1, 2. Kon Hesus a demostrá su gran amor pa hende?

E EHÈMPEL di mas grandi i kompleto di Yehova su sabiduria insondabel tabata e kreashon di su promé Yu. E Yu akí tabata e personifikashon di sabiduria, Dios su “trahadó eksperto.” Nos por imaginá nos kon felis i satisfecho Hesus lo mester a sintié ora ku su Tata “a establesé e shelunan” i “a marka e fundeshinan di tera.” Pero di tur loke Dios a krea, e kos ku mas Hesus tabata enkantá kuné tabata “e yunan di hende,” esta, humanidat. (Pro. 8:22-31) Sí, asta promé ku Hesus a bini na mundu, e tabatin un kariño spesial pa hende.

² Mas despues, Hesus a duna prueba di su amor i lealtat pa Dios i tambe di su gran amor pa “e yunan di hende” ora ku boluntariamente “el a entregá tur loke e tabatin” p’e bira hende. El a hasi esei pa asina e por a perkurá un “reskate a kambio di hopi hende.” (Flp. 2:5-8; Mat. 20:28) Wak kon grandi su amor pa hende tabata! Riba tera, Hesus a risibí e poder di Dios pa hasi milager ku a demostrá e amor ei i ku tabata un muestra di e kosnan maravioso ku lo e hasi den futuro na un eskala mundial.

3. Kiko nos ta bai analisá den e artíkulo akí?

 ³ Ora Hesus a bini na tera, el a “deklará e bon notisia di e Reino di Dios.” (Luk. 4:43) E tabata sa ku e Reino akí lo a santifiká e nòmber di su Tata i lo a solushoná e problemanan di hende unabes pa semper. Ora nos lesa tokante Hesus su aktividat di prediká, nos ta mira ku el a hasi hopi milager ku a demostrá su interes sinsero den hende. Dikon esaki ta importante pa nos? Pasobra loke el a hasi ta yuda nos mira futuro ku optimismo i konfiansa. Laga nos analisá kuater di su milagernan.

4. Deskribí Hesus su enkuentro ku un leproso.

⁴ Hesus tabatin un tempu ta prediká kaba ora ku el a bai na un stat di Galilea. Einan el a topa un hòmber ku un malesa teribel: lepra. (Mar. 1:39, 40) Lukas, kende tabata dòkter, a bisa ku e hòmber tabata “tur na lepra,” loke ta indiká ku e malesa tabata den un estado hopi avansá. (Luk. 5:12) E relato ta sigui bisa: “Ora [e leproso] a mira Hesus, el a tira su kurpa abou i a rog’é: ‘Señor, si bo ke, bo por kura mi.’” E hòmber ei tabata sa sigur ku Hesus tabatin e poder pa kur’é, pero loke e tabata ke sa ta si Hesus tabatin e deseo di hasi esei. Kon Hesus lo a reakshoná riba e petishon sinsero akí? Kiko Hesus a sinti ora el a mira e hòmber akí ku probablemente lo tabata tur desfigurá? Hesus lo a hasi manera e fariseonan, kendenan tabata despresiá hende ku tabata sufri di lepra? Kiko abo lo a hasi?

5. Dikon Hesus kier a kura e leproso?

⁵ Aparentemente, e leproso akí no a grita: “Impuru! Impuru!,” manera Lei di Moises a stipulá. (Lev. 13:43-46) Pero Hesus no a rabia kuné. Mas bien, el a konsentrá riba e hòmber su problema, riba su nesesidat. Aunke nos no sa kiko a pasa den Hesus su mente, nos sa sí kiko a pasa den su kurason. Konmoví pa kompashon, Hesus a hasi algu inkreibel. El a saka su man, mishi ku e leproso i a bis’é ku un stèm firme, pero kariñoso: “Mi ke. Sea kurá.” I mesora “e lepra a kita for di dje.” (Luk. 5:13) Yehova a duna Hesukristu e poder no solamente p’e hasi un milager asina, sino tambe pa Hesus demostrá kuantu e tabata stima hende.—Luk. 5:17.

6. (a) Kiko ta remarkabel di e manera ku Hesus tabata kura e hendenan? (b) Kiko nos ta siña for di e milagernan di Hesus?

⁶ Ku e poder di Dios, Hesukristu a hasi milagernan asombroso. E no a kura lepra so, sino tambe hopi otro malesa mas. Beibel ta bisa ku “e multitut a keda asombrá ora nan a mira e mudanan papia, e kohonan kana bon i e siegunan mira.” (Mat. 15:31) Awe, dòkternan sa hasi transplante di órgano pa yuda nan pashèntnan, pero Hesus no tabatin nodi di hasi esei. E por a kura kualke órgano i kualke parti di e kurpa ku tabata malu. Anto e por a hasi esei mesora. Tin biaha asta el a kura hende ku tabata masha leu for di dje. (Huan 4:46-54) Kiko nos ta siña for di e ehèmpelnan asombroso akí? Wèl, Hesus, kende awor ta nos Rei den shelu, tin tantu e poder komo e deseo di kura tur malesa permanentemente. Ora nos mira kon el a trata e hendenan ku el a kura, nos ta keda mas konvensí ainda ku den e mundu nobo e profesia akí lo kumpli: “E lo tin kompashon di e pober i di esun den nesesidat.” (Sal. 72:13) Pues, Hesus ke kura tur hende ku ta sufri i lo e hasié pronto.

7, 8. Splika kiko Hesus a hasi promé ku el a topa e hòmber malu na e tanki di awa di Bètzata.

⁷ Algun luna despues di a kura e leproso, Hesus a biaha for di Galilea pa Hudea, kaminda el a sigui prediká e bon notisia di e Reino di Dios. Ku e mensahe ku e tabata proklamá i ku su aktitut bondadoso, lo e mester a kambia bida di míles di hende. Ta bisto ku Hesus kier a deklará e bon notisia na hende pober, papia di libertat ku esnan oprimí i konsolá esnan di kurason kibrá.—Isa. 61:1, 2; Luk. 4:18-21.

⁸ Den e luna di nisan, Hesus a bai Herúsalèm pa selebrá e Pasku Hudiu di akuerdo ku e mandamentu di Lei. E stat tabata yen yen di hende ku a bini pa e fiesta spesial akí. Djis pa nort di e tèmpel tabatin un tanki di awa konosí komo Bètzata, i einan Hesus a topa un hòmber malu ku no por a kana.

9, 10. (a) Dikon asina tantu hende tabata bai e tanki di awa di Bètzata? (b) Ki milager Hesus a hasi na e tanki di awa? (Wak e promé plachi.) (c) Kiko nos ta siña for di e relato akí?

⁹ Masha hopi hende malu tabata bai Bètzata. Dikon? Pasobra nan tabata kere ku nan lo por a kura milagrosamente si nan baha den e tanki di awa ora ku e awa tabata move. Imaginá bo e esena: e lugá tabata patapata di hende ku tabata warda ansiosamente riba un milager pa nan kura. Nan tabata angustiá i sin speransa. Pero kiko Hesus tabata hasi na e tanki di awa ei siendo ku e tabata un hòmber perfekto sin niun problema di salú? Kompashon a konmové Hesus pa bai serka un hòmber ku tabatin 38 aña malu. E tabata malu for di promé ku Hesus a nase riba tera!—Lesa Huan 5:5-9.

¹⁰ Bo por imaginá bo e desesperashon den kara di e hòmber ora ku Hesus a puntr’é si e ke bira bon? Klaru ku e kier a kura! Pero kon? E no tabatin niun hende pa yud’é baha den e tanki di awa. E ora ei Hesus a mand’é hasi algu imposibel: kue su kama i kana. Kon e hòmber a reakshoná? El a lanta para, kue su kama i kuminsá kana! Ki un demostrashon maravioso di loke Hesus lo hasi den e mundu nobo! Tambe e milager akí ta mustra ku Hesus a aktua ku kompashon. El a buska e persona ku mas tabatin mester di yudansa. Kiko nos por siña for di esaki? Den e trabou di prediká nos mester sigui buska personanan ku ta deprimí pa motibu di e kosnan teribel ku ta pasa den mundu.

11. Kon Marko 5:25-34 ta mustra ku Hesus a sinti kompashon pa hende malu?

¹¹ Lesa Marko 5:25-34. Un muhé tabatin 12 aña ta sufri di un situashon bergonsoso. Su malesa a afektá tur aspekto di su bida. E no por a bai ni sikiera e tèmpel pa adorá Dios. “El a sufri mashá na man di hopi dòkter i a gasta tur loke e tabatin, sin ku esei a yud’é; al kontrario, ta pió so el a bira.” Pero un dia, el a pensa di purba algu otro. El a tende di un tal Hesus ku tabata kura hende, di manera ku el a buska un chèns pa yega serka dje. El a pasa meimei di e multitut i a mishi ku Hesus su paña. (Lev. 15:19, 25) Ora Hesus a sinti ku poder a sali for di dje, el a puntra ta ken a mishi kuné. E muhé tabata “morto spantá i tabata tembla; el a bini i a kai na rudia dilanti di Hesus i a konfesá tur kos.” Ora Hesus a realisá ku ta su Tata, Yehova, a kura e muhé, el a  bis’é kariñosamente: “Mi yu, bo fe a kura bo. Bai na pas, sea salú i ku e malesa penoso akí no molestiá bo mas.”

12. (a) A base di loke nos a analisá te asina leu, kon lo bo deskribí Hesus? (b) Kon nos por imitá e ehèmpel di Hesus?

¹² Esta un bon persona Hesus ta! Den su kurason tin un lugá spesial pa hende ku ta malu. Satanas, en kambio, ke konvensé nos ku niun hende no stima nos i ku nos no bal nada. Pero e milagernan di Hesus a demostrá bon kla ku di bèrdat e ta stima nos i ta interesá den nos problemanan. Sin duda, nos tin e mihó Rei i Sumo Saserdote ku nos por imaginá! E ta kariñoso i ta pone su mes na lugá di otro hende. (Heb. 4:15) Kisas no ta fásil pa nos komprondé e sintimentunan di hende ku ta sufri di malesa króniko, foral si nos mes nunka a pasa den esei. Pero nos por kòrda ku maske Hesus tabatin un salú perfekto, tòg el a tene kompashon ku hende malu. Laga nos hasi meskos: laga nos hasi nos bèst pa pone nos mes na lugá di personanan ku tin problema ku salú.—1 Ped. 3:8.

13. Kiko e resurekshon di Lázaro ta siña nos tokante e personalidat di Hesus?

¹³ Hesus tabata sinti ègt duele ora e tabata mira hende sufri. Por ehèmpel, ora el a mira e doló di e famia- i amigunan di Lázaro, “el a suspirá profundamente i a keda masha konmoví.” (Lesa Huan 11:33-36.) I maske Hesus tabata sa ku lo e bai resusitá Lázaro, tòg el a yora. E no tabatin bèrgwensa di ekspresá su sintimentunan. E hendenan ku tabata para wak por a mira kuantu kariño e tabatin pa Lázaro i su famia. E tabata stima su  amigu asina tantu ku el a usa e poder ku Yehova a dun’é pa resusitá Lázaro!—Huan 11:43, 44.

14, 15. (a) Kiko ta mustra ku Yehova ke kaba ku sufrimentu? (b) Kiko ta interesante tokante e palabra griego pa “graf”?

¹⁴ Beibel ta deskribí Hesus komo e “kopia eksakto” di Yehova su personalidat. (Heb. 1:3) Pues, su milagernan ta siña nos ku su Tata tambe ke eliminá malesa, doló i morto. Den pasado, Hesus a resusitá djis un par di hende. Pero pronto e ku su Tata lo resusitá hopi hende mas, manera e mes a deklará: “Lo yega e ora ku tur esnan ku ta den graf . . . lo sali afó.”—Huan 5:28, 29.

¹⁵ E palabra griego tradusí komo “graf” ta bini di un verbo griego ku ta nifiká “kòrda.” Esaki ta un palabra apropiá, pasobra Dios Todopoderoso, Esun ku a krea e universo inmenso, ta kòrda delaster un detaye di nos sernan kerí ku a muri: nan personalidat, nan kualidatnan, nan bida. (Isa. 40:26) Yehova no solamente por kòrda esnan ku a muri, pero e ku su Yu ke kòrda nan tambe. E resurekshonnan menshoná den Beibel ta djis un muestra di loke lo tuma lugá na gran eskala den e mundu nobo.

16. Ki oportunidat kristiannan ku keda fiel te na fin lo tin?

¹⁶ Si nos keda fiel te na fin, nos por ta testigu di un di e milagernan di mas grandi di tur tempu: pasa bibu dor di e tribulashon grandi. Anto esei no ta tur. Djis despues di Armagedon, nos lo mira mas milager tuma lugá: tur hende lo bira kompletamente salú atrobe. (Isa. 33:24; 35:5, 6; Rev. 21:4) Bo por imaginá bo ta mira e hendenan rònt di bo benta nan brel afó, i tambe nan garoti, krùk, ròlstul i aparato di oido? Ta bon ku Yehova ta restorá salú di e sobrebibientenan di Armagedon, ya ku lo tin hopi trabou di hasi. Ku entusiasmo, nan lo pone man na obra i transformá e planeta ku Dios a duna nos den un bunita paradeis.—Sal. 115:16.

17, 18. (a) Dikon Hesus a hasi milager? (b) Dikon nos mester hasi nos bèst pa nos ta den e mundu nobo ku Dios a primintí?

¹⁷ Ta un gran animashon pa e sirbidónan di Dios djawe, ku ta forma parti di e “multitut grandi,” lesa kon Hesus a kura hende malu. E milagernan ei ta reforsá nan konfiansa ku pronto tur nan dolónan lo disparsé. (Rev. 7:9) Nan ta un muestra tambe di e amor i kariño ku e Yu di Dios tin pa hende. (Huan 10:11; 15:12, 13) Ademas, Hesus su gran kompashon ta un demostrashon di Yehova su amor profundo pa kada un di su sirbidónan.—Huan 5:19.

¹⁸ Nos ta biba den un mundu yen di doló, sufrimentu i morto. (Rom. 8:22) Nos tin mester di e mundu nobo ku Dios a primintí, kaminda nos tur lo ser kurá kompletamente di tur malesa. Malakías 4:2 ta bisa ku hende ku ser kurá lo “bula rònt manera bisénan for di stal,” sí, nan lo ta felis i kontentu di a ser librá for di un kurpa imperfekto. Si di bèrdat nos tin fe den e promesanan di Yehova i nos ta gradisidu pa nan, nos lo hasi nos bèst pa nos wak e mundu nobo ku nos propio wowo! E repaso akí di e milagernan ku Hesus a hasi tabata masha alentador, ya ku nan ta un muestra chikí di e kurashon permanente ku hende lo haña bou di su Reino Mesiániko!