TABATA meimei di aña 1970. Mi tabata un sòldá di 20 aña i interná den Hospital General Valley Forge di Phoenixville, na Pennsylvania (Merka). Mi tabatin un infekshon grave. Kada mei ora, un bruder tabata kue mi preshon, i kada biaha e preshon tabata mas abou. E bruder tabata un par di aña mas grandi ku mi i tabata mustra hopi preokupá. M’a puntr’é: “Bo no a yega di mira un hende muri nunka, no?” Su kara a bira blek, i el a kontestá mi: “Nò, nunka.”

E tempu ei kos no tabata pinta muchu bon pa mi. Pero kon bini mi tabata den hospital, kasi pa muri? Wèl, laga mi konta bo.

M’a bira malu durante e guera na Vietnam, tempu ku mi tabata traha komo asistènt di sala di operashon. Mi tabata gusta yuda hende malu i heridá, i mi kier a bira siruhano. M’a yega Vietnam na yüli 1969. Komo ku m’a kaba di yega, m’a haña un siman di orientashon pa asina mi por a adaptá mi mes na e diferensia di ora i na e kalor sofokante.

Djis despues ku m’a presentá pa traha na e hospital di sirugia na e base militar Dong Tam, den e delta di Riu Mekong, helikòpternan a kuminsá yega un tras di otro ku sòldánan heridá i morto. Mi tabata masha patriótiko i tabata gusta traha, pues m’a kuminsá yuda mesora. Nos tabata prepará e heridonan i kaba hiba nan purá na un di e kònteinernan airekondishoná ku tabata fungi komo sala di operashon. Den e espasio chikí ei, un siruhano, un anestesiólogo i dos bruder mester a hasi nan bèst pa salba bida di mas tantu sòldá posibel. M’a ripará algun saku pretu grandi ku nan no tabata baha for di e helikòpternan. Nan a bisa mi ku den e sakunan ei tabatin e restunan di sòldánan ku bala òf bòm a spat for di otro. Esei tabata mi promé kontakto ku guera.

Un par di aña promé ku mi a bai guera, mi tabatin kontakto breve ku Testigunan di Yehova. Mi mama stimá a studia Beibel ku nan, ma e no a batisá. Mi tabata gusta sinta huntu ku mi mama ora e tabata studia. Pero un biaha, m’a pasa dilanti di  un Salòn di Reino huntu ku mi tata di kriansa. Ora m’a puntr’é ta kua lugá esei ta, e di ku mi: “No pensa mes di bai serka e hendenan ei!” Mi tabata stima mi tata di kriansa i a konfi’é, pues m’a sigui su konseho. Asina m’a pèrdè kontakto ku Testigunan di Yehova.

Despues ku m’a bini bèk for di Vietnam, m’a sinti e nesesidat di buska Dios. E mal rekuerdonan di e guera a traha masha hopi ku mi. Tabata parse ku niun hende no tabata komprondé kiko realmente tabata pasando na Vietnam. Tabatin rumor ku sòldánan merikano tabata mata muchanan inosente den e guera ei. Mi ta kòrda ku durante marchanan di protesta e hendenan tabata yama e sòldánan asesino di bebi.

Pa satisfasé mi hamber spiritual, m’a kuminsá bishitá vários iglesia. Semper mi tabatin un amor pa Dios, pero mi no tabata gusta loke mi tabata mira den e iglesianan. Finalmente, m’a bishitá un Salòn di Reino di Testigunan di Yehova na Delray Beach (Flórida). Mi ta kòrda ku tabata un djadumingu na febrüari 1971.

Ora m’a drenta e Salòn di Reino, e diskurso públiko tabata kabando, i m’a keda pa e estudio di E Toren di Vigilansia. Mi no ta kòrda mas di kiko nan a papia, pero loke sí mi ta kòrda ta ku mucha chikitu mes tabata buska e tekstonan di Beibel. M’a keda babuká! M’a sinta ketu skucha i opservá. Ora mi tabata saliendo for di e Salòn di Reino, un ruman hòmber di mas o ménos 80 aña a aserká mi. Su nòmber tabata Jim Gardner. E ruman stimá akí a mustra mi e buki E berdad cu ta hiba na bida eterna i a puntra mi: “Lo bo ke aseptá e buki akí?” Mesora nos a traha un afsprak pa studia djaweps mainta.

Mi tabata traha den e sala di emergensia di un hospital privá na Boca Raton (Flórida), i e djadumingu anochi ei mi mester a traha 11 pa 7. Komo ku tabata un anochi trankil, m’a haña un bon chèns di lesa e buki Berdad. Un zùster a aserká mi, ranka e buki fo’i mi man, wak e kaft i grita: “Bo no ta bai bira un di nan, no?” M’a kita mi buki Berdad fo’i dje i mi di kuné: “M’a lesa apénas mitar di e buki, pero manera kos ta pinta, kasi sigur ku sí!” El a bira bai laga mi, i e anochi ei mes m’a kaba di lesa e buki.

Promé kos ku m’a puntra Ruman Gardner ora el a bin studia mi tabata: “Kiko nos ta bai studia?” El a kontestá: “E buki ku m’a duna bo.” Mi di kuné: “M’a les’é kaba.” Ruman Gardner a kontestá mi: “Wèl, laga nos konsiderá djis e promé kapítulo.” M’a keda sorprendí ora m’a ripará kuantu kos mi no a kapta ora mi so a les’é. El a laga mi buska masha hopi teksto den mi Beibel, ku tabata un King James. Por fin mi a kuminsá siña ken ta e Dios berdadero, Yehova. E mainta ei, m’a studia tres kapítulo di e buki Berdad ku Ruman Gardner, kende kariñosamente mi tabata yama Jim. Despues di esei, nos a keda studia tres kapítulo tur djaweps mainta. Mi tabata gusta e estudio masha hopi. Pa ami tabata un gran privilegio di por a  haña lès serka un ruman hòmber ungí ku a konosé Charles T. Russell personalmente!

Denter di algun siman m’a bira un publikadó di e bon notisia. Na kuminsamentu, Jim tabata un gran yudansa pa mi, pasobra mi tabata bira hopi nèrvioso, foral ora nos tabata bai di kas pa kas. (Echo. 20:20) Pero m’a sigui traha den sirbishi ku Jim, i despues m’a bin gusta e trabou di prediká. Te awe mi ta konsiderá sirbishi di vèlt e privilegio di mas grandi ku mi tin. No tin nada mas dushi ku ser un kompañero di trabou di Dios!—1 Kor. 3:9.

Awor, laga mi konta bo tokante un asuntu masha personal: mi promé amor pa Yehova. (Rev. 2:4) E amor ei a yuda mi superá e rekuerdonan doloroso di guera i hopi otro difikultat.—Isa. 65:17.

Tin un dia ku hamas mi por lubidá. Tabata na aña 1971. Mi tabata pasando den un periodo difísil. Poko promé, mi tata di kriansa a saka mi for di e edifisio kaminda el a permití mi biba. E no tabata ke pa niun Testigu di Yehova biba den su propiedat. Mi no tabatin masha sèn, ya ku e hospital tabata paga pa kinsena i m’a kaba di gasta kasi henter mi salario na paña pa sali den sirbishi pasobra mi kier a representá Yehova na un manera digno. Mi tabatin algun sèn di spar, ma esei tabata na un banko na Michigan, te ariba den nort di Merka, kaminda mi a lanta. Pues, no a keda mi nada otro ku biba algun dia den mi outo. Mi tabata feita i limpia mi kurpa den bañonan di pòmp di gasolin.

Un di e dianan ei, m’a yega Salòn di Reino un par di ora promé ku e grupo a reuní pa sali den sirbishi di vèlt. M’a kaba di baha warda. Mi tabata  sintá patras di e Salòn di Reino kaminda niun hende no por a mira mi. Diripiente, e mal rekuerdonan di Vietnam a poderá di mi: e holó di karni di hende kimá i e esenanan sangriento. Mi por a tende i mira kla kla kon e sòldánan yòn tabata roga mi: “Mi ta skapa? Mi ta skapa?” Mi tabata sa ku nan ta bai muri, pero tòg mi tabata purba di trankilisá nan lo mihó ku mi tabata por, miéntras ku mi tabata bringa pa mi kara no reda mi. Sintá einan den mi outo, mi hemut a yena.

M’a kuminsá hasi orashon i awa tabata basha fo’i mi wowo. (Sal. 56:8) M’a kuminsá meditá riba e speransa di resurekshon. Diripiente m’a realisá un kos: Yehova Dios lo usa e resurekshon pa eliminá tur e atrosidatnan ku m’a mira i kura e doló emoshonal ku asina tantu di nos a sufri. Dios lo lanta e hóbennan ei for di morto i duna nan e oportunidat di siña konos’é. (Echo. 24:15) E momento ei mi kurason a yena te basha over ku amor pa Yehova, un amor ku a yega te den fondo di mi alma. Te awe, e dia ei tin un lugá masha spesial den mi kurason. Djei padilanti m’a hasi mi bèst pa mi no pèrdè mi promé amor pa Yehova, foral ora di prueba i difikultat.

Den tempu di guera, hende ta hasi kosnan teribel, i ami no tabata un eksepshon. Pero loke a yuda mi superá mi sintimentunan di kulpa ta ku m’a meditá riba dos di mi tekstonan faborito. E promé ta Revelashon 12:10 i 11, ku ta bisa ku Diabel a ser vensí no solamente pa medio di e mensahe ku nos ta proklamá sino tambe pa medio di e sanger di e Lamchi. E di dos teksto ta Galationan 2:20. E versíkulo ei a siña mi ku Kristu Hesus a muri “pa mi.” Yehova ta mira ami atraves di e sanger di Hesus i a pordoná mi pa loke m’a hasi. Unabes m’a komprondé e punto ei, esaki a yuda mi ku mi por tabatin un konsenshi limpi i a motivá mi pa hasi tur mi posibel pa yuda otro hende siña konosé e bèrdat tokante nos Dios miserikòrdioso, Yehova.—Heb. 9:14.

Ora mi wak bèk riba mi bida, mi ta mira i apresiá mashá ku Yehova semper a kuida mi. Por ehèmpel, asina ku Jim a haña sa ku mi tabata biba den mi outo, el a pone mi mesora den kontakto ku un ruman muhé ku tabata hür kamber. Mi ta kere sinseramente ku Yehova a usa Jim i e ruman muhé stimá ei pa duna mi un lugá kómodo kaminda ku mi por a keda. Yehova ta masha bondadoso! E ta kuida su fiel sirbidónan.

Na mei 1971, mi mester a bai Michigan pa atendé algun asuntu. Pero promé ku m’a bai laga e kongregashon di Delray Beach, m’a yena mi baul ku literatura i a kue kabes pa nort riba e highway ku nan ta yama I-75. E baul a bira bashí promé ku m’a yega na mitar di kaminda. Tur kaminda mi tabata para pa prediká e bon notisia di Reino ku masha entusiasmo. M’a prediká na vários prizòn, i asta m’a laga tratado ku hòmbernan den baño na e paradanan di deskanso. Tin biaha mi ta puntra mi mes si algun di e simianan ku m’a planta a duna fruta.—1 Kor. 3:6, 7.

Pero mi tin ku konfesá ku na prinsipio ora ku m’a haña e bèrdat mi no tabatin masha takto, foral ora mi tabata papia ku mi famia. Mi promé amor pa Yehova tabata asina ferviente ku mi tabata papia ku kurashi wèl, ma tambe masha bòt ku nan. Mi ta stima mi dos rumannan, John ku Ron, masha hopi, i esei a pone ku mi tabata purba di konvensé nan di e bèrdat ku palabranan fuerte. Klaru ku despues mi mester a pidi nan despensa pa e manera brutu ku m’a hasié. Pero asina mes, mi no ta stòp di pidi den orashon pa un dia nan aseptá e bèrdat. Entre tantu, Yehova a siña mi, i mi ta mustra mas takto ora mi ta prediká i siña otro hende.—Kol. 4:6.

Tur momento mi ta kòrda riba mi amor pa Yehova, ma mi no ta lubidá e otro amornan den mi bida. Mi di dos amor ta mi kerido kasá Susan. Semper mi tabata ke un kompañera ku lo a yuda mi den e trabou di Reino. Susan ta un muhé spiritualmente fuerte. Mi ta kòrda bon kla un dia ku m’a bai bishit’é, tempu nos tabata namorá. E tabata sintá den balkon na kas di su mayornan na Cranston (Rhode Island) ta lesa E Toren di Vigilansia huntu ku su Beibel. Loke mas a impreshoná mi ta ku e tabata lesando un artíkulo sekundario i buska tur e tekstonan di Beibel. M’a pensa den mi mes: ‘Esaki ta un mucha muhé spiritual!’ Nos a kasa na desèmber 1971, i el a keda semper na mi lado i a apoyá mi, algu ku mi ta masha gradisidu p’e. Loke mas mi ta gusta di dje ta ku e stima mi mashá, pero e stima Yehova mas.

Yehova a bendishoná ami ku Susan ku dos yu hòmber, Jesse ku Paul. Segun ku nan tabata krese, Yehova tabata ku nan. (1 Sam. 3:19) I komo ku nan a bin stima e bèrdat, nan a trese onor pa ami ku Susan. Nan a sigui sirbi Yehova pasobra nan no a lubidá e promé amor ku nan a sinti p’e. Tur dos tin mas ku 20 aña den sirbishi di tempu kompleto. Mi ta orguyoso tambe di mi dos bunita suegranan, Stephanie ku Racquel, ku ta manera mi yu muhénan. Jesse ku Paul a kasa  ku mucha muhénan spiritual ku stima Yehova Dios ku henter nan alma i kurason.—Efe. 6:6.

Despues ku m’a batisá, m’a sirbi pa 16 aña na Rhode Island, kaminda m’a sera masha bon amistat. Mi tin grato rekuerdo di e ansianonan ekselente ku mi a traha kuné. Tambe mi ta masha gradisidu pa e superintendentenan di sirkuito ku a bishitá nos i ku tabatin un bon influensia riba mi. Esta un gran privilegio di por traha huntu ku hòmbernan ku a keda ku nan promé amor pa Yehova! Na 1987 nos a bai biba na Nort Carolina pa sirbi kaminda tabatin mas nesesidat den e trabou di prediká, i einan tambe nos a sera amistatnan presioso. *

Na ougùstùs 2002, ami ku Susan a aseptá e invitashon pa forma parti di e famia di Bètel na Patterson (Merka). Mi tabata traha den e Departamento di Sirbishi, i Susan den labanderia. E tabata stima su trabou. Despues, na ougùstùs 2005, m’a risibí e privilegio di sirbi komo un miembro di Kuerpo Gobernante. Mi no a sinti mi digno di tal asignashon. Na promé instante, mi kasá stimá a sinti ku e responsabilidat, trabou i biahamentu enbolbí lo tabata muchu p’e. Es mas, Susan nunka no tabata gusta bula den avion, i awor, na moda di papia, nos ta mas den laira ku riba tera! Susan ta bisa ku e animashon amoroso ku el a haña serka e esposanan di otro miembronan di Kuerpo Gobernante a yud’é hopi. Ami por bisa ku el a apoyá mi masha bon mes, i esaki ta laga mi stim’é mas ainda.

Den mi ofisina, mi ta rondoná pa hopi potrèt ku ta nifiká hopi pa mi! Nan ta kòrda mi ku mi tabatin un bida maravioso. Bon mirá, m’a haña kaba rekompensanan ekstraordinario pa e echo ku mi no a lubidá mi promé amor pa Yehova!