,” es desir, e ta sòru p’e keda riba e kaminda korekto durante henter su bida. (Pro. 15:21) Kon nos por desaroyá bon huisio? Nos tin ku studia e Palabra di Dios i pone na práktika loke nos ta siña. (Pro. 2:1-5, 10, 11) Mas ku tur kos, nos ta studia i imitá e ehèmpel di Hesus, kende semper a aktua ku bon huisio.

11. Kon Hesus a demostrá na su manera di papia ku e tabatin bon huisio?

¹¹ Hesus a demostrá bon huisio den tur loke el a bisa i hasi. Su manera di papia. Ora Hesus tabata prediká e bon notisia, el a skohe “palabranan yen di grasia” ku a laga su oyentenan babuká. (Luk. 4:22; Mat. 7:28) E tabatin e kustumber di laga e Palabra di Dios papia p’e. El a lesa i sita for di dje i tabata sa presis kua teksto pa usa pa kada situashon. (Mat. 4:4, 7, 10; 12:1-5; Luk. 4:16-21) Ademas, Hesus a splika e Skritura na un manera ku su palabranan tabatin un efekto profundo riba hende. Por ehèmpel, despues di su resurekshon, el a papia ku dos disipel ku tabata riba kaminda pa Emaus i “a splika nan e kosnan tokante su mes den henter e Skritura.” Kon nan a reakshoná? Despues e disipelnan a bisa: “Nos kurason no tabata manera na kandela . . . segun ku e tabata splika nos e Skritura na plaka chikí?”—Luk. 24:27, 32.

12, 13. Menshoná algun ehèmpel ku ta demostrá ku Hesus tabata slo pa rabia i tambe rasonabel.

¹² Su emoshonnan i aktitut. Bon huisio a yuda Hesus kontrolá su emoshonnan, i p’esei e tabata slo pa rabia. (Pro. 16:32) E tabatin un “genio suave.” (Mat. 11:29) Semper Hesus a tene pasenshi ku su disipelnan, apesar di nan defektonan. (Mar. 14:34-38; Luk. 22:24-27) I el a keda kalmu asta ora hende a trat’é inhustamente.—1 Ped. 2:23.

¹³ Bon huisio a yuda Hesus pa ta rasonabel. E tabata sa presis kiko e Lei di Moises tabata bisa, pero tambe el a komprondé e intenshon di e reglanan di e Lei ei, i esaki a influensiá e manera ku el a trata hende. Por ehèmpel, laga nos wak e relato na Marko 5:25-34 tokante un muhé ku tabatin “un sangramentu.” (Les’é.) E muhé a pasa meimei di un multitut di hende, mishi ku e paña di Hesus i kura. Segun e Lei, e tabata impuru i no tabatin mag di mishi ku niun hende. (Lev. 15:25-27) Pero Hesus no a skual e. Mas bien, Hesus a mustra “miserikòrdia i fieldat” pasobra e tabata sa ku eseinan tabata kualidatnan mas importante di e Lei. (Mat. 23:23) Hesus a bis’é bondadosamente: “Mi yu, bo fe a kura bo. Bai na pas, sea salú i ku e malesa penoso akí no molestiá bo mas.” Esta un bunita ehèmpel! Hesus su bon huisio a motiv’é pa mustra bondat.

14. Kiko tabata e kos di mas importante pa Hesus, i kiko el a hasi pa kumpli ku su asignashon?

¹⁴ Su prioridatnan. Hesus a demostrá ku e tin bon huisio ora el a skohe e kaminda korekto i a pega na esei. E trabou di prediká e bon notisia tabata e kos di mas importante p’e, i el a hasi esei su karera. (Luk. 4:43) Pues, Hesus a tuma desishonnan ku a yud’é keda enfoká riba su asignashon i kumpli kuné. Por ehèmpel, el a skohe pa tene su bida simpel ya asina e por a dediká tur su tempu i energia na siña hende e bèrdat. (Luk. 9:58) E tabata konsiente tambe ku e mester a entrená su disipelnan pa nan por a sigui prediká despues di su morto. (Luk. 10:1-12; Huan 14:12) Anto el a primintí nan ku lo el a yuda nan den e trabou di prediká “te na konklushon di e era akí.”—Mat. 28:19, 20.

15. Kon nos manera di papia por demostrá ku nos tin bon huisio?

¹⁵ Kon nos por imitá Hesus i aktua ku bon huisio? Nos manera di papia. Ora nos ta papia ku nos rumannan, semper nos ta purba di animá nan. Nos ta evitá di usa palabranan ku ta laga nan sinti nan malu òf ku ta kibra nan. (Efe. 4:29) Ora nos ta papia ku hende tokante e Reino di Dios, nos ta sòru pa nos palabranan ta “sasoná ku salu,” es desir, nos ta papia ku takto. (Kol. 4:6) Promé ku nos presentá nos mensahe den e trabou di kas pa kas, nos ta trata di pensa kiko e hendenan mester i den kiko nan ta interesá, kaba nos ta skohe nos palabranan di akuerdo ku esei. No lubidá ku palabranan amabel por ‘habri porta’ pa e hendenan skucha nos, i yega na nan kurason. Ademas, ora nos tin ku splika nos kreensianan, nos ta laga Beibel papia pa nos. E ta nos outoridat. Pues, nos ta sita i lesa for di dje ki ora ku nos haña un oportunidat. Nos sa ku e palabranan di Beibel ta muchu mas konvinsente ku kualke kos ku nos mes bisa.—Heb. 4:12.

16, 17. (a) Kon nos por demostrá ku nos ta slo pa rabia i rasonabel? (b) Kon nos por sigui enfoká riba e trabou di prediká?

¹⁶ Nos emoshonnan i aktitut. Bon huisio ta yuda nos kontrolá nos emoshonnan ora nos ta bou di preshon, i asina nos lo ta “slo pa rabia.” (Sant. 1:19) Ora un hende ofendé nos, nos lo purba di komprondé dikon el a papia i aktua asina. E ora ei lo ta mas fásil pa nos keda kalmu i “laga un ofensa pasa.” (Pro. 19:11) Tambe bon huisio ta yuda nos pa ta rasonabel. Nos mester ta realista i no ferwagt perfekshon for di nos rumannan. Mas bien, nos lo kòrda ku kisas nan ta enfrentá problemanan ku nos no ta na altura di dje. Nos lo ta dispuesto pa skucha nan opinion, i ora ta posibel, nos ta sede, es desir, nos no ta keda insistí riba nos punto di bista.—Flp. 4:5.

¹⁷ Nos prioridatnan. Komo disipel di Hesus, nos sa ku predikashon di e bon notisia ta e privilegio di mas grandi ku nos por tin. Pues, nos lo ke tuma desishonnan ku lo yuda nos sigui enfoká riba e trabou di prediká. Nos ta skohe pa tene kosnan spiritual na promé lugá. Nos ta hiba un bida simpel ya nos por dediká nos tempu i energia na e trabou importantísimo di prediká e bon notisia promé ku e fin yega.—Mat. 6:33; 24:14.

18. Kon nos por keda riba e kaminda ku ta hiba na bida eterno, i kiko abo ta determiná pa hasi?

¹⁸ Esta dushi ku nos por a meditá riba algun bunita kualidat di Hesus! Imaginá kuantu benefisio mas nos lo por saka si nos studia su otro kualidatnan i siña kon nos por ta mas manera é. Pues, laga nos ta determiná pa sigui su pasonan fielmente. Si nos hasi esei, nos lo keda riba e kaminda ku ta hiba na bida eterno i nos lo hala mas serka Yehova, Esun ku Hesus a imitá perfektamente.